Hleb Łabadzienka paviedamiŭ u svaim fejsbuku, što za piać dzion sabrali hrošy na miemaryjalnuju došku ŭ honar Vasila Bykava. Pryčym viciebskaja firma «Rubikon», što zajmajecca vytvorčaściu lekaŭ, dała 68% srodkaŭ.
«Kaladny cud! Piać dzion tamu na adkryćci doški Ryhoru Baradulinu było abvieščana pra zbor srodkaŭ na došku Vasilu Bykavu — na dom u Minsku, dzie piśmieńnik pražyŭ bolš za 20 hod. Za hetyja 5 dzion ludzi sabrali 32% (!) nieabchodnych srodkaŭ, samuju istotnuju sumu ŭnios spadar Ihar Žabaroŭski. A ŭčora na suviaź vyjšła viciebskaja firma «Rubikon», jakaja zajmajecca vytvorčaściu lekavych srodkaŭ. Dyrektar, spadar Viktar Farbier, vykazaŭ hatoŭnaść apłacić usiu sumu, jakoj nie chapaje. A ŭžo siońnia jany dasłali damovu achviaravańnia, dzie značyłasia jakraz taja suma! Takim čynam, firma «Rubikon» pakryła 68% nieabchodnych srodkaŭ, reštu sabrali ludzi (achviaravali 60 čałaviek). Vialiki dziakuj usim, chto spryčyniŭsia! Nizki pakłon kiraŭnictvu pradpryjemstva «Rubikon»!, — napisaŭ Hleb Łabadzienka. —
Takim čynam, zbor srodkaŭ na pamiatnuju došku Vasilu Bykavu zavieršany, ciapier pačynajecca pracedura ŭzhadnieńnia i ŭłasna stvareńnia doški. Spravy heta niachutkija, ale, spadziajusia, da kanca 2018 hoda ŭsio zrobim!»
Kamientary