U lutym 2017 hoda Valancinu Čarnyšovu z Rahačova daviali da śloz pierad kamisijaj u rajvykankamie. U «darmajedy» jana trapiła, bo nie chapiła ŭsiaho niekalkich dzion abaviazkovaha pavodle Dekreta «hadavoha stažu». Fota: Ivan Jaryvanovič, tut.by
1 studzienia 2019 hoda zapracuje abnoŭleny Dekret № 3. Dakumient, jaki narabiŭ šmat šumu, źmienić i svaju nazvu (rabočy varyjant — «Pa sadziejničańni zaniataści»), i sutnaść.
Jakoj ža budzie novaja redakcyja, što čakaje biespracoŭnych i jakija miery płanujuć prymianiać da tych, chto nie źbirajecca šukać rabotu žurnalistu «Źviazdy» paviedamiła staršynia Pastajannaj kamisii pa pracy i sacyjalnych pytańniach Pałaty pradstaŭnikoŭ Nacyjanalnaha schodu Tamara Krasoŭskaja.
— My zaŭvažyli, što najmalniki nie vielmi achvotna chočuć brać vypusknikoŭ VNU i kaledžaŭ biez vopytu, a taksama žančyn, jakija tolki vyjšli z vodpusku pa dohladzie za dziciem. Dla taho kab znajści pracoŭnaje miesca dla kožnaha, u rajonach pavinny być stvorany śpiecyjalnyja kamisii. U ich uvojduć deputaty ŭsich uzroŭniaŭ, pradstaŭniki ŽKH, upraŭleńniaŭ unutranych spraŭ, adździełaŭ adukacyi i zaniataści.
Tamara Krasoŭskaja dadała, što pavinny być vyznačanyja terytoryi z napružanaj situacyjaj na rynku.
Ich pieralik nieabchodna zaćviardžać štohod. Vyjście dla takich rehijonaŭ — adkryćcio novych pracoŭnych miescaŭ, pierapadrychtoŭka śpiecyjalistaŭ i stymulavańnie samazaniataści.
Stvorać tam taksama infarmacyjnuju bazu hramadzian, nie zaniatych u ekanomicy.
— Važna, kab dziaržaŭnyja orhany ŭzajemadziejničali pry jaje viadzieńni, — ličyć staršynia kamisii. — Infarmacyja ŭ bazie pavinna aktualizavacca štomiesiačna — chto pierajechaŭ u inšy rehijon, chto prachodzić kursy. Vyličyć, ci jość rabota ŭ čałavieka, možna budzie taksama z dapamohaj ID-kartki, jakuju ŭ nastupnym hodzie płanujuć zavieści na kožnaha hramadzianina.
A voś uździejničać na tych, chto pracavać nie choča, składana, pryznajecca deputat. «Mnohija, chto byŭ uładkavany kamisijaj viasnoj, užo zvolnilisia. Choć im i miesca na dobrych pradpryjemstvach znajšli, i zarobak dali».
Da hetaj katehoryi buduć užyvać ekanamičnyja ryčahi. Niezaniatym hramadzianam pracazdolnaha ŭzrostu daviadziecca apłačvać pasłuhi, jakija subsidzirujucca ź biudžetu, u stapracentnym pamiery.
Dakładny pieralik takich pasłuh budzie raspracavany ŭradam u pieršym kvartale 2018 hoda. Mahčyma, u hetym śpisie akažucca pasłuhi pa haza- i elektrazabieśpiačeńni. Pry hetym biełarusy, jakija nie majuć raboty, ale znachodziacca ŭ ciažkaj žyćciovaj situacyi, buduć vyzvaleny ad takoj płaty.
Adznačajecca, što achvotnym zaniacca pradprymalnickaj dziejnaściu, akazvać pasłuhi ŭ śfiery ahraekaturyzmu ci stać ramieśnikam, vydajecca subsidyja.
Jana składaje 11 biudžetaŭ pražytačnaha minimumu (ci 269,5 rubla). Tym, chto źbirajecca adkryć svaju spravu ŭ vioskach, małych haradach ci rehijonach z vysokaj napružanaściu na biržy, vypłačvajuć dapamohu ŭ pamiery 15 BPM (biudžetaŭ pražytkovaha minimumu), a pry arhanizacyi biźniesu, źviazanaha z vykarystańniem vynikaŭ navukovych daśledavańniaŭ i raspracovak — 20 BPM.
Dla tych, chto nie moža kankuryravać na rynku na roŭnych (invalidaŭ, byłych źniavolenych), branirujuć pracoŭnyja miescy. Heta značyć, što pradpryjemstva budzie abaviazana pryniać čałavieka na rabotu. Inakš najmalniku daviadziecca zapłacić štraf — da 50 bazavych vieličyń.
