Zaŭziatar Vianhierski: Pracuju ŭ Jeŭrasajuzie dalnabojščykam, palityčny prytułak prasić nie źbirajusia

Zaŭziatara, jaki pavinien barysaŭskamu futbolnamu kłubu BATE 5 tysiač jeŭra, raspavioŭ «Narodnaj Voli» pra toje, jak źbirajecca vypłočvać hetuju sumu.

Nahadajem, što padčas matča Lihi Jeŭropy pamiž BATE i łondanskim «Arsienałam» na pole «Barysaŭ-Areny» vybieh chłopiec ź bieł-čyrvona-biełym ściaham. Achova stadyjona zatrymała jaho i vyvieła z pola.

Paźniej sud Barysaŭskaha rajona asudziŭ žychara Vilejki Alaksandra Vianhierskaha na 10 sutak administracyjnaha aryštu za drobnaje chulihanstva i «niepadparadkavańnie zakonnamu patrabavańniu słužbovaj asoby», a BATE atrymaŭ ad UEFA za ŭčynak balelščyka štraf u pamiery 5 tysiač jeŭra.

U vyniku BATE vyrašyŭ padać na Vianhierskaha ŭ sud «rehresiŭny isk», kab spahnać hetyja hrošy, jakija kłub źbirajecca addać «na dabračynnaść».

Učora stała viadoma, što sud Vilejskaha rajona zadavoliŭ pazoŭ futbolnaha kłuba da balelščyka ŭ poŭnym abjomie — Alaksandr Vianhierski pavinien zapłacić BATE 5 tysiač jeŭra.

— Pradkazalnaje rašeńnie, — raspaviadaje Alaksandr. — Ja tamu i źjechaŭ naprykancy minułaha hodu za miažu na zarobki. Pa-raniejšamu znachodžusia nie ŭ Biełarusi, mnie treba zarabić 5 tysiač jeŭra. Ale, jak užo kazaŭ, nie źbirajusia ich addavać BATE, a pieradam u dziciačy dom ad svajho imia. Barysaŭski kłub moh by chacia b słova skazać u abaronu svajho balelščyka, ale ŭ jaho, vidać, inšaja pazicyja. U takim vypadku ŭ mianie — svaja.

— A jak być z sudovym rašeńniem?

— Paŭtarusia, nie budu ničoha vypłočvać futbolnamu kłubu. Niachaj vyličvajuć hrošy z maich zarobkaŭ, jašče niejkim čynam spahaniajuć…

— Dzie vy zaraz pracujecie, kali nie sakret? Čym zajmajeciesia?

— Pra krainu, u jakoj znachodžusia, nie chacieŭ by kazać, a pracuju vadzicielem, jezdžu pa Jeŭropie. U miesiac «čystymi» atrymlivajecca dzieści 1200-1300 jeŭra, tamu nieabchodnuju sumu dla dziciačaha doma praź niekalki miesiacaŭ možna lohka naźbirać. Dumaju, za 5-6 miesiacaŭ heta ŭdasca zrabić, kali z pracaj nie ŭźniknie składanaściej.

— Paśla hetaha viernieciesia ŭ Biełaruś?

— Abaviazkova. Kali ja čytaju na forumach, što, maŭlaŭ, Alaksandr Vianhierski vybieh ź bieł-čyrvona-biełym ściaham na futbolnaje pole tolki dziela taho, kab prapijaryć siabie i źjechać za miažu, to mnie prosta stanovicca śmiešna. Nijaki palityčny prytułak prasić ja nie źbirajusia. Kali b było takoje žadańnie, to moh by zrabić heta jašče raniej.

• 0
• 0
• 0
• 0
• 0
• 0
• 0
• 0