Biełaruś maje vialikija ambicyi stać sapraŭdnaj IT-krainaj. Dziaržava i IT-supolnaść razam udaskanalvajuć zakanadaŭstva, i Biełaruś nacelena na toje, kab užo ŭ najbližejšaj pierśpiektyvie pryciahvać IT-śpiecyjalistaŭ z susiednich krain. Ale niečakana ŭ Biełarusi moža ŭźniknuć kankurent na poŭdni — Ukraina. Mienavita hetaja kraina, a nie Biełaruś, tearetyčna moža stać IT-centram Uschodniaj Jeŭropy, niahledziačy na ŭsie svaje palityčnyja prablemy i kanflikt z Rasijaj.
Maštaby Ukrainy i najaŭnaść vialikich haradoŭ
U paraŭnańni ź Biełaruśsiu, Ukraina — vialikaja kraina. Jana maje bolš bujnych haradoŭ i techničnych univiersitetaŭ, jakija rychtujuć IT-śpiecyjalistaŭ. Kali ŭ Biełarusi amal usia raspracoŭka kancentrujecca ŭ stalicy, va Ukrainie situacyja jakasna inšaja. U Kijevie žyvie mienš za pałovu ŭsich prahramistaŭ krainy — akramia stalicy, bujnymi IT-centrami źjaŭlajucca Charkaŭ, Lvoŭ, Adesa i Dniapro. U adnym tolki Lvovie pracuje kala 20 tysiač prahramistaŭ, jakija za 2016 hod pryciahnuli ŭ krainu 518 miljonaŭ dalaraŭ. Voś takoje raźmierkavańnie IT-śpiecyjalistaŭ pa haradach było va Ukrainie ŭ 2015 i 2016 hodzie.
Raźmierkavańnie IT-śpiecyjalistaŭ pa haradach Ukrainy za 2015 i 2016 hod, dadzienyja dou.ua
U Biełarusi ž situacyja horšaja. Minsk vaładaryć i daminuje, a ŭ rehijonach IT-śfiera mała raźvitaja. Zhodna sa spravazdačaj EY, u Minsku ciapier pracuje kala 89% biełaruskich ajcišnikaŭ.
I heta nie dziŭna, bo bolšaść kadraŭ dla IT-śfiery rychtujecca mienavita ŭ Minsku. Pieravažnaja bolšaść biełaruskich prahramistaŭ skončyła BDUIR albo BDU.
Mocnyja rehijanalnyja techničnyja ŭniviersitety
Va Ukrainie situacyja jakasna inšaja. Prahramistaŭ rychtujuć nie tolki ŭ Kijevie — mocnyja rehijanalnyja techničnyja ŭniviersitety jość u Charkavie, Lvovie, Dniapry.
Charkaŭski nacyjanalny ŭniviersitet radyjoelektroniki.
Apošnija hady adbyvajecca sapraŭdny bum i ŭ niefarmalnaj adukacyi. IT raście takimi vialikimi tempami, što kłasičnaja adukacyja prosta nie paśpiavaje rychtavać śpiecyjalistaŭ dla ŭkrainskaj IT-śfiery, tamu źjaviłasia vialikaja kolkaść samych raznastajnych IT-kursaŭ dla pačatkoŭcaŭ. Ale navat jany nie zdolnyja likvidavać toj deficyt, jaki ŭtvaryŭsia na ŭkrainskim IT-rynku.
Imklivy rost
Tolki za 2017 hod ukrainski rynak IT uzros na 27%. Užo ciapier va Ukrainie naličvajecca kala 127 tysiač tych, chto pracuje ŭ śfiery IT. A da 2020 hoda ich kolkaść dasiahnie 200 tysiač.
Dadzienyja pa kolkaści IT-śpiecyjalistaŭ va Ukrainie.
Za 2017 hod ukrainski ekspart IT-pasłuh uzros na 20% i dasiahnuŭ adznaki 3,6 miljarda dalaraŭ. Biełaruski PVT pakul nie publikavaŭ aficyjnyja vyniki dziejnaści za minuły hod, ale prahnazujecca, što ekspart IT-pasłuh dasiahnuŭ adznaki 1 miljard dalaraŭ.
Zarobki i jakaść žyćcia
Zarobki ŭ IT-śfiery ŭ Biełarusi i Ukrainie amal adnolkavyja. Bolš za toje, jany ŭžo nie tak istotna adroźnivajucca ad zarobkaŭ kaleh u raźvitych krainach Zachodniaj Jeŭropy i ZŠA. Ale kali ŭličyć, što Ukraina źjaŭlajecca vielmi tannaj krainaj dla pražyvańnia (u paraŭnańni ź Biełaruśsiu, Zachodniaj Jeŭropaj i ZŠA), pakupnickaja zdolnaść va ŭkrainskaha prahramista adna z samych vysokich u śviecie.
My vyrašyli spytać u śpiecyjalistaŭ ź Biełarusi i Ukrainy, kaho jany bačać u budučyni IT-lidaram Uschodniaj Jeŭropy i ci buduć Biełaruś i Ukraina kankurentami ŭ hetaj śfiery.
Juryj Zisier, zasnavalnik TUT.BY
Lidarstva možna razumieć pa-roznamu. Lidarstva ŭ čym? Kali ŭ eksparcie IT-pasłuh na dušu nasielnictva, to ŭ nas cudoŭnyja pazicyi ŭ rehijonie, jakija z časam pavinny tolki ŭmacavacca. U ahulnym abjomie ekspartu IT-pasłuh my sastupajem mnohim dziaržavam, u tym liku najbližejšym susiedziam, u tym liku ŭtraja prajhrajem Ukrainie. Kali ŭličvać, što nasielnictva Biełarusi ŭ čatyry razy mienšaje za nasielnictva Ukrainy, ničoha dziŭnaha ŭ hetym niama.
Adnak lidarstva ŭ rehijonie druharadnaje, tamu što kraina — tolki adzin z faktaraŭ pry vybary partniora, pryčym daloka nie hałoŭny. Zakazčyki vybirajuć nie krainy, a partnioraŭ. Dy i samo paniaćcie krainy nivieliravałasia, pakolki ŭ bolšaści bujnych rehijanalnych IT-kampanij jość sietka pradstaŭnictvaŭ za miažoj. Dla zakazčykaŭ z ZŠA EPAM Systems — całkam sabie amierykanskaja kampanija, a dzie terytaryjalna raźmiaščajucca šmatlikija ofisy raspracoŭki, zakazčykaŭ mała cikavić, pakolki ŭsiu adkaznaść pa damovie niasie amierykanskaja kampanija.
Sprava nie ŭ «rehijanalnym lidarstvie», a ŭ inšym: IT-dekret stvaryŭ umovy, pry jakich biełaruskija IT-kampanii atrymali ceły šerah kankurentnych pieravah pierad kampanijami susiednich dziaržaŭ. Heta daje nadzieju, što naša IT-halina budzie raźvivacca chutčej, čym u susiednich krainach. Pry hetym nie važna, jakoje miesca ŭ rehijonie my zojmiem: chaj padlikami zajmajucca śpiecyjalisty pa statystycy. Važna toje, jakuju rolu IT-halina zajmaje ŭ našym VUP, što daje našaj krainie, u jakich umovach pracujuć našy IT-kampanii i jak našy kampanii buduć vyjhravać tendary. A z hetym u nas usio ŭ paradku.
Usievaład Šašaryn, Front End Developer ź Biełarusi, jaki pracuje ŭ Luxoft Ukraine (Kijeŭ)
Zarobki prahramistaŭ za hadzinu pracy ŭ Kijevie ŭ siarednim adsotkaŭ na 20—25% vyšejšyja, čym u Minsku. Ja zarehistravany jak indyvidualny pradprymalnik i zarpłata mnie prychodzić u dalarach naŭprost z Amierykanskich Virhinskich Vyspaŭ. Ja płaču ź jaje 5% padatku i 30 dalaraŭ sacyjalnaha strachavańnia. Nakolki ja pamiataju, u Biełarusi navat supracoŭniki kampanij-rezidentaŭ PVT (a tudy jašče treba patrapić) płaciać 9% padachodnaha, i vypłaty ŭ Fond sacyjalnaj abarony nasielnictva taksama vyšejšyja. Bujnyja aŭtsorsiery nie zavodziać hrošy va Ukrainu, i karparatyŭnyja padatki taksama maksimalna aptymizujuć. Takim čynam prahramist va Ukrainie atrymlivaje ŭ siarednim na ruki bolš, čym atrymlivaŭ by ŭ Biełarusi. Dziaržava i biznes znachodziacca ŭ zhodzie z hetaj schiemaj — nichto nie sprabuje jaje ŭrehulavać.
Ukrainski rynak adnaznačna bolš dynamičny. Kožny dzień ja atrymlivaju try-piać paviedamleńniaŭ u LinkedIn u styli «kali łaska, razhledźcie našu krutuju vakansiju». Hihanckaje kamjunici — kožny dzień adbyvajucca niejkija iventy, tematyčnyja kanfierencyi. Jość šmat ludziej, jakija budujuć biznes-kancepcyju vakoł ajcišnikaŭ — žyłyja kompleksy dla ajcišnikaŭ, spartzały dla ajcišnikaŭ, sajty z vakansijami tolki dla ajcišnikaŭ, i hetak dalej. Kampanij bolš, i sami jany taksama bolšyja — ja naŭskidku mahu ŭzhadać z bolš-mienš bujnych biełaruskich aŭtsorsieraŭ chiba što Epam i iTransition. Tut u adnoj tolki kijeŭskaj łakacyi majoj kampanii Luxoft pracuje try tysiačy čałaviek (a jość jašče ofis u Adesie). Jość surjoznyja R&D departamienty, naprykład Samsung. Aŭtsorsieraŭ — nievierahodnaja kolkaść. EPAM, Luxoft, DataArt, GlobalLogic, SoftServe, Miratech, Infopuls — heta tolki toje, što zmoh uzhadać z katehoryi 1000+ supracoŭnikaŭ i tolki ŭ Kijevie. Bujnyja IT-chaby akramia Kijeva: Lvoŭ, Adesa, Charkaŭ. Tam zarobki krychu nižejšyja, čym u Kijevie, ale i žyć tam taksama tańniej. Ukrainskija prahramisty pracujuć na Boinh, Dojče Bank, UBS. Nie viedaju, što ŭ Biełarusi ciapier z prajektami, ale va Ukrainie surjoznych zakazčykaŭ bolš.
Rynak raście na 20% u hod. Ukraina dazvalaje inšaziemcam znachodzicca bieź vizy 90 dzion (a potym možna vyjechać i znoŭ zajechać), heta zručna.
Ofis Samsung u Kijevie.
Jość surjoznyja techničnyja VNU ŭ Charkavie, Lvovie, Dniapry (u Biełarusi adzin BDUIR). Tym nie mienš, halina raście chutčej i kadraŭ brakuje. U mianie ŭ kamandzie pracuje chłopiec ź Jerevana, jość šmat biełarusaŭ, ruskich — Ukraina biez prablem robić im pastajannyja dazvoły na žycharstva. Isnuje šmat usialakich kursaŭ a-la «chutki ŭvachod u IT». Kankurencyja za kadry surjoznaja — aŭtsorsiery realna bjucca za prahramistaŭ.
Internet tanny i vielmi chutki — u mianie doma hihabitnaja bieźlimitnaja pałasa za 6 dalaraŭ u miesiac. U Biełarusi pra takoje možna tolki maryć.
Ź minusaŭ, kali pačałasia vajna, zakrucili hajki ŭ płanie valutnaha rehulavańnia — 50% valutnaj vyručki (majoj zarpłaty) treba pradavać na mižbanku. Ale chodziać čutki, što heta voś-voś admieniać.
Va Ukrainie bolš śpiecyjalistaŭ, bolš VNU, jakija rychtujuć śpiecyjalistaŭ, vyšejšyja zarobki za hadzinu pracy. Dziaržava nie lezie ŭ halinu, a ŭ Biełarusi dziaržava sprabuje jaje aktyŭna padtrymlivać i rehulavać. Što lepš — pytańnie.
