Stalica Ukrainy stała papularnym miescam adpačynku dla biełarusaŭ. Našych hramadzian Kijeŭ pryciahvaje blizkaściu da Biełarusi, bahatym kulturnym žyćciom i adnosna nievialikimi cenami ŭstanoŭ hramadskaha charčavańnia. U Kijevie isnuje vialikaja kolkaść cikavych tematyčnych baraŭ i restaranaŭ, jakija mohuć być cikavymi ŭ tym liku i biełaruskim turystam. «Naša Niva» skłała top-9 kanceptualnych baraŭ i restaranaŭ Kijeva, jakija mohuć być cikavymi biełarusam. U tym liku i tym, što vypraviacca ŭ Kijeŭ u subotu na finał Lihi čempijonaŭ.
1. Parovoz
vuł.Čyrvonaarmiejskaja, 19 (mietro Płošča Lva Tałstoha)
Kinateatr «Kijeŭ»
12.00 — 03.00
Zasnavany ŭ 2002 hodzie, bar Parovoz zajmieŭ druhoje dychańnie razam z novaj kancepcyjaj, interjeram i prystaŭkaj SpeakEasy u naźvie. Z toj pary štohadova jon zajmaje pieršyja miescy ŭ rejtynhach kijeŭskich kaktejlnych baraŭ. Naviedvalniki adznačajuć jaho ŭnikalnuju atmaśfieru, kaktejlnuju kłasiku z «tvistami», i adnu ź lepšych siarod baraŭ Kijeva kuchań.
2. Barmien Diktat
vuł. Chryščacik, 44 (mietro Teatralnaja)
18.00 — 06.00
Adnosna novy bar, jaki adkryŭsia ŭ 2016 hodzie na miescy byłoha art-kłuba «44», znachodzicca na samym Chryščaciku. Ale treba zajści ŭ dvor, kab tudy patrapić — aryjentujciesia na ŭkazalniki. Jeść žyvaja muzyka, pieravažna ŭ styli rok i džaz.
3. Lisopylka
vuł. Starasielskaja, 1a
16.00 — 01.00
Niahledziačy na toje, što hety bar znachodzicca adnosna daloka ad centra, na levym bierazie Dniapra, ekśpierty ličać jaho adnym z najlepšych baraŭ z kraftavym pivam i bahatym vybaram kuchni. Lisopylka pazicyjanuje siabie jak miesca, dzie «niama pafasu, štučnaści, dekaracyj, dzie ŭsio sapraŭdnaje, navat piły na ścienach i stosy droŭ — nie dekaratyŭnyja, a tyja, na jakich my vendzim rabrynki».
Karystalniki Foursquare adznačajuć, što bar maje smačnuju kuchniu, ale vybar ježy, u adroźnieńnie ad ałkaholu, nie taki vialiki.
4. Argentina Grill
vuł. Maršała Cimašenki, 18 (mietro Minskaja)
08.00 — 02.00
Chacia hetaja ŭstanova i pazicyjanuje siabie ŭ pieršuju čarhu jak hryl-restaran, ale tut jość vialikaja vinnaja karta. Hetaje miesca ŭ pieršuju čarhu moža być cikavym dla tych, chto choča adpačyć ź siamjoj ci kalehami pa pracy.
Ale hałoŭnaj admietnaściu ŭstanovy źjaŭlajecca ŭsio ž nie ałkahol, a miasnyja stravy arhiencinskaj, ispanskaj i italjanskaj kuchni.
5. Kitajskij priviet
vuł. Ivana Franka, 7 (mietro Załatyja Varoty)
12.00 — 23.00
Ustanova, jak vynikaje z nazvy, pryśviečana kitajskaj kuchni. Ad inšych miescaŭ z kitajskaj kuchniaj restaran adroźnivajecca najaŭnaściu nie tolki tradycyjnych dla takich miescaŭ łokšyny i rysu, ale i šmatlikich straŭ ź jałavičyny, kački, śvininy, kurycy i baraniny ŭ vostrych soŭsach i hustych azijackich supoŭ.
Vybar ałkaholu taksama vialiki. Amatary ekzotyki mohuć pasprabavać japonskaje kraftavaje piva (ale jano kaštuje kala 10 dalaraŭ). Kali heta doraha dla vas, u jakaści alternatyvy tam jość adnosna tannaje piva ŭłasnaj vytvorčaści i niekalki kitajskich kaktejlaŭ.
6. ORANG+UTAN
vuł. Simona Piatlury, 16/108 (mietro Univiersitet)
vuł. Siečavych Stralcoŭ, 72 (mietro Łukjanaŭskaja)
10.00 — 22.00
Hetaja ŭstanova pazicyjanuje siabie jak viehietaryjanski sendvič-bar. Ałkaholu tut niama. U mieniu možna znajści siem pazicyj sendvičaŭ, sałaty, a taksama smuzi z vysokaj enierhietyčnaj kaštoŭnaściu.
7. Wood You Like Bar
vuł. Miežyhorskaja, 24 (mietro Kantraktovaja Płošča)
09.00 — 02.00
Nievialiki ŭtulny z bar u samym sercy i histaryčnym centry ŭkrainskaj stalicy — na Padole. Miescy jość jak za stojkaj, tak i na maleńkich kanapach. Ustanova pazicyjanuje siabie jak moładzievaja kropka ź vialikaj kaktejlnaj kartaj. Miesca dobraje ŭ pieršuju čarhu dla sustrečy ź siabrami i adpačynku. U asnovie interjeru prysutničaje dreva, što vynikaje z nazvy ŭstanovy.
8. Black Tot Bar
vuł. Vialikaja Žytomirskaja, 16 (mietro Majdan Niezaležnaści)
06.00 — 02.00
Bar znachodzicca ŭ samym centry Kijeva kala Safijskaj płoščy, Andrejeŭskaha ŭzvozu. Hałoŭny napoj hetaj ustanovy — rom (kala 45 vidaŭ). Heta nie kaviarnia, nie restaran z barnaj kartaj, nie kaljan, nie dyskateka, a kaktejlny bar — akramia romu, jany prapanujuć kala 30 kaktejlaŭ. Kožny hość atrymlivaje biaspłatnuju čarku romu.
U asnovie interjeru vintažnaja hałandskaja mebla 50-ych hadoŭ.
9. Usia vulica Šata Rustaveli
Na hetaj pazicyi my nie zdoleli vyłučyć niejkuju asobnuju ŭstanovu. Hetaja vulica maje vielizarnuju kancentracyju baraŭ, kožny ź jakich źjaŭlajecca cikavym i ŭnikalnym. U niekatorym sensie vulica nahadvaje minskuju vulicu Zybickuju.
Bolšaja častka baraŭ kancentrujecca na kavałku vulicy pamiž stancyjami mietro «Pałac Sportu» i «Płošča Lva Tałstoha».