U Breście 100 čałaviek pratestavali suprać budaŭnictva akumulatarnaha zavoda

25 lutaha ŭ Breście bolš za 100 čałaviek vyjšli na płošču Lenina ŭ znak pratestu suprać budaŭnictva akumulatarnaha zavoda, paviedamiŭ tut.by pravaabaronca Raman Kiślak.

Niesankcyjanavanaja akcyja pačałasia ŭ 12.00. Pa słovach Ramana Kiślaka, jaje ŭdzielniki nie razhortvali płakataŭ i nie vyhukvali łozunhaŭ, a stajali nievialikimi hrupami na centralnaj płoščy i abmiarkoŭvali pytańnie budaŭnictva zavoda.

U 13.00 na płoščy taksama pačałosia śviata, prymierkavanaje da Dnia abaroncaŭ Ajčyny i Uzbrojenych sił Biełarusi. Ratavalniki praviali pakazalnyja vystupleńni i prademanstravali hatoŭnaść da likvidacyi nadzvyčajnych situacyj.

Kala 13.30 pratestoŭcy razyšlisia.

Paśla akcyi Raman Kiślak nakiravaŭ zvarot u harvykankam z prośbaj pradastavić płan mierapryjemstvaŭ na 2018 hod dla taho, kab u vypadku padačy zajaŭki na pratestnuju akcyju možna było paźbiehnuć nakładki z haradskimi śviatami.

Pytańniem budaŭnictva akumulatarnaha zavoda zaniepakojenyja žychary Bresta, niekalkich bližejšych viosak i sadovych tavarystvaŭ. Pavodle spravazdačy, pramysłovy navabud raźmieścicca z poŭnačy za 750 mietraŭ ad vioski Chaby, za 1200 m ad dačnaha pasiołka, za 1800 m ad Ščebryna, za 2500 m ad Telmy-2 i za 2 km ad raki Muchaviec.

Viaskoŭcy daviedalisia ab budaŭnictvie zavoda z presy i aburylisia, čamu ŭłady Bresckaha rajvykankama nie pacikavilisia ich mierkavańniem pa hetym pytańni. Jak akazałasia, pracedura hramadskich abmierkavańniaŭ pravodziłasia jašče ŭ śniežni 2016 hoda. Adnak tady «zaŭvah i prapanoŭ» ad hramadskaści nie pastupiła. Jak adznačajuć praciŭniki budaŭnictva, jany ab hetaj pracedury navat nie viedali, bo adpaviednaje apaviaščeńnie drukavałasia ŭ rajonnaj haziecie «Zaria nad Buhom», jakaja vychodzić nakładam 3400 asobnikaŭ, i na sajcie vydańnia.

Hałoŭnaje, što turbuje viaskoŭcaŭ, heta acenka ŭździejańnia na navakolnaje asiarodździe. Adnak praviedzienaja da pačatku budaŭnictva ekśpiertyza pakazała, što «niehatyŭnaje ŭździejańnie prajektavanaha abjekta na atmaśfiernaje pavietra, pavierchnievyja i padziemnyja vody, nietry, hleby, žyviolny i raślinny śviet, a taksama na čałavieka niaznačnaje», a «ŭvod prajektavanych abjektaŭ u ekspłuatacyju nie pryviadzie da parušeńnia pryrodna-antrapahiennaj raŭnavahi».

22 lutaha praciŭniki zavoda padali ŭ Administracyju prezidenta zvarot z patrabavańniem prypynić budaŭnictva zavoda pad jakim padpisalisia bolš jak 36 tysiač čałaviek.

• 0
• 0
• 0
• 0
• 0
• 0
• 0
• 0