Alaksandar Stub sustreniecca z Alaksandram Łukašenkam, ministram zamiežnych spraŭ Biełarusi Siarhiejem Martynavym i pradstaŭnikami biełaruskaj apazycyi.
Siońnia ŭ Miensk ź vizytam prybyvaje dziejny staršynia ABSE, ministar zamiežnych spraŭ Finlandyi Alaksandr Stub.
Jon sustreniecca z Alaksandram Łukašenkam, ministram zamiežnych spraŭ Biełarusi Siarhiejem Martynavym i pradstaŭnikami biełaruskaj apazycyi. Čaho čakajuć ad hetaha vizytu ŭ Miensku?
Napiaredadni pryjezdu ŭ Biełaruś dziejnaha staršyni ABSE Alaksandra Stuba kiraŭnik mienskaha ofisu hetaj arhanizacyi Hans‑Jochen Šmit zajaviŭ, što jon bačyć mahčymaści dla «pakrokavaha raźvićcia adnosin Biełarusi i Eŭropy»:
«Karyść ad apošnich palityčnych rašeńniaŭ, uchvalenych u Biełarusi, takich jak vyzvaleńnie palitviaźniaŭ, praviadzieńnie vybaraŭ, jakija buduć acenienyja BDIPČ ABSE i abmierkavanyja ŭ Eŭropie, u tym, što isnuje mahčymaść znajści sposaby krok za krokam i ŭ kankretnych halinach raźvivać supracoŭnictva».
Pavodle spadara Šmita, dziejny staršynia ABSE źbirajecca siońnia abmierkavać pytańni supracoŭnictva, umacavańnia adnosin ABSE i Biełarusi.
Na palapšeńnie adnosin z Zachadam raźličvajuć i biełaruskija ŭłady. Pra heta adrazu paśla vybaraŭ kazaŭ A. Łukašenka na sustrečy ź kiraŭnicaj misii naziralnikaŭ ad Parlamenckaj asamblei ABSE An‑Mary Lizen. Biełaruski kiraŭnik skazaŭ spadaryni Lizen, što čakaje ad Eŭraźviazu admieny sankcyj: «My čakajem ad vas admieny ŭsialakich sankcyj, jakija vy ŭviali, pakryŭdziŭšy biełaruski narod», — zajaviŭ tady A.Łukašenka. Siońnia jon upieršyniu prymie ŭ svajoj rezydencyi ministra zamiežnych spraŭ adnoj z krain Eŭraźviazu — Finlandyi, jakaja ciapier staršyniuje ŭ ABSE.
Alaksandr Stub sustreniecca i z pradstaŭnikami biełaruskaj apazycyi. Lidery Abjadnanych demakratyčnych siłaŭ źbirajucca davieści jamu supolnuju pazycyju. Havoryć adzin ź sustaršyniaŭ ADS Vincuk Viačorka:
«My chacieli b kančatkovaha zamacavańnia acenki hetych vybaraŭ jak niedemakratyčnych, nieadpaviednych standartam, nieprazrystych,i adpaviedna zamacavać pazycyju nakont novaha składu Pałaty pradstaŭnikoŭ, jak struktury, jakaja nia moža nazyvacca lehitymnym parlamentam i nie moža pryznavacca».
Vincuk Viačorka pierakanany, što mižnarodnyja arhanizacyi mohuć rabić kroki nasustrač biełaruskim uładam tolki ŭ adkaz na pazytyŭnyja zruchi, a pakul da takich možna adnieści tolki vyzvaleńnie palitviaźniaŭ.
Mienski palitolah Andrej Fiodaraŭ nie čakaje ad vizytu dziejnaha staršyni ABSE niejkich istotnych rašeńniaŭ:
«Ničoha ja ad hetaha pryjezdu nie čakaju, bo ABSE nia taja arhanizacyja, jakaja moža štości vyrašać.Vyrašaje Eŭraźviaz, u mienšaj stupieni — Rada Eŭropy. ABSE — heta analah AAN ŭ Eŭropie. I jašče horšy, tamu što rašeńni tut uvohule prymajucca kansensusam, a my viedajem, jakija krainy tudy ŭvachodziać».
Pavodle spadara Fiodarava praryvu ŭ dačynieńniach biełaruskich uładaŭ ź mižnarodnaj supolnaściu niama. Jość tolki niekatoraje paciapleńnie ŭ staŭleńni da aficyjnaha Miensku, ale heta nie jaho zasłuha, heta reakcyja Zachadu na rasiejskuju ahresiju ŭ Hruzii.
Valer Kalinoŭski, Radyjo Svaboda
Ciapier čytajuć
Što ŭ realnaści adbyłosia pad Smalavičami? Voś samaja łahičnaja pryčyna nalotu ašalełych rasijskich małaletak2
Kamientary