Pavieł Biełavus pra 25 Sakavika: Kali da paniadziełka nie budzie kankretyki, to my budziem rabić usio pa svajoj prahramie
Kiraŭnik kramy Symbal.by Pavieł Biełavus byŭ adnym z najbolš aktyŭnych na pasiedžańni arhkamiteta da 100-hodździa BNR.
Biełavus adstojvaŭ pazicyju, što treba ładzić śviata la Opiernaha teatra. My parazmaŭlali z Paŭłam ab tym, jakim jon bačyć farmat śviatkavańnia.
«Ja razhladaju siabie jak mieniedžara i arhanizatara mierapryjemstva, bo damaŭlacca z abstalavańniem, aparaturaj, hurtami budziem my. Kab zrabić jarkaje mierapryjemstva, patrebny čas, a času zastałosia litaralna 25 dzion. I heta krajniaja miaža dla taho, kab zrabić mierapryjemstva jakasnym.
Nichto z muzykaŭ nie choča vystupać na mierapryjemstvie, jakoje moža pahražać ich dalejšym kancertam. Šmat razoŭ muzyki sutykalisia z tym, što vystupali na mitynhach, arhanizavanych palitykami, a potym na 5—10 hadoŭ źnikali z efiru, nie mahli pravieści kancerty. Nie chočacca, kab heta paŭtarałasia, tamu my imkniemsia nie padstaŭlać ludziej.
Čamu my pajšli ŭ arhkamitet? Bo adzin raz my tolki sustreniem 100-hodździe BNR. U našym žyćci ŭžo nie budzie 200-hodździa BNR. Heta šaniec addać pašanu tym ludziam, jakija pačali farmavańnie sučasnaj niezaležnaj Biełarusi. Dla nas heta śviata, adznačeńnie važnaj daty.
Na žal, dla častki palitykaŭ śviata na zadnim płanie. Ja navat nie mahu da kanca zrazumieć, jakich metaŭ jany chočuć dasiahnuć svaim mierapryjemstvam.
My ŭžo paŭhoda pracujem nad tym, kab pravieści jakasnaje mierapryjemstva. Zapuścili admysłovy styl da 100-hodździa BNR, jaki šyroka razyšoŭsia. Ciaham tydnia budzie hatovaja vialikaja kolkaść suvienirnaj pradukcyi dla razdačy: nalepki, apaski, znački, paštoŭki. Jany buduć nahadvać zvyčajnym ludziam, što takoje BNR, što adbyłosia 25 sakavika 1918 hoda. Zrabili admysłovy sajt, chešteh.
Taja prapanova, jakuju ahučyli spadaru Ryhoru Kastusiovu ŭ Minharvykankamie, nam padałasia vielmi dobraj. Za heta treba bracca adrazu ŭ tuju ž chvilinu, kali takaja mahčymaść uźnikła, vyciskać usio, što možna vycisnuć. My chacieli ŭžo ad učora pačać pracu, kab arhanizavać narodnaje śviata z hulańniami.
My kažam ab tym, što ŭsio pavinna rabicca vielmi chutka. Užo siońnia pavinna było być abvieščana, što kancert budzie, iści ŭ harvykankam, damaŭlacca ab prahramie. Ale ŭsio, na žal, spyniłasia na nieviadomy termin: dzień, dva, piać, dziesiać? Maŭlaŭ, prapanova Minharvykankama dobraja, ale hetaha mała.
Usia hetaja doŭhaja trochhadzinnaja dyskusija była zaviazanaja tolki na tym, što śviata biez šeścia — heta nie śviata. Dvaccać hadoŭ chadzili šeściem, a tut nie budzie, jaki žach! Ja nie suprać šeścia, ale jaho možna pradumać pa-inšamu.
Atrymałasia dahrukacca da minskich uładaŭ i jany pahadzilisia ŭstalavać dźvie šyldy ŭ honar BNR: adna ź ich lažyć 25 hadoŭ na Siadzibie BNF, jaje płanujuć ustalavać na Vaładarskaha, a druhuju ŭ honar bratoŭ Łuckievičaŭ u parku Janki Kupały.
Kali ŭžo vielmi chočacca šeścia, to možna prajści z uračystaha adkryćcia, dzie budzie arkiestr, na aficyjnaje mierapryjemstva. Farmat šeścia ŭ miežach dazvolenaj akcyi možna było niejak arhanizavać.
U vyniku ž pakul my majem zamarožvańnie situacyi. Pojduć u harvykankam, buduć cisnuć na šeści. Ułady buduć adkazvać, što šeście dazvolić nie zmohuć… I heta budzie doŭha ciahnucca i hublacca čas.
My pavieryli ŭ toje, što možna budzie apieratyŭna prymać niejkija rašeńni i vialikaj supolnaściu pracavać jakasna. U vyniku ž arhkamitet na siońnia naadvarot pačaŭ tarmazić hetyja pracesy.
Kali da paniadziełka nie budzie nijakaj kankretyki, to my prosta pluniem na ŭsio heta i budziem rabić toje, što i tak daŭno spłanavali. Nie atrymajecca zrabić vialikaje mierapryjemstva la Opiernaha, čaho budzie vielmi škada, my zrobim niekalki nievialikich kancertaŭ na inšych placoŭkach. Usio adno svaju spravu my zrobim. Moža, u mienšym farmacie, ale zrobim.
Kali ŭsio zapłanavanaje atrymajecca realizavać, to bližejšyja try tydni mnie nie budzie času navat paspać. Bo pracy vielmi šmat. Chočacca, kab heta nie byŭ vystup pad rupar dvuch palitykaŭ i dvuch bardaŭ. Nam chočacca zusim inšy farmat.
My schadzili ŭčora da Opiernaha i da parku Kupały. La Opiernaha jość cudoŭnyja prystupki, vialikaja placoŭka, dzie možna pastavić scenu. Tam źnieśli budynak VDNCH, tamu placoŭka jašče pašyrajecca. Lohka moža sabracca 30-50 tysiač čałaviek.
My chočam sapraŭdnaje haradskoje śviata, dzie budzie zona aktyŭnaści dla dziaciej i darosłych, dzie buduć dobra pradstaŭlenyja biełaruskija vyraby, litaratura, taki śviatočny markiet. My chočam zrabić zonu fudkortaŭ u sučasnym farmacie. Kab była zona aktyŭnaści dla hramadskich arhanizacyj, kab byli ekołahi, «Budźma» i inšyja, kab byli roznyja hramadskija inicyjatyvy pradstaŭlali siabie.
Nu i, narešcie, hałoŭnaja scena, dzie adbyvajucca asnoŭnyja mierapryjemstvy. Paety čytajuć vieršy, hrajuć muzyki, vystupaje «Svabodny teatr», vystupleńni viadomych ludziej, viadučy pravodzić interaktyŭ. Narmalnaje, žyvoje jeŭrapiejskaje śviata.
Tamu my i padšturchoŭvali arhkamitet da chutkaha pryniaćcia rašeńniaŭ, kab u nas było bolš času na padrychtoŭku. Da nas užo zapisałasia kala 100 vałancioraŭ, jakija ad siońnia hatovyja dapamahać u arhanizacyi śviata.
My zapuścili na «Tałace» kraŭdfandynhavuju kampaniju. Uvachod, viadoma, budzie volny. Ale dla taho, kab pakryć arhanizacyjnyja vydatki, patrebna minimum kala 10 tysiač dalaraŭ. Hetyja hrošy pojduć na toje, kab zrabić śviata nie za srodki zamiežnych fundataraŭ, a za hrošy zvyčajnych ludziej. Kolki my naźbirajem, tak i zrobim.
Ja prašu ludziej, kali jany nam vierać, padtrymać hety kraŭndfandynh. My ŭ lubym vypadku zrobim niekalki mierapryjemstvaŭ u horadzie, kudy zaprosim usich achviaradaŭcaŭ.
U nas jość papiarednija damoŭlenaści amal z usimi top-muzykami, ale my nie možam im pakul dać kankretyki. Kab nam dakładna farmavać prahramu, treba pryjści da muzykanta z papieraj. Jość ideja zaprasić vuličnyja teatry. Heta taki farmat, jaki my vypraboŭvali na Dniach vyšyvanak, kab było šmat cikavostak.
U nas jość impet i žadańnie heta ŭsio arhanizavać, ale ŭłasnyja ambicyi niekatorych palitykaŭ nie dazvalajuć rabić heta apieratyŭna. My zvyklisia zajmacca kankretykaj, a nie kudyści chadzić, kahości pierakonvać, a rabić čotka. My pastavili zadaču i robim, a nie viadziem pustyja razmovy.
Na žal, my nie možam zrabić usio samastojna. Bo jość kankretnaja zajaŭka i zajaŭniki, my nie chočam rabić popierak. Kali nie atrymajecca ciaham tydnia, to budziem spakojna rabić toje, što ličym važnym. Ale spadziajusia, što niešta atrymajecca. Kali nie atrymajecca, to heta budzie pravał, paśla jakoha ŭsiu sučasnuju apazicyju možna budzie śpisvać za prafnieprydatnaść».
Kamientary