Ranicaj 14 krasavika ZŠA, Vialikabrytanija i Francyja nanieśli avijaŭdary pa Siryi ŭ adkaz na chimičnuju ataku ŭ horadzie Duma, u praviadzieńni jakoj Zachad vinavacić siryjskich vajskoŭcaŭ.
Pavodle zajavy ZŠA, udary pryjšlisia pa troch celach u rajonie Damaska i Chomsa, jak miarkujecca źviazanym ź siryjskaj prahramaj stvareńnia chimičnaj zbroi navukova-daśledčym instytucie, kamandnym punkcie i składach.
U vakolicach Damaska vybuchi, pa słovach vidavočcaŭ, byli čutnyja adnačasova kala 4 ranicy pa miascovym časie (supadaje ź minskim). Pavodle paviedamleńnia siryjskich dziaržaŭnych ŚMI, u vyniku avijaŭdaru pa Chomsie paciarpieli troje hramadzianskich asob.
Minabarony Rasii abvinavaciła Zachad u naniasieńni udaraŭ, u tym liku pa hramadzianskich abjektach. Jakija mienavita abjekty hramadzianskaj infrastruktury patrapili pad abstreł, nie ŭdakładniajecca. Viedamstva paviedamiła, što nivodnaja z vypuščanych rakiet nie trapiła ŭ zonu adkaznaści SPA, jakaja abaraniaje rasijskija bazy ŭ Tartusie i Chmiejmimie.
Décollage, cette nuit, des forces armées françaises qui interviennent contre l'arsenal chimique clandestin du régime syrien. Déclaration du Président de la République @EmmanuelMacron : https://t.co/HNSK0FmZIO pic.twitter.com/DEAW7R50aC
— Élysée (@Elysee) 14 apriela 2018 h.
Kudy trapili rakiety, vypuščanyja kaalicyjaj pa Siryi
U Maskvie nazvali kolkaść vypuščanych pa Siryi rakiet
U Siryi śćviardžajuć, što byli vypuščanyja kala 30 rakiet, tracinu ź jakich udałosia źbić. U apieracyi pryniaŭ udzieł amierykanski karabiel, jaki znachodziŭsia ŭ Čyrvonym mory, i bambardziroŭščyki B-1. Pa dadzienych CNN, amierykanskija samaloty vypuścili, u pryvatnaści, avijacyjnyja kryłatyja rakiety.
Francyja i Vialikabrytanija taksama zadziejničali avijacyju — ministerstva abarony Vialikabrytanii paviedamiła pra ŭdzieł čatyroch źniščalnikaŭ «Tarnada», jakija vypuścili kryłatyja rakiety «Storm Shadow» pa celach u rajonie Chomsa. Ci ŭvachodzili samaloty sajuźnikaŭ u pavietranuju prastoru Siryi, pakul nie ŭdakładniajecca.
***
Donald Tramp u svaim zvarocie da nacyi viečaram u piatnicu, zajaviŭ:
«Suhramadzianie-amierykancy, niadaŭna ja zahadaŭ uzbrojenym siłam Złučanych Štataŭ pačać naniasieńnie vysokadakładnych udaraŭ pa celach, źviazanych z chimičnaj zbrojaj siryjskaha dyktatara Bašara Asada. Zaraz ažyćciaŭlajecca sumiesnaja apieracyja z ŭzbrojenymi siłami Francyi i Złučanaha Karaleŭstva. My dziakujem abiedźvium hetym krainam».
«U minułuju subotu režym Asada znoŭ vykarystaŭ chimičnuju zbroju dla masavaha zabojstva niavinnych hramadzianskich asob — na hety raz u horadzie Dumie, niedaloka ad siryjskaj stalicy Damaska. Heta bojnia stała značnaj eskałacyjaj u vykarystańni chimičnaj zbroi hetym žachlivym režymam. U vyniku złoj i podłaj ataki baćki i maci, niemaŭlaty i dzieci pakutavali ad bolu i zadychalisia.
Ludzi tak nie pastupajuć, takija złačynstvy ździajśniajuć pačvary».
«Supolny adkaz Amieryki, Brytanii i Francyi na hetyja źvierstvy budzie zadziejničać usie ŭładnyja instrumienty: vajennyja, ekanamičnyja i dypłamatyčnyja», — skazaŭ Tramp
«U 2013 hodzie prezident Pucin i jahony ŭrad abiacali śvietu, što jany harantujuć likvidacyju chimičnaj zbroi Siryi. Niadaŭniaja ataka Asada — i siońniašniaja reakcyja — źjaŭlajucca pramym vynikam taho, što Rasija nie vykanała heta abiacańnie. Rasija pavinna vyrašyć, ci praciahnie jana iści pa ciomnym šlachu abo dałučycca da cyvilizavanych nacyj, da sił stabilnaści i miru. Spadziajusia, kali-niebudź my damovimsia z Rasijaj, a moža być, ź Iranam — ale, mahčyma, i nie», — skazaŭ prezident ZŠA.
***
Prezident Francyi Emanuel Makron zajaviŭ, što zahadaŭ udaryć pa Siryi, bo «dziasiatki mužčyn, žančyn i dziaciej byli źniščanyja chimičnaj zbrojaj». «Čyrvonaja linija była pierakročanaja», — dadaŭ jon.
Ciapier čytajuć
«Heta šlach adzinočki». Biełarus bolšuju častku žyćcia pravodzić u vandroŭkach — naviedaŭ užo amal 500 abjektaŭ JUNIESKA1
Kamientary