«Biełaja Ruś» sfarmulavała ŭłasny śpis prapanoŭ pa palapšeńni vybarčaha zakanadaŭstva i adasłała jaho ŭ CVK.
Taćciana Šendzik, namieśnica staršyni arhanizacyi, raskazała «Našaj Nivie», što mienavita jany prapanujuć Jarmošynaj da palapšeńnia.
Šendzik kaža, što ŭsie punkty byli napisanyja jak padsumavańnie ŭražańniaŭ siabraŭ «Biełaj Rusi» ad raboty na vybarčych kampanijach.
Taćciana Šendzik pasiaredzinie
«Najpierš, my prapanujem zrabić zbor i pravierku podpisaŭ bolš łajalnaj: admianić praceduru, kali zborščyk ułasnaručna stavić datu ŭ padpisnym liście. My syšlisia na dumcy, što heta nie tak pryncypova. Asabliva, kali zbor podpisaŭ viadziecca ŭ palavych umovach — heta stvaraje niejkija kazusy, časam i pamyłki. Chaj čałaviek tolki stavić podpis», — skazała Šendzik.
«Dalej my prapanujem zamacavać praceduru statystyčnaj vybarki listoŭ dla pravierki. Jak heta ciapier robicca? U kamisiju prynosiać padpisnyja listy, jana praviaraje, ci ŭsio dastavierna tam. Spačatku, naprykład, biaruć 20%, ź ich nie mienš 15% musiać być biespamyłkovyja i hetak dalej. Hetaja pracedura vyznačajecca kamisijaj biez dakładnaj farmuloki, jaje treba ŭnifikavać, kab nie ŭźnikała pytańniaŭ», — praciahnuła žančyna i dadała, što «Biełaja Ruś» taksama prapanuje CVK prymać dakumienty kandydataŭ nie ahulnym pakietam, a paetapna, z akazańniem kansultacyj.
«Taksama ŭźnikała šmat pytańniaŭ da skryniaŭ padčas daterminovaha hałasavańnia, heta nie zusim rehłamientavana: dzie musić znachodzicca supracoŭnik RUUS, jak zabiaśpiečvajecca cełasnaść urny? Kab źniać prastoru dla insinuacyj, my prapanujem prapisać usio detalova».
Asabliva važnym «Biełaj Rusi» zdajecca nastupny punkt — jany prapanujuć zabaranić arhanizacyjam, jakija atrymlivali sponsarskuju dapamohu ad zamiežnych fondaŭ ci hramadzian, udzielničać u farmiravańni vybarčych fondaŭ kandydataŭ.
Što datyčyć farmiravańnia vybarčych kamisij (dzie kožnyja vybary adnyja i tyja ž ludzi), to tut, jak skazała Taćciana Šendzik, aktyvisty «Biełaj Rusi» prablemy nie bačać.
Imaviernaść, što da prapanoŭ «Biełaj Rusi» prysłuchajucca ŭ Centrvybarkamie, Šendzik nazvała «vysokaj».
