Viadučy ANT Dźmitryj Bačkoŭ raskazaŭ, čamu ŭ efiry jaho tok-šou siadziać adnyja i tyja ž ludzi
Na niadaŭniaj vystavie «ŚMI ŭ Biełarusi 2018» žurnalisty «Našaj Nivy» pahavaryli ź viadučym ANT Dźmitryjem Bačkovym, jaki viadzie prahramu «Našaje žyćcio» — heta tok-šou, jakoje pryjšło na źmienu «Spravie pryncypu» Vadzima Hihina.
Asobnyja ludzi raniej abvinavačvali Bačkova ŭ nieprychavanaj cenzury — tak, staršynia BNF Ryhor Kastusioŭ naŭprost śviedčyŭ, što dźvie traciny jaho słovaŭ u adnoj u pieradač vyrazali.
«Vadzim Hihin nikoli nie dazvalaŭ sabie vyrazać słovy ci frazy», — kazaŭ «Našaj Nivie» Kastusioŭ.
Tamu my i spytalisia ŭ Bačkova, što jon moža adkazać na takija paproki.
«A vy spytajciesia ŭ Kastusiova, ci jon pa-raniejšamu tak ličyć? Ja nie cenzuruju prahramu sychodziačy z taho, što adzin kiepska havoryć, a druhi dobra. U nas jość abmiežavańnie pa časie, i pieršym pakutuju ja — vyrazaju svaje padvodki, dumki. Potym vyrazaješ, skažam, paŭtory dumak udzielnikaŭ i hetak dalej. Heta ŭ sudzie kožnaje słova maje značeńnie, a televizijny žanr trochi inšy», — skazaŭ televiadučy.
Taksama jon adkazaŭ na pytańnie, čamu ŭ studyi «ekśpierty» — heta viečna adnyja i tyja ž ludzi, kštałtu rasijska-armianskaha piśmieńnika Uładzimira Jeranasiana.
«Na žal, u Biełarusi taki ścipły vybar śpikieraŭ, jakich było b cikava hladzieć… jaskravych, jakija ŭmiejuć cikava havaryć, pryciahvać uvahu, što my sami šukajem takich ludziej, paviercie. Dla nas heta bolšy hałaŭny bol, čym dla hledača», — skazaŭ Bačkoŭ.
My jamu nie pavieryli i ŭkazali na vidavočnaje — čamu, skažam, nie zaprašajecie Aleksijevič?
«Nie zaŭsiody prychodziać, kali my zaprašajem. My raz-dva zaprasili, kali ludzi nie pryjšli, to my razumiejem, što heta jany prosta nie chočuć. Sam pa sabie farmat razmovy adnačasova ciažki i nie dla ŭsich prymalny», — adkazaŭ Bačkoŭ.
«Dyk vy zaprašali i jana admoviłasia?», — pierapytali my.
«Ja ŭžo ciapier nie mahu skazać. Była vialikaja kolkaść prahram, kaniečnie, zaprašali, ja ŭpeŭnieny, heta cikavy śpikier, nobieleŭski łaŭreat», — skazaŭ Bačkoŭ.
Kamientary