Vialiki arhienciniec Dyjeha Maradona padpisaŭ kantrakt z bresckim «Dynama». «Naša Niva» ŭspaminaje samyja jarkija staronki bijahrafii futbalista.
«Usio čałaviectva zajzdrościła Maradonu, a jon zajzdrościŭ usiamu čałaviectvu. Usie chacieli žyć jak Maradona, a jon chacieŭ žyć jak usie. Žyćcio Maradony — heta jaho vializnaja drama», — kazaŭ kaleha pa zbornaj Arhienciny Chorchie Valdana. Ci nie ŭsio žyćcio hety čałaviek adčuvaŭ siabie niaščasnym.
Chto najlepšy: Maradona ci Piele?
Kaliści Maradona i Piele siabravali.
«Piele daŭno para viarnucca ŭ muziej», — kateharyčna zajaviŭ Dyjeha na Mundyjali-2010, dzie ŭznačalvaŭ svaju zbornuju. Heta adviečnaja futbolnaja sprečka, chto najlepšy: Piele ci Maradona? FIFA ličyć, što Piele. A voś zvyčajnyja zaŭziatary, što hałasavali na sajcie mižnarodnaj fiederacyi futboła, u svaim vybary byli adnaznačna na baku arhiencinca. Za jaho svaje hałasy addali 53% apytanych. «Piele — heta maryjanietka ŭ rukach FIFA, tamu najlepšym zrabili jaho, a tym časam zaŭziatary hałasujuć za mianie», — kaža na heta Maradona.
«Jaho tak bili, što ja bajusia, jaho ŭvohule zabjuć»
Dyjeha — unikalny futbalist. Jon udzielničaŭ u čatyroch čempijanatach śvietu. Moh i ŭ piaci, ale na pieramožny dla Arhienciny čempijanat 1978 hoda futbalista nie ŭziali praz kiepski charaktar. Maradona telefanavaŭ hałoŭnamu trenieru i ŭprošvaŭ uziać jaho na mundyjal, ale Siesar Mienoci byŭ biaźlitasny da maładoha talenta. «Heta była samaja vialikaja paraza ŭ maim žyćci», — kaža kumir miljonaŭ.
Maradona vyjšaŭ z najbiadniejšych kvartałaŭ Buenas-Ajresa. Mały Dyjeha byŭ vymušany lapić i pradavać hlinianyja zbanočki, kab niejak dapamahčy siamji. U jaho byli nadzvyčaj kranalnyja adnosiny z maci až da samaj jaje śmierci. «Kali jana paprosić Miesiac, to ja zrablu ŭsio, kab jaho dastać. Ale heta budzie drobiaź u paraŭnańni z tym, što jana zrabiła dla mianie».
Maradona nie lubić uzhadvać svajho malenstva, navat starajecca nie naviedvać kvartał, dzie prajšli jahonyja maładyja hady.
Debiutnym pieršynstvam dla Maradony byŭ mundyjal 1982 hoda ŭ Ispanii.
Futbalist jaho skončyŭ vydaleńniem u matčy z Brazilijaj, u Maradony prosta nie vytrymali niervy. «Jaho tak bili, što ja bajaŭsia, jaho ŭvohule zabjuć», — kazaŭ potym słynny saviecki varatar Rynat Dasajeŭ.
Ruka Boha
Trenier «niabiesna-biełych» Karłas Biłarda pačatkova chacieŭ admovicca ad pasłuh hulca z krutym noravam, ale pabačyŭ, što bieź jaho vybudavać bajazdolnuju zbornuju nie ŭdasca. Biłarda pryniaŭ składanaje rašeńnie budavać kamandu vakoł Maradony, za što jaho krytykavaŭ navat pieršy demakratyčna abrany prezident krainy Raul Alfansina.
U 1985 hodzie Dyjeha paśla troch hadoŭ prastoju znoŭ nadzieŭ majku zbornaj. A na čempijanacie śvietu — 1986 adbyŭsia sapraŭdny bieniefis Maradony. U čverćfinale Arhiencina syšłasia z Anhlijaj. Za čatyry hady da hetaha krainy vajavali za Fałklendskija vyspy. Tamu matč byŭ niečym bolšym, čym prosta hulnia. Na trybunach navat adbylisia sutyčki.
Na 51-j chvilinie mały Maradona pieraskakaŭ bramnika anhličan Pitera Šyłtana, jaki vyšejšy za jaho na 20 santymietraŭ, i nakiravaŭ miač u varoty rukoj. Arbitr nie zaŭvažyŭ taho momantu i zaličyŭ hoł. Paśla hulni Maradona skazaŭ słavutuju frazu: «Ja nie dakranaŭsia da miača. Heta była ruka Boha». Toje pieršynstvo zastałosia za Arhiencinaj, Maradona byŭ pryznany najlepšym hulcom turniru.
Narkazaležnaść i lekavańnie
Spartovuju karjeru hienijalnaha hulca skaraciła narkatyčnaja zaležnaść. Na čempijanacie śvietu 1994 hoda jon trapiŭsia na ŭžyvańni narkotykaŭ i byŭ dyskvalifikavany na 15 miesiacaŭ. A jašče za try hady da hetaha ŭ jaho byŭ sud za zachoŭvańnie kakainu. Usio tym ža letam 1994-ha futbalist adkryŭ stralbu ź pnieŭmatyčnaj zbroi ŭ žurnalistaŭ, jakija chacieli ŭziać u jaho intervju, za što potym atrymaŭ dva hady i dziesiać miesiacaŭ turmy ŭmoŭna.
U 2000 hodzie ŭ futbalista padčas viečarynki ŭ kampanii narkabaronaŭ va ŭruhvajskim haradku Punte-del-Este zdaryŭsia sardečny kryz. Jaho znoŭ sprabavali pryciahnuć da suda za narkotyki, ale nie ŭdałosia. Paśla ŭsiaho hetaha Maradona źjechaŭ na Kubu da svajho daŭniaha siabra Fidela Kastra, kab u adnoj z zakrytych klinik pravieści kurs reabilitacyi.
U 2004 hodzie futbalist znoŭ chodzić na miažy žyćcia i śmierci. U Maradony praz zališniuju vahu i narkazaležnaść zdarajecca sardečny prystup. «Ja pomniu ŭ adnym filmie, kali čałaviek pamiraje, to jon apynajecca ŭ tuneli, ale tam pačynaje pratestavać, što jahony čas jašče nie pryjšoŭ. U takim samym tuneli pabyvaŭ i ja. Tam ja pabačyŭ balelščykaŭ «Ryvier Plejt», «San-Łarensa», «Rasinha», «Urakana», «Indepiendjente…»
Na ruce — Če Hievara, na nazie — Kastra
Maradona raźvioŭsia z žonkaj, ź jakoj pražyŭ bolš za 25 hadoŭ. Dyjeha maje levyja palityčnyja pohlady. U jaho tatu z vyjavaj Če Hievary na pravaj ruce, a na nazie — Fidela Kastra. «Ja vieru ŭ Čaviesa. Možacie nazyvać mianie «čavistam». Usio, što robiać Čavies i Kastra, — heta lepšaje, što tolki zdolnyja zrabić sučasnyja palityki», — kazaŭ jon.
«Ja nienavidžu ŭsio, što źviazana z ZŠA. Ja nienavidžu ZŠA ŭsioj dušoj», — pryznaŭsia adnojčy futbalist. Jon by moh pasiabravać i z Łukašenkam. Maradona źjaŭlajecca skandalistam va ŭsim. Jon nie pryznavaŭ baćkoŭstva svaich pazašlubnych dziaciej, a taksama nie płacić alimientaŭ.
Raźbiŭ šklanku vady ab hałavu karalevy pryhažości Paliniezii, kali taja pačała spračacca ź jahonaj dačkoj.
Maradonu nazyvali homaseksuałam.
Maradona maje ŭsiaho 167 santymietraŭ rostu, asablivaj strojnaściu jon taksama nikoli nie vyłučaŭsia. Ale jahonaja technika była ŭnikalnaj. Maradona pieršym pačaŭ vykarystoŭvać takija pryjomy, jak pierakidvańnie, katańnie miača na vysokaj chutkaści. Jon vałodaŭ cudoŭnym bačańniem pola, a taksama nadzvyčajnaj tryvałaściu. Žyćcio Maradony — heta vializnaja teatralnaja pastanoŭka, za jakoj nie stamlaješsia sačyć. Na Kubie navat była pastaŭlenaja admysłovaja pjesa «Futbołka numar 10: pamiž rajem i piekłam». U 2008 hodzie sierbski režysior Emir Kusturyca źniaŭ bijahrafičny film pra Maradonu.
Tym bolš cikava budzie sačyć za jahonaj biełaruskaj staronkaj bijahrafii.
