Andrej Parotnikaŭ: U rehijonach nie majuć jasnych ukazańniaŭ, jak stavicca da sprob Rasii pašyryć svoj upłyŭ
Toje, što ŚMI pačali źviartać uvahu na sproby Rasii pašyryć infrastrukturu svajho ŭpłyvu ŭ Biełarusi, biezumoŭna, dobra. Ale ja niadrenna pamiataju dzievianostyja, i mahu paraŭnoŭvać z tym, što było i jak stała: ciapier u Maskvy zastałosia dobra kali 10% voś toj infrastruktury ŭpłyvu (arhanizacyi, partyi, łakalnyja ŚMI, roznaha rodu hrupy aktyvistaŭ, čynoŭniki vyšejšaha ranhu), jakaja była hadoŭ 18—20 tamu. Tamu aktyŭnaść ŭschodnich susiedziaŭ — heta sproba adnavić svaje zvužanyja mahčymaści. Što, viadoma, niepryjemna, patrabuje kantrolu i nazirańnia. Ale samo pa sabie pahrozaj nie źjaŭlajecca. Mianie asabista turbujuć try momanty.
1. U rehijonach na ŭzroŭni rajonnaha načalstva naohuł słaba razumiejuć palityku centralnych uładaŭ: my ŭžo za rynak ci jašče budujem rynkavy sacyjalizm? Zachad užo siabar ci jašče vorah? Ci možna praklinać ZŠA albo lepiej nie treba? I jakija ŭ nas naohuł adnosiny z Rasijaj? Pačućcio peŭnaj desinchranizacyi Minska i rehijonaŭ. I razhublenaść miascovych kvazielit u palityčnych pytańniach. Va ŭmovach adsutnaści vyraznych i jasnych instrukcyj ź Minska i tradycyjnaha niežadańnie čynoŭnikaŭ brać na siabie adkaznaść za palityčnyja pytańni, na miescach u asnoŭnym pa zvyčcy hladziać u bok Maskvy.
2. Abjektyŭna, samy papularny palityk u Biełarusi — Pucin. Ja b skazaŭ tak: 60% simpatyzantaŭ va Uładzimira Uładzimiraviča Pucina i pracentaŭ dvaccać — u Łukašenki. Heta nie značyć aŭtamatyčnaj hatoŭnaści ŭlicca ŭ RF. Ale heta daje Kramlu vydatnuju mahčymaść, abapirajučysia na papularnaść Pucina, upłyvać na ŭnutranuju palityku ŭ Biełarusi. U tym liku i z dapamohaj stvareńnia alternatyŭnaj Łukašenku palityčnaj fihury.
3. Rasiejskija hrošy, niachaj nievialikija, ale ŭžo pajšli ŭ biełpalityku. Pakul možna kazać, što ŭłady sprabujuć asiadłać situacyju, «padkłaŭšy» pad ruskich svaich murziłak. Vidavočnaja tradycyjnaja dla našych uładaŭ taktyka manipulacyj i kantrolu. Prablema ŭ tym, što hetyja murziłki z časam mohuć uzmacnicca nastolki, što pavierać u svaju zdolnaść zhulać va ŭłasnuju palityčnuju hulniu. Z aporaj na Maskvu. Na fonie źnižeńnia efiektyŭnaści sistemy dziaržkiravańnia ŭ cełym heta stvoryć prablemy. Časam usio ž žorstka spyniać niejkija rečy — bolš racyjanalna, čym sprabavać ich kantralavać.
Kamientary