1. Što zdaryłasia?
Nabližajecca leta, i mnohija dumajuć pra toje, kab nabyć sabie rovar. Kramy prapanujuć bahaty vybar madelaŭ roznych cenavych katehoryj — u hetym, mabyć, i jość hałoŭnaja ciažkaść dla patencyjnaha pakupnika. Niapravilna abrany rovar nie pryniasie zadavalnieńnia ad jazdy i navat moža naškodzić zdaroŭju. Nižej my razam z rovarnym kłubam «Minsk» raskažam, jak vybrać viełasipied dla horada i nie pamylicca.
2. Z čaho pačać?
Vyznačyciesia, dla čaho vy budziecie vykarystoŭvać pakupku. Haradskomu žycharu rovar patrebny ŭ asnoŭnym dla pajezdak na pracu, vučobu abo dla viełašpacyraŭ.
Kali vy nie źbirajeciesia miasić brud i załazić u samuju biezdaraž, to haradski rovar — toje, što treba.
3. Čym haradski rovar adroźnivajecca ad hornaha?
Najpierš tym, što haradski stvorany śpiecyjalna dla pajezdak va ŭmovach horada. U im praduhledžanyja zručnaja pasadka i ŭsie nieabchodnyja prymočki dla kamfortnaj i biaśpiečnaj jazdy: padnožka, katafoty i lichtary, ščytki i kažuch, jaki nie dazvolić łancuhu zažavać adzieńnie.
Hornyja rovary bolš univiersalnyja, čym ich haradskija sabraty. Jany majuć mocnuju amartyzacyjnuju viłku i «zubastuju» humu, jakija dazvalajuć lohka spraŭlacca ź niaroŭnaściami darožnaha reljefu, ale davoli mocna źnižajuć chutkaść ruchu. Spartyŭnaja pasadka pavyšaje manieŭranaść, ale razam z tym pavialičvaje nahruzku na ruki i šyju, što moža zaminać kamfortnamu viełašpacyru.
4. Jak zvuzić koła pošukaŭ?
Kali vy vyznačylisia, dla čaho budziecie vykarystoŭvać rovar, varta źviarnuć uvahu jašče na niekalki kryteraŭ:
- biudžet
- nadziejnaść
- pamiery i vaha
Uličvajcie, što kali vy ekanomicie na rovary, to vy ekanomicie taksama na zdaroŭi i biaśpiecy. Pavyšajecca imaviernaść taho, što ŭžo ŭ pieršyja miesiacy paśla pakupki daviadziecca źviarnucca ŭ ramont.
Pry padbory pamieraŭ pamiatajcie, što ad vierchniaj truby ramy da pachvinnaj vobłaści musić zastavacca jak minimum 10 santymietraŭ, a naha padčas pajezdki pavinna całkam razhinacca ŭ sustavie.
U internecie možna znajści tablicy adpaviednaści rostu i pamieru ramy, ale jany, jak praviła, majuć rekamiendacyjny charaktar. Lepš za ŭsio, pierš čym kupić rovar, zładzić test-drajv, kab vyznačycca z madellu i pamierami.
Što tyčycca vahi, to pry inšych roŭnych lepš vybirać madel, jakaja važyć mienš.
5. Na što jašče treba źviarnuć uvahu?
Na kolkaść chutkaściaŭ. Jany rehulujuć vysiłki na kručeńnie piedalaŭ i, adpaviedna, na chutkaść jazdy.
Kali vy raźličvajecie jeździć chutka abo pieraadolvać uzdymy, to varta pryhladziecca da madelaŭ ź vialikaj kolkaściu chutkaściaŭ. Choć u haradskich umovach całkam možna abyścisia rovaram bieź pieraklučalnika chutkaściaŭ.
U haradskich rovaraŭ, jak praviła, vialikija koły. Što tyčycca tarmazoŭ, to jany byvajuć abadnyja, rolernyja, dyskavyja i barabannyja. Pieršyja try typy kirujucca ŭručnuju z dapamohaj ryčahoŭ na styrnie, a barabannyja — nahami, pavarotam piedalaŭ nazad.
Vybar tarmaznoj sistemy zaležyć ad biudžetu, stylu jazdy, a taksama ad darožnych umoŭ, u jakich budzie vykarystoŭvacca rovar.
6. A kali ŭ horadzie raźbityja darohi?
Kali z darohami biada, to možna abrać hetak zvany hibryd. Takija rovary spałučajuć u sabie jak pieravahi hornych i haradskich madelaŭ, tak i ich niedachopy. Rovary-hibrydy adroźnivajucca ad hornych vialikimi niešyrokimi kołami i bolš kamfortnaj pasadkaj, ale pry hetym u ich jość amartyzacyjnyja viłki i pieraklučalniki chutkaściaŭ.
Hibryd nie taki chutki, jak haradski rovar, ale ŭ horadzie vysokaja chutkaść moža być niebiaśpiečnaj.
7. Jakija jašče jość rovary?
Akramia haradskich i hornych, možna vyłučyć jašče niekalki typaŭ rovaraŭ, jakija całkam pasujuć dla haradskoha žychara.
Kruiziory i viełačopiery stvorany dla maksimalnaha kamfortu. Jany abstalavanyja šyrokim styrnom, zručnym miakkim siadzieńniem na pružynach. Padčas niaśpiešnych viełašpacyraŭ pa parkach, plažach, haradskich vulicach jany pryniasuć maksimalnaje zadavalnieńnie.
Dla bolš chutkich pajezdak padyduć šašejnyja madeli, sinhłśpidy (rovary z adnoj chutkaściu) i fiksy (rovary ź fiksavanaj pieradačaj). Minimalistyčnaja kanstrukcyja takich rovaraŭ dazvalaje źnizić vahu i źvieści ryzyki pałomki da nula. Adnak varta ŭličvać, što šašejnyja rovary zvyčajna vielmi darahija.
Kali ŭ vas zusim mała miesca dla zachoŭvańnia rovara, to možna kupić składnuju madel. Jaho možna lohka pravieźci ŭ mietro, elektryčcy abo bahažniku mašyny, a doma schavać u šafu. Adnak składnyja rovary amal niemahčyma vykarystoŭvać dzieści jašče, akramia jak padčas haradskich pajezdak, bo jany bolš pavolnyja i da taho ž, jak praviła, daražejšyja za zvyčajnyja madeli.
Jość jašče i elektryčnyja rovary, abstalavanyja elektryčnym pryvadam, za košt jakoha častkova abo całkam adbyvajecca ruch. Dla tych, kamu ciažka pieraadolvać uzdymy abo dalokuju darohu, — najlepšy vybar.
8. Dzie možna jeździć na rovary?
Ruch na viełasipiedach u Biełarusi rehulujecca raździełam 20 praviłaŭ darožnaha ruchu. Zhodna ź im, ruch pa prajeznaj častcy dapuskajecca tolki ŭ vypadku adsutnaści viełasipiednaj darožki, abočyny abo piešachodnaj darožki. I toje nie dalej za 1 mietr ad pravaha kraju prajeznaj častki.
Dla ruchu ŭ ciomny čas sutak rovar pavinien być abstalavany faraj ź biełym śviatłom śpieradu, i z čyrvonym śviatłom — zzadu. Pry pierasiačeńni prajeznaj častki pa piešachodnym pierachodzie ŭ bolšaści vypadkaŭ viełasipiedystu daviadziecca časova stać piešachodam i pravieści rovar pobač z saboj.
Što tyčycca dziaciej, to jeździć pa darohach biez supravadžeńnia darosłych možna tolki z 14 hadoŭ.
Artykuł padrychtavany razam z rovarnym kłubam «Minsk».
Kamientary