Fake Pope — «Falšyvy Papa»: novaja kniha italjanskich žurnalistaŭ
25 maja vyjšła ŭ śviet kniha, napisanaja italjanskimi žurnalistami Nello Skava i Raberto Berettaj, u jakoj sabranyja ŭsie fejki — falšyvyja źviestki pra asobu papy Franciška i jaho vykazvańni, jakija źjaŭlalisia ŭ ŚMI.
Pra falšyvyja naviny ŭžo napisany cełyja tamy, u jakich — bieźlič paradaŭ adnosna taho, jak raspaznać i vykryć «kačak», što rehularna źjaŭlajucca ŭ infarmacyjnaj prastory. Ale da hetaha času jašče nichto nie pisaŭ pra falšyvyja naviny, jakija datyčacca asoby i vykazvańniaŭ Śviatoha Ajca. U apošni čas takich «navinaŭ» źjaŭlajecca davoli šmat, i jany časta vyklikajuć šyroki rezanans i abmierkavańnie va ŭsim śviecie. Hetamu spryjajuć sacyjalnyja sietki i suśvietnaje pavucińnie, jakija stvarajuć biesprecedentnyja mahčymaści dla ich raspaŭsiudu.
Nello Skava, adzin z suaŭtaraŭ knihi, kaža: «Takaja ideja źjaviłasia paru hadoŭ tamu, paśla taho, jak u śviet vyjšła kniha «Vorahi Franciška», dzie rasśledavałasia, ź jakim supracivam i ź jakimi pieraškodami sutykajecca Papa.
U ciapierašniaj pracy my, naadvarot, chacieli vykryć chłuśniu, jakaja niepasredna datyčycca Papy Berholjo i napaŭniaje sieciva i inšyja srodki kamunikacyi».
Žurnalist tłumačyć, što kniha pryznačana nie tolki dla insajderaŭ, a dastupnaja ŭsim. Aŭtary knihi vybrali kala 80 asnoŭnych abvinavačvańniaŭ u adras papy Franciška i praviali surjoznuju pracu pa ich raźviančańni.
«My vybrali naviny, jakija nam zdavalisia najbolš cikavymi, pačynajučy z času arhientynskaj dyktatury i da našych dzion. My brali ich adnu za adnoj i praviarali, pryvodziačy abviaržeńnie i vykryćcio.
Narešcie, my šukali łahičnuju suviaź pamiž źviestkami, i vyjavili, što niekatoryja «kački» źjaŭlajucca spantanna, a niekatoryja, naadvarot, źjaŭlajucca plonam dobra spłanavanych namieraŭ dyskredytavać Pantyfika»,— padkreśliŭ adzin z suaŭtaraŭ knihi Nello Skava.
Ciapier čytajuć
Cichanoŭski na mitynhu ŭ Varšavie: Ja złamaju hety režym VIDEA4
Kamientary