Daradca pieršaha namieśnika hienieralnaha dyrektara kancerna «Radyjoelektronnyja technałohii» (KRET) Uładzimir Michiejeŭ zajaviŭ, što praz try hady Rasija stvoryć novyja kompleksy radyjoelektronnaj baraćby (REB) z dapamohaj infarmacyi, atrymanaj pry daśledavańni amierykanskich kryłatych rakiet «Tamahaŭk», jakija byli vyviezieny rasijskim Ministerstvam abarony paśla avijacyjnaha ŭdaru pa Siryi z boku zachodniaj kaalicyi, pieradaje RIA «Novosti».
«Viadoma, na asnovie hetaha vopytu [udaru pa Siryi] ciapier rychtujucca techničnyja zadańni na novyja raboty, u ramkach jakich my ŭžo z ulikam usioj atrymanaj infarmacyi budziem budavać ŭzory našaj novaj techniki elektronnaj vajny», — skazaŭ kiraŭnik kancerna.
Pa słovach Michiejeva, zadača — zrabić tak, kab rasijskaja technika pierakryvała ŭsie častotnyja dyjapazony, jakija byli vyjaŭlenyja ŭ amierykanskich rakietach. Jon udakładniŭ, što poŭny cykł rabot pa sistemach REB zojmie kala dvuch-troch hadoŭ. «Nam, u pieršuju čarhu jak śpiecyjalistam, vielmi cikava nazirać za realnym prymianieńniem roznaj bajavoj techniki ŭ Siryi, u tym liku za «Tamahaŭkam». Majučy ž hetuju rakietu ŭ rukach, my dakładna razumiejem, jakija jana maje kanały suviazi, pieradačy infarmacyi i kiravańnia, navihacyi i łakacyi», — rastłumačyŭ Michiejeŭ.
14 krasavika ZŠA, Vialikabrytanija i Francyja nanieśli avijaŭdary pa Siryi. Kaalicyja vypuściła bolš za sto rakiet pa abjektach, na jakich, jak mierkavali ŭ zachodnich krainach, znachodzilisia łabaratoryi pa vytvorčaści chimičnaj zbroi. ZŠA i inšyja krainy abvinavacili prezidenta Siryi Bašara Asada va ŭžyvańni chimzbroi ŭ siryjskim horadzie Duma.
Kamientary