Karejskaja kaśmietyka znachodzić usio bolš prychilnikaŭ pa ŭsim śviecie. Što ź jaje nabyvać u Biełarusi?

Paŭdniovaja Kareja — kraina z samym vysokim spažyvańniem kaśmietyčnych srodkaŭ na čałavieka ŭ śviecie, dzie fanatyčna dahladajuć siabie i farbujucca ŭ tym liku mužčyny.

Praz ščylnaść nasielnictva ŭ karejskim hramadstvie vielmi vysokaja kankurencyja: ličycca, što paśpiachovy čałaviek pavinien być pryhožym. Školnikam mohuć padaryć płastyčnuju apieracyju, a pry pryjomie na lubuju pracu abaviazkova vyvučajuć fatahrafii kandydata. Karaciej, karejcy staranna sočać za saboj, i tamu kankurencyja na rynku vielmi vysokaja.

Što pa fakcie ad hetaha majem my? Vydatnuju jakaść za adekvatnyja hrošy. Pryčym, pa vodhukach, jakaść karejskaha mas-markieta ci siaredniaha siehmienta srodkaŭ pa dohladzie niaredka lepšaja za jeŭrapiejski luks.

Naša aŭtarka karystajecca karejskaj kaśmietykaj užo 6 hod i źviartaje vašu ŭvahu na najlepšyja pradukty z Karei, jakija možna biez prablem nabyć u Biełarusi, nie robiačy zakazy z-za miažy.

Kali vy jašče nie znajomyja sa śvietam hetaj kaśmietyki, to vielmi važna pačać z dobraha praduktu, inakš pieršaje ŭražańnie budzie sapsavanaje nadoŭha.

Ačyščeńnie. Hidrafilnyja alei i pienki

Pavialičyć

Karejskaja sistema dohladu praduhledžvaje dvuchetapnaje ačyščeńnie: spačatku vy zdymajecie makijaž hidrafilnym alejem, jaki rastvaraje ŭsiu «farbu», paśla reštki aleju zmyvajucca pienkaj.

Hidrafilnymi jašče byvajuć balzamy, jany adroźnivajucca tolki tym, što ćviordyja, ale pracujuć hetaksama.

Źviarnicie ŭvahu na sieryju Missha ź niejtralnym PH 5.5 — srodki nie parušajuć achoŭny słoj skury, a značyć, na joj budzie mienš zapaleńniaŭ i razdražnieńniaŭ. Pienki dobryja ŭ brendaŭ The Saem, Tony Moly, Missha, i ŭ pryncypie ŭsie jany prykładna adnolkavyja.

Tanizavańnie i pieršasny dohlad. Toniery, esencyi i emulsii

Pavialičyć

Tonier padobny na jeŭrapiejski tonik, adnak u azijackaj sistemie vykarystoŭvajecca adrazu paśla ŭmyvańnia. Jaho zadača — uvilhatnić skuru i padrychtavać da naniasieńnia inšaj kaśmietyki. Pa kansistencyi — vadkaje myła abo jak lohki hiel.

Kali dobra padabrać tonier, to ŭletku možna karystacca tolki im. Dobry varyjant dla ŭsich typaŭ skury ŭ kampanii The Saem z novaziełandskim ilnom Harakeke — uvilhatnieńnie ad jaho vielmi mocnaje.

Dobrym vybaram dla tłustaj abo kambinavanaj skury budzie Secret Key Hyaluron Soft Micro-Peel Toner: u im spałučajecca hijałuronavaja kisłata, jakaja dobra ŭvilhatniaje, i kisłoty, što abnaŭlajuć, robiać skuru miakčejšaj, čyściać ad čornych kropak i pazbaŭlajuć ad zakuporki por. Abjom ažno 500 mł, tamu banki chopić nadoŭha. Adnak abaviazkova vykarystoŭvać hety srodak razam z kremam z SPF! Naohuł, kancentracyja kisłot u chatnich srodkach nievialikaja, ale lepš pierastrachavacca. Kali ŭ vas niama kremu z abaronaj ad sonca, nanosić taki tonier možna tolki na noč.

Esencyja — heta praktyčna toje ž samaje, što i tonier, adnak heta pradukt, jaki ŭvilhatniaje jašče hłybiej. Niadaŭna viadomaja internet-krama pryviezła ślimakovuju esencyju COSRX (možacie pahuhlić i znojdziecie): u jaje efiektyŭny, łakaničny i ekanomny skład. Ślimak u składzie ŭvilhatniaje, zahojvaje i rehienieruje skuru. Padychodzić dla ŭsich uzrostaŭ.

Emulsii časta iduć druhim etapam u karejskim dohladzie (paśla toniera abo esencyi). Pa kansistencyi padobnyja na vadki krem. Jany pavinny bolš hłyboka ŭvilhatniać i siłkavać skuru. Jak užo kazałasia vyšej, pry dobrym padbory srodkaŭ letam možna abyścisia adnym tonieram. A voś vosieńniu, zimoj i viasnoj emulsija nie budzie lišniaj.

Lepš nabyvać srodki z adnoj sieryi: tonier i emulsija ŭ pary pracujuć bolš efiektyŭna. I ich dastatkova, kab zabiaśpiečyć bazavy dohlad skury.

Dobryja emulsii, jakija možna biez prablem znajści ŭ nas: The Saem Urban Eco Harakeke Emulsion, Missha Super Aqua Ice Tear Emulsion.

Kremy

Pavialičyć

U jeŭrapiejskaj kaśmietałohii krem vyrašaje ŭsie prablemy. Adnak u karejcaŭ krem vykarystoŭvajecca na zaviaršalnym etapie, kab zakryć, zapiačatać na skury toje, što było naniesienaje da hetaha. Možna brać z toj ža liniejki, što i tonier-esencyja, a možna asobny.

Na luby siezon dobrym budzie ślimakovy krem Mizon, jaki staŭ biestsieleram pa ŭsim śviecie. Jon uvilhatniaje, zahojvaje, pieraškadžaje ŭźniknieńniu i pahłybleńniu marščyn. Lepš brać u płastykavaj tubie: tak atrymlivajecca tańniej.

Uzimku ŭładalnikam usich typaŭ skury rekamiendavany The Saem Urban eco Harakeke Root cream. A dla tych, kamu nadakučyli ślimaki ad Mizon i chočacca ekśpierymientaŭ, možna pasprabavać ślimakovy hiel ad COSRX.

Maski

Pavialičyć

Maski — heta dobry dadatak da luboha dohladu. Siońnia vielmi papularnymi stali tkankavyja. Uvohule, karejskija maski kłasnyja amal usie (akramia tych, što kaštujuć pa 2 rubli i pradajucca ŭ supiermarkietach). Biarycie pradukcyju viadomych brendaŭ: Tony Moly, Missha, The Saem, Steblanc.

Standartnyja maski ŭ bankach taksama nichto nie admianiaŭ. Tony Moly Tomatox Magic White Massage Pack miakka ačyščaje i krychu siłkuje skuru, aśviatlaje čornyja kropki. Missha Dustless Bubble pack to foam — heta aryhinalnaja hlinianaja maska, jakaja nanosicca jak zvyčajnaja, paśla čaho pienicca na tvary i hłyboka čyścić pory. Taksama ŭ brenda Missha jość bolš kłasičnaja maska z vułkaničnaj hlinaj, jakaja vydatna spravicca z ačyščeńniem i pry hetym nie pierasušyć skuru.

Dadatkovy dohlad

Pavialičyć

Siudy možna adnieści syvaratki (jany ž sierumy), ampuły, kropkavyja srodki. Jany, jak praviła, nakiravanyja na vyrašeńnie kankretnych prablem: robiać skuru bolš śviežaj, supakojvajuć, zahojvajuć, zmahajucca sa zmorščynami. Słoički ź imi nievialikija pa pamiery, značna daražejšyja, čym astatnija srodki. Ale ŭ štodzionnym dohladzie jany nie abaviazkovyja.

Monabrendavaja krama ŭ Minsku pakul jość tolki ŭ adnaho brenda — Missha. Usio astatniaje treba šukać albo ŭ kramach karejskaj kaśmietyki, albo na palicach niekatorych sietak.

Kali kazać pra jarki pakunak, to samy viadomy ŭ Biełarusi brend — heta Tony Moly. Jon źjaviŭsia ŭ nas adnym ź pieršych, ale za jarkimi abhortkami vielmi časta chavajecca siaredniaja jakaść. Raju brać tolki tamatavuju aśviatlalnuju masažnuju masku. Možna pasprabavać i tkankavyja maski. A voś ściki pad vočy i zacirki dla por nie efiektyŭnyja.

• 0
• 0
• 0
• 0
• 0
• 0
• 0
• 0