«Dom cikaŭnych kazak»: vychodzić novaja kniha dla dziaciej ź niezvyčajnymi ilustracyjami
Vydaviectva «Halijafy» raspačało kraŭdfandynhavuju kampaniju pa zbory srodkaŭ na vydańnie knihi «Dom cikaŭnych kazak» Nadziei Jaśminskaj. Za 5 dzion prajekt sabraŭ 60% ad nieabchodnaj sumy.
Kniha składajecca z 10 historyj, dziei jakich adbyvajucca ŭ sučasnym śviecie. Tamu dzieci mohuć paznać u maleńkich hierojach siabie. Kazki davoli jomistyja i karotkija - toje, što treba dla čytańnia nanač i ŭtulnych viačorak z knihaj.
«Da kožnaj kazki prykładajecca tak zvanaja «dumačka» - heta mudraja dumka, što pryjšła hieroju paśla sustrečy ź dzivam. U knižcy niama pavučańnia ci marali, ale jość tablička z takoj «dumačkaj», jakaja visić na kožnych dźviarach. Pry žadańni baćki mohuć abmierkavać ź dziećmi hetuju dumku, pravieści paraleli z realnym žyćciom. I tady kožnaja kazka stanie dla dziaciej nie prosta maleńkaj pryhodaj - jana pakinie hłybiejšy śled», - kaža Nadzieja Jaśminska, aŭtarka knihi.
Dla taho kab prailustravać hetuju knihu, mastačka Alena Sacuta vyrazała i skleiła 1600 papiarovych detalaŭ!
«Usie ilustracyi skrupulozna zrobleny z papiery ŭručnuju - u majoj aŭtarskaj technicy papiarovaha kałažu. Takaja technika ilustracyj vielmi dakładna pieradaje «dziciačaść», ciapło i dabryniu kazak. Praces stvareńnia ilustracyj pracajomki, i tamu dla mianie vielmi značna ilustravać toje, što mnie da dušy i maje važny hłyboki sens. Nadzieiny kazki z mudrymi dumkami dla dziaciej prasiaknuty luboŭju i dobrym staŭleńniem da navakolla - idealny materyjał dla mianie jak dla tvorcy», - raspaviadaje Alena.
Kali raspačałasia kampanija, šmat chto źviarnuŭ uvahu na niezvyčajnuju nazvu knihi. Voś jak tłumačyć jaje aŭtarka Nadzieja: «U hetaj knižcy kazki - niby žyvyja istoty. I mienavita z-za ich cikaŭnaści i adbylisia ŭsie historyi. U čaroŭnych kazak niama karanioŭ - u ich jość kryły. Jany lotajuć pa śviecie, niabačnyja dla ŭsich. Siadajuć na śpinu vietru, ślizhočuć pa viasiołcy, abhaniajuć chmary. I kali kazka vypadkova dakraniecca da čałavieka, ź im adbyvajecca niešta niezvyčajnaje…»
Nadzieja Jasminska - piśmieńnica, łaŭreatka Premii Ciotki 2016 hoda za knihu «Siem ružaŭ», najlepšaja dziciačaja aŭtarka - 2017 pa vybary minskich biblijatek.
Alena Sacuta - mastačka i dyzajnierka, pracuje ŭ aŭtarskaj technicy papiarovaha kałažu.
«Halijafy» — niezaležnaje vydaviectva, jakoje śpiecyjalizujucca na vydańni mastackaj litaratury sučasnych biełaruskich aŭtaraŭ, dziciačych knih na biełaruskaj movie, knih pa mastactvie, knih, jakija daśledujuć z roznych bakoŭ sučasnuju Biełaruś.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1414
Kamientary