Aŭstryja vyšle z krainy niekalkich imamaŭ, jakija atrymlivajuć finansavańnie z-za miažy, i zakryje siem miačeciaŭ, jakija ličacca miescam raspaŭsiudžvańnia «palityčnaha isłamizmu». Pra heta abviaściŭ aŭstryjski kancler Kurc, paviedamlaje Kurier.
Zakryćcio zakranie ŭstanovy i miačeci sałafitaŭ, jakich padtrymlivaje sajuz ATIB. Aficyjna heta «Turecka-isłamski sajuz kulturnaha i sacyjalnaha supracoŭnictva ŭ Aŭstryi». Sajuz abjadnoŭvaje bolš za 60 supołak i kala 100 000 čałaviek.
Aŭstryjskija ŭłady abvinavačvajuć ATIB u raspaŭsiudzie tureckaha nacyjanalizmu. U pryvatnaści, budzie zakryta tak zvanaja miačeć «Šerych vaŭkoŭ» u Vienie, a taksama budzie raspuščanaja ŭsia relihijnaja arabskaja abščyna. Kurc paviedamiŭ, što hetyja kroki ciesna ŭzhodnieny ź Isłamskaj relihijnaj abščynaj Aŭstryi.
Ministr unutranych spraŭ Hierbiert Kikła zajaviŭ, što vyhnańnie imamaŭ, źviazanych z ATIB, robicca na padstavie zakona ab zabaronie na zamiežnaje finansavańnie.
Pad dziejańnie zakona ŭ cełym mohuć patrapić kala 60 imamaŭ i členy ich siemjaŭ, tamu Aŭstryja moža nie padoŭžyć prava na žycharstva ŭ cełym dla 150 čałaviek.
Kamientary