«Pakazać, chto ŭ Biełarusi haspadar»: ekśpierty raskazali, z kim źviazvajuć uzłomy tvitara Ryžankova i FB Śledčaha kamiteta

Za dva dni adbylisia dźvie kibierataki: u paniadziełak niechta atrymaŭ kantrol nad tvitar-akaŭntam namieśnika kiraŭnika Administracyi prezidenta Maksima Ryžankova, u aŭtorak byŭ uzłamany akaŭnt Śledčaha kamiteta ŭ fejsbuku. 

Źmiest apublikavanych ad imia ŭładalnikaŭ paviedamleńniaŭ davoli śpiecyfičny: to «Kačanava vybačajecca pierad Rasijaj», to Śledčy kamitet niešta robić «zhodna z pažadańniami rasijskaha boku».

«Našaj Niva» spytała ŭ ekśpiertaŭ u śfiery kibierbiaśpieki, chto b moh stajać za hetymi atakami. 

Adzin z pryznanych śpiecyjalistaŭ-praktykaŭ skazaŭ «Našaj Nivie», što heta vyhadna achvotnym «pakazać, chto ŭ Biełarusi haspadar». 

«Našyja adpaviednyja struktury psichałahična nie hatovy da taho, što my možam być uciahnutyja ŭ isnyja infarmacyjnyja vojny. I navat da tych vypadkaŭ, kali pryjomy infarmacyjnaj vajny, skiravanaj nie na nas, mohuć być vykarystany suprać nas asobnymi jaje ŭdzielnikami ŭ svaich asabistych metach. Chacia, ja padkreślu, kampietentnyja śpiecyjalisty ŭ hetaj śfiery ŭ nas jość. Čamu ŭzłamali Ryžankova i SK? Ja b nie vyklučaŭ, što ŭzłamanyja akaŭnty KDB i ŭmoŭnaha Kałtoviča, i zaŭtra niešta źjavicca i tam. Taksama patłumaču, čamu viartańnie kantrolu za akaŭntam — heta doŭhi praces, kali zavałodvańnie adbyłosia praz uzłom elektronnaj skryni, siervier jakoj znachodzicca za miežami krainy, to spačatku treba adnavić kantrol nad poštaj, što taksama patrabuje času», — skazaŭ čałaviek, paprasiŭšy nie nazyvać svajo imia.

Jon nahadaŭ pra dakład FBR, zhodna ź jakim rasijskija chakiery zarazili roŭtary ŭ 50 krainach śvietu. 

Vajskovy ekśpiert Alaksandr Alesin naŭprost kaža, što za hetymi ŭzłomami stajać rasijanie. 

«Viadoma, što Rasija daŭno viadzie suprać Biełarusi infarmacyjnuju vajnu rukami druhasnych žurnalistaŭ. Robicca heta prosta: na niejkim marhinalnym resursie źjaŭlajecca niejkaja infarmacyja, paśla čaho jaje pieradrukoŭvajuć asnoŭnyja ŚMI. I hetyja ŭzłomy — padziei z taho ž šerahu. Heta nienaviaźlivaje papiaredžańnie, što Maskva niečym niezadavolenaja», — kaža Alesin.

«Akaŭnty Ryžankova i Śledčaha kamiteta abrali tamu, najchutčej, bo jany byli kiepska abaronienyja. Ryžankoŭ ža z 2016 hoda nie karystaŭsia im. Ale ja tut baču i stanoŭčy bok — budzie ŭzmocnieny padychod da kibierabarony, mahčyma, padymucca biudžety pad hetuju spravu». 

Analityk Arsień Sivicki taksama bačyć u spravie rasijski śled. 

«Varta zhadać nie tolki ŭzłomy akaŭntaŭ, ale i aktyvizacyju kramloŭskich botaŭ u sacsietkach, jakija pačali masavuju krytyku Biełarusi. Heta takaja demanstracyja mahčymaściej Rasii pa ŭmiašalnictvie va ŭnutranyja spravy Biełarusi. Elemienty infarmacyjnaj vajny vykarystoŭvajucca, kab pakazać, što Biełaruś całkam dasiahalnaja i ŭraźlivaja dla kibieratak Kramla. A vybar akaŭntaŭ ja b tłumačyŭ prosta — heta tyja akaŭnty, jakija zmahli ŭzłamać», — skazaŭ Sivicki. 

• 0
• 0
• 0
• 0
• 0
• 0
• 0
• 0