Valancin Taras: «Stałasia tak u našaj historyi, što Dziady zrabilisia nacyjanalnym śviatam. Choć heta śviata daŭniaje, i naš narod jaho adznačaŭ ad vieku spradvieku, ale ŭ najnoŭšy čas tak paviarnułasia, što heta bolš čym paminańnie dziadoŭ. Heta nacyjanalnaje śviata, ź jakim źviazana i našyja mary ab niezaležnaści dziaržaŭnaj, i ab losie našaj movy, i naahuł z usioj biełaruščynaj, z usim tym, što my ŭkładvajem u hety paniatak. Takim dniom zrabilisia Dziady.
U tyja słavutyja Dziady 1988-ha, kali ŭpieršyniu «čaromchu» prymianili, kali było samaje pieršaje vialikaje šeście, ja akurat u hety dzień viarnuŭsia z domu tvorčaści, ź Picundy. Jechali my z žonkaj z aeraportu na taksi i ŭbačyli hetaje šeście. Ja tady žyŭ u rajonie Zialonaha Łuhu, na vulicy Kalinoŭskaha. Ja zrazumieŭ adrazu, u čym sprava, skazaŭ žoncy — jaždžaj adna dachaty, vyskačyŭ z taksoŭki i dałučyŭsia da hetaha šeścia. Dla mianie heta vyjšła, «z karabla na bal»...
Dla mianie asabista Dziady źviazanyja jašče i z Vasilom. Vasilom Uładzimiravičam Bykavym. Sioleta ŭžo piać hadoŭ jaho z nami niama. Jon siarod tych dziadoŭ, pamiać jakich my šanujem, jakoj my kłaniajemsia da ziamli i čarku padymajem. Voś, siarod hetych dziadoŭ ciapier i Vasil Uładzimiravič Bykaŭ».
* * *
Valancin Taras — partyzan, litaratar, siabar Vasila Bykava.
