Patrabavańni Jeŭrazijskaj ekanamičnaj kamisii (JEEK) pa pavyšeńni łakalizacyi ŭ aŭtamabilnaj pramysłovaści da 50% mohuć z 1 lipienia rezka ŭskładnić pastaŭki aŭtamabilaŭ rasijskaj zborki ŭ krainy Mytnaha sajuza (MS). Heta nie zakranie tolki KamAZa, jaki zmoh uvajści ŭ rejestr JEEK pa łakalizacyi.
Pavodle krynic «Kommiersanta», adsutnaść u rejestry astatnich rasijskich aŭtakancernaŭ u pieršuju čarhu źviazana z kanfliktam pamiž Maskvoj i Minskam.
Pa rašeńni JEAES, z 1 lipienia 2018 hoda dla svabodnaha abarotu aŭtamabilaŭ na terytoryjach dziaržaŭ-siabraŭ Mytnaha sajuza musić vykonvacca ŭmova łakalizacyi vytvorčaści ad 50%.
U rejestry Jeŭrazijskaj ekanamičnaj kamisii (JEEK) pa łakalizacyi niekalki dziasiatkaŭ madelej, ale havorka idzie ŭsiaho pra niekalki placovak, pieravažna ŭ Kazachstanie. Uklučany tolki adzin rasijski aŭtakancern KamAZ, adzin biełaruski — MAZ i šeść kazachstanskich. Inšych rasijskich vytvorčych placovak, u tym liku pabudavanych zamiežnymi kampanijami, u rejestry niama.
Surazmoŭca «Kommiersanta» nahadvaje, što pieršapačatkova normy pa łakalizacyi byli inicyjavanyja Rasijaj dla abarony svajho rynku ad «kitajskaj adviortkavaj zborki na zavodzie «BiełDžy» u Biełarusi». Pavodle jaho słoŭ, rasijskija vytvorcy, akramia KamAZa, nie ŭvajšli ŭ rejestr praz roznahałośsi mienavita pamiž Maskvoj i Minskam: «Padčas pravierki biełaruskaja delehacyja nie paćvierdziła adpaviednaść uzroŭniu łakalizacyi navat u AŭtaVAZa».
