Коммерсант: Праз рознагалоссі Масквы і Мінска Расія не можа пастаўляць свае машыны ў краіны Мытнага саюза
Патрабаванні Еўразійскай эканамічнай камісіі (ЕЭК) па павышэнні лакалізацыі ў аўтамабільнай прамысловасці да 50% могуць з 1 ліпеня рэзка ўскладніць пастаўкі аўтамабіляў расійскай зборкі ў краіны Мытнага саюза (МС). Гэта не закране толькі КамАЗа, які змог увайсці ў рэестр ЕЭК па лакалізацыі.
Паводле крыніц «Коммерсанта», адсутнасць у рэестры астатніх расійскіх аўтаканцэрнаў у першую чаргу звязана з канфліктам паміж Масквой і Мінскам.
Па рашэнні ЕАЭС, з 1 ліпеня 2018 года для свабоднага абароту аўтамабіляў на тэрыторыях дзяржаў-сябраў Мытнага саюза мусіць выконвацца ўмова лакалізацыі вытворчасці ад 50%.
У рэестры Еўразійскай эканамічнай камісіі (ЕЭК) па лакалізацыі некалькі дзясяткаў мадэлей, але гаворка ідзе ўсяго пра некалькі пляцовак, пераважна ў Казахстане. Уключаны толькі адзін расійскі аўтаканцэрн КамАЗ, адзін беларускі — МАЗ і шэсць казахстанскіх. Іншых расійскіх вытворчых пляцовак, у тым ліку пабудаваных замежнымі кампаніямі, у рэестры няма.
Суразмоўца «Коммерсанта» нагадвае, што першапачаткова нормы па лакалізацыі былі ініцыяваныя Расіяй для абароны свайго рынку ад «кітайскай адвёрткавай зборкі на заводзе «БелДжы» у Беларусі». Паводле яго слоў, расійскія вытворцы, акрамя КамАЗа, не ўвайшлі ў рэестр праз рознагалоссі менавіта паміж Масквой і Мінскам: «Падчас праверкі беларуская дэлегацыя не пацвердзіла адпаведнасць узроўню лакалізацыі нават у АўтаВАЗа».
Каментары