Japonka Cia Mijakie — najstarejšaja žycharka płaniety Ziamla — pamierła 22 lipienia ŭ Iakahamie va ŭzroście 117 hadoŭ, paviedamlaje sajt Guinness World Records!
Jana pamierła nieŭzabavie paśla taho, jak była pryznanaja najstarejšym čałaviekam płaniety. Jana naradziłasia 2 maja 1901 hoda i pražyła 117 hadoŭ i 81 dzień. Pa słovach členaŭ siamji, Cia lubiła razmaŭlać, jany nazvali jaje ciarplivym i dobrym čałaviekam, jaki prynosiŭ ščaście tym, chto jaje sustrakaŭ.
Zachapleńniem usiaho žyćcia dla Cia stała kalihrafija, jakuju jana pačała vyvučać u dziacinstvie. Jana praciahvała stvarać kalihrafičnyja pracy da niadaŭniaha času.
U knihi rekordaŭ Hinesa jość try katehoryi praciahłaści žyćcia: samy pažyły mužčyna, samaja pažyłaja žančyna i samy pažyły čałaviek, jaki žyvie ciapier.
Samym pažyłym mužčynam u krasaviku 2018 hoda arhanizacyja pryznała žychara japonskaha vostrava Chakajda Masadza Nanaka. Adpaviedny siertyfikat jon atrymaŭ va ŭzroście 112 hadoŭ i 259 dzion.
Kandydatury samaj pažyłoj žančyny i samaha pažyłoha čałavieka, jakija ciapier žyvuć, na siońnia nie paćvierdžanyja.
Absalutny rekord praciahłaści žyćcia naležyć francužancy Žanie-Łuizie Kalman, jakaja pamierła ŭ 1997 hodzie va ŭzroście 122 hadoŭ i 164 dzion.
Kamientary