Lohki RECEPT niezvyčajnaha chleba z cukini i parmiezanam
Dla mianie samyja praŭdzivyja ŭspaminy zaŭsiody źviazanyja z pachami. Niekatoryja słovy i padziei minułaha naš mozh moža padmianić, ale voś pachi ŭsprymajucca nami na padśviadomym ŭzroŭni, i padmianić ich nie tak lohka. Adnym z takich pachaŭ, jaki adrazu mianie pieranosić u dziacinstva, — heta vodar śviežaha chleba. Adrazu ŭzhadvajucca pachody z babulaj u kramu «Haračy chleb», a taksama ranicy ŭ vioscy majoj druhoj babuli. Na žal, haračy chleb užo redka traplajecca mnie ŭ kramach, i tamu časam ja sprabuju piačy chleb sama.
Praces vypiakańnia chleba — heta mahičnaja sprava, jakuju varta pasprabavać. I hałoŭnaje, isnuje takaja vialikaja kolkaść receptaŭ chleba, što kožny znojdzie taki varyjant, jaki pryjdziecca jamu daspadoby pa smaku.
Niekatoryja pužajucca, što praces moža zajmać bolš za dzień, ale nižej vy znojdziecie recept chleba, pryhatavańnie jakoha nie zajmaje šmat času. A jašče ŭ im vykarystoŭvajecca cukini, što nadaje vielmi cikavy prysmak.
Nam spatrebicca:
- 1 cukini (prykładna 200 h)
- 1/4 č. ł. soli
- 120 mł ciopłaj vady
- 1 st. ł. suchich draždžej
- 1 st. ł. soli
- 1/4 č. ł. čornaha piercu
- 1 jajka, pakajovaj tempieratury
- 380—450 h muki
Dla zmazvańnia:
- 1 jajka trochi ŭźbitaje z 1 st. ł. vady i drobkaj soli
- 2 st. ł. ciortaha parmiezanu ci sušanaje arehana
Režam cukini na kružki, pasypajem sollu i pakidajem na 15 chvilin. Prybirajem zališniuju vilhać papiarovym ručnikom. Robim z cukini piure.
Droždžy dadajom u vadu i pakidajem chvilin na 10.
Źmiešvajem piure z vadoj, draždžami, jajkam, sollu i piercam. Dadajom 300 hram muki i dobra miesim. Astatniuju muku dadajom patrochu, kolki voźmie ciesta — jano pavinna być hładkim i amal całkam adstavać ad ruk. Pierakładajem ciesta ŭ misku, jakuju zmazali alejem, i nakryvajem ručnikom. Pakidajem ciesta ŭ ciopłym miescy na 1 hadzinu.
Ciesta, što padniałosia, abminajem i dzielim na 3 častki. Kožnuju častku raskatvajem dałońniu ŭ žhut i robim placionku.
Nakryvajem placionku plonkaj i pakidajem jašče na 1 hadzinu (placionka vyraście amal u dva razy).
Zmazvajem buchanku sumieśsiu jajka i vady, pasypajem syram. Vypiakajem 30—35 chvilin pry 190 hradusach na pierhamiencie ci na blasie, jakuju zmazali alejem. Smačna jeści!
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?4
Kamientary