MZS Kyrhyzstana 28 lipienia vyklikaŭ časovaha pavieranaha ŭ spravach Respubliki Biełaruś u Kyrhyzstanie Siarhieja Ivanova. Pryčynaj stali publikacyi ŭ biełaruskich ŚMI ab adkryćci ZAT «Biełaruskaja nacyjanalnaja bijatechnałahičnaja karparacyja». Pra heta paviedamlaje zamiežnapalityčnaje viedamstva Kyrhyzstana.
Jak śćviardžaje kirhizski bok, dyrektar ZAT «Biełaruskaja nacyjanalnaja bijatechnałahičnaja karparacyja» Daniił Urycki — były premjer-ministr Kyrhyzstana Danijar Usienaŭ, prysudžany na radzimie da pažyćciovaha źniavoleńnia.
«Padčas sustrečy Kyrhyzstan pieradaŭ notu, u jakoj vykazvaje pratest znachodžańniu i ažyćciaŭleńniu dziejnaści na terytoryi Biełarusi asudžanaha ŭ Kyrhyzstanie na pažyćciovy termin Danijara Usienava, što źjaŭlajecca absalutna nieprymalnym», — havorycca ŭ paviedamleńni.
U MZS Kyrhyzstana sa škadavańniem adznačyli, što, niahledziačy na nacelenaść kirhizskaha boku ŭ apošnija hady na aktyvizacyju dvuchbakovaha kyrhyska-biełaruskaha supracoŭnictva pa ŭsich napramkach, uzajemny ŭdzieł u intehracyjnych abjadnańniach, takich jak SND, JEAES, ADKB, dalejšaja padtrymka aficyjnym Minskam dziejnaści asudžanych byłych vysokapastaŭlenych čynoŭnikaŭ Kyrhyzstana na terytoryi Biełarusi ŭ čarhovy raz nanosić škodu dvuchbakovym siabroŭskim adnosinam, vyklikaje niezadavolenaść z boku kirhizskaj hramadskaści, ranić pačućci rodnych i blizkich zahinułych i paciarpiełych padčas padziej 7 krasavika 2010 h. (tady zahinuli kala 90 čałaviek i kala 1500 atrymali ranieńni).
Kirhizski bok znoŭ zaklikaŭ ŭłady Biełarusi źmianić svoj padychod da dadzienaj situacyi i vykonvać pryniatyja na siabie mižnarodnyja abaviazacielstvy.
Danijar Usienaŭ paśla padziejaŭ 2010 hoda źbieh z krainy. Jon byŭ abvinavačany ŭ ciažkich złačynstvach i zavočna asudžany na pažyćciovy termin. Infarmacyja pra toje, što Danijar Usienaŭ pražyvaje ŭ Biełarusi pad imiem Daniiła Uryckaha, upieršyniu źjaviłasia ŭ biełaruskich ŚMI ŭ śniežni 2017 hoda.
Na adkryćci 27 lipienia ZAT «Biełaruskaja nacyjanalnaja bijatechnałahičnaja karparacyja» byŭ pradstaŭleny dyrektar pradpryjemstva — Daniił Urycki. Žurnalisty apaznali ŭ im byłoha premjer-ministra Kyrhyzstana Danijara Usienava, ale arhanizatary mierapryjemstva paviedamili, što dyrektar nie budzie heta kamientavać.
Karespandent vydańnia Naviny.by ŭsio ž pahavaryŭ z Daniiłam Uryckim. Na pytańnie, ci źjaŭlajecca jon na samaj spravie byłym premjer-ministram Kyrhyzstana, Urycki adkazaŭ nastupnaje: «U kirhizaŭ i pytajciesia».
Na dadatkovyja pytańni Urycki nie zachacieŭ adkazvać. Adnak litaralna praz chvilinu jon praz maładoha čałavieka paprasiŭ karespandenta viarnucca i adkłaści ŭ bok kamieru i dyktafon. Tolki paśla hetaha jon pahadziŭsia havaryć. Dyrektar BNBK pakazaŭ biełaruski pašpart na imia Daniiła Uryckaha. Na prośbu abvierhnuć infarmacyju, što jon źjaŭlajecca Danijaram Usienavym, jon adkazvaŭ unikliva. Paźniej nie pad dyktafonny zapis jon dazvoliŭ pracytavać siabie nastupnym čynam: «Ja čuŭ, što Danijar Usienaŭ, premjer-ministr Respubliki Kyrhyzstan, pamior u 2013 hodzie ŭ Małajzii».
Łukašenka: Chto tam u Rasii viakaje na šmatviektarnaść Biełarusi i vyzvaleńnie palitviaźniaŭ?10
Kamientary