Nievierahodnaja historyja kachańnia, pra jakuju niekali źnimie stužku «Biełaruśfilm»
«Kali niekali «Biełaruśfilm» zachoča źniać love story, to heta budzie čysta šekśpiraŭskija historyja. Jana kranaje mianie kožny raz jak tolki jaje zhadvaju. Siońnia hartaŭ svoj stary nalibocki błoh i zalip na joj iznoŭ. Jaje niekali «adkapali» Sieviaryn Kviatkoŭski i Łarysa Cimošyk», piša žurnalist Dźmitryj Hurnievič.
Heta historyja kachańnia Alaksandra Šekala z Nalibockaj puščy i jahonaj žonki Evieliny. Evielina była ŭdavoj, ź dźviuma dočkami. Sustrakacca z Alaksandram jany pačali ŭ siaredzinie 1930-ch.
26 listapada 1938 hoda jany pabralisia šlubam, ale pažyć razam im paščaściła ŭsiaho paŭhoda. Nieŭzabavie muža zabrali ŭ vojska, a paśla vajna, savieckaja turma, ssyłka na Ŭschod. Nastupny raz jana pabačyć muža ažno praz 37 hod.
Kali niemcy napali na SSSR, to Stalin pahadziŭsia stvaryć polskuju armiju ź viaźniaŭ, i Šekal z łahiera trapiŭ u armiju Andersa, prymaŭ udzieł u bitvie pad Monte-Kasina.
U hety čas jaho žonka straciła dom. Niemcy spalili chutar, dzie jany z Alaksandram žyli da vajny. Evielina ŭciakła da svajakoŭ pad Ivianiec.
A muž paśla vajny trapiŭ u Anhliju. Viartacca ŭ SSSR jamu nie raili, bo byłyja andersaŭcy traplali zvyčajna naŭprost u Sibir. Viartacca adhavorvała ŭ listach i žonka.
Alaksandr uładkavaŭsia na zavod frezieroŭščykam, pasialiŭsia ŭ horadzie Lutan. Byłym hierojam Monte-Kasina Vialikabrytanija vypłačvała jašče i piensiju. Chacieŭ hetuju piensiju aformić na žonku, ale z Savieckim sajuzam takoje było niemahčyma.
Adnojčy jon dasłaŭ žoncy svoj fotazdymak. Evielina paprasiła ŭ fotamajstra zrabić padvojny partret — jana pobač z mužam. Da vajny jany nie paśpieli sfatahrafavacca razam. Hety partret — na zdymku.
U 1976 hodzie, kali ŭ Anhlii vybary vyjhrali lejbarysty, Šekal paprasiŭ vizu ŭ SSSR i ŭpieršyniu za 37 hod viarnuŭsia na Radzimu. Alaksandr chacieŭ zabrać žonku ŭ Anhliju, ale jana admoviłasia, bo adna z dačok była chvoraja i patrabavała dahladu.
— Ja chacieŭ, kab Evielina była razam sa mnoj. Jana admoviłasia, skazała: «Možaš žanicca. A mo ŭžo žanaty, dziaciej maješ?..» Ja skazaŭ: «Nie, ničoha takoha. Žanicca nie budu. Dažyvu sam». Kryŭdna było. Ale ja abiacaŭ, kali źmienicca ŭ vas prava, ja pryjedu da ciabie žyć.
U 1990-ja, kali Biełaruś stała niezaležnaj, 93-hadovy Alaksandr Šekal viarnuŭsia ŭ Biełaruś. Žonka ŭsio jašče jaho čakała. Jana ŭžo mocna chvareła, jaje paralizavała. Alaksandr jaje dahladaŭ. Paśla viartańnia jany pražyli razam try hady.
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu1515
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu15
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary