U Biełarusi majuć namier unieści źmieny ŭ Padatkovy kodeks. Ułady raźmiaścili na hramadskaje abmierkavańnie prajekt prapanavanych papravak u hety dakumient. Da prykładu, indyvidualnym pradprymalnikam i fizičnym asobam chočuć dazvolić vypłačvać padatki i pieni z adterminoŭkaj płaciažoŭ albo ŭ rasterminoŭku, a dedłajn pa padačy padatkovaj dekłaracyi mohuć pieranieści na 31 sakavika. FINANCE.TUT.BY adsačyŭ, jakija źmieny ŭłady padrychtavali ŭ Padatkovy kodeks.
Chočuć pieranieści dedłajn pa padačy padatkovaj dekłaracyi
Dla fizičnych asob chočuć pieranieści krajni termin padačy dekłaracyi za atrymanyja dachody. Prapanujecca pieranieści termin padačy ŭ padatkovuju dekłaracyj pa padachodnym padatku z 1 sakavika na 31 sakavika, a termin vypłaty padachodnaha padatku z 15 traŭnia na 1 červienia hoda, nastupnaha za spravazdačnym.
Paviedamleńnie fizičnaj asobie abo jaje pradstaŭniku pavinny ŭručyć nie paźniej za 30 krasavika hoda, nastupnaha za spravazdačnym padatkovym pieryjadam.
Raniej u padatkovaj tłumačyli, što hetyja źmieny vyrašyli ŭvieści z-za nieabchodnaści pradstaŭleńnia fizasobaj adnačasova z dekłaracyjaj dakumientaŭ, jakija paćviardžajuć atrymańnie dachodaŭ i vypłatu padatku z hetych dachodaŭ za miažoj.
Zapazyčanaść pa padatkach dazvolać płacić u rasterminoŭku
Indyvidualnym pradprymalnikam i fizičnym asobam mohuć dazvolić vypłačvać padatki i pieni z adterminoŭkaj płaciažoŭ albo ŭ rasterminoŭku. Arhanizacyi i IP mohuć raźličvać na takija pasłableńni ŭ tym vypadku, kali ŭ ich ciažkaje finansavaje stanovišča, a fizičnyja asoby — zychodziačy ź ich majomasnaha stanovišča abo ŭ suviazi sa znachodžańniem u ciažkaj žyćciovaj situacyi. Hałoŭnaja ŭmova dla fizičnych asob — abjekty padatkaabkładańnia nie pavinny być źviazanyja z ažyćciaŭleńniem pradprymalnickaj dziejnaści.
Pad składanaj žyćciovaj situacyjaj razumiejecca abjektyŭnyja akaličnaści (sukupnaść abstavin), što nie zaležać ad fizasoby, jakija jana nie moža pieraadoleć za košt najaŭnych mahčymaściaŭ.
Umovaj karystańnia rasterminoŭkaj abo adterminoŭkaj z nastupnaj rasterminoŭkaj źjaŭlajecca vypłata:
- biahučych płaciažoŭ u biudžet u vyznačany zakanadaŭstvam termin;
- płaciažoŭ u pahašeńnie adterminavanych i (abo) rasterminavanych sum zapazyčanaści pa padatkach, zborach (pošlinach), pieniach i pracentaŭ za karystańnie adterminoŭkaj i (abo) rasterminoŭkaj — u termin, vyznačany rašeńniem ab pradastaŭleńni adterminoŭki, rasterminoŭki abo adterminoŭki z nastupnaj rasterminoŭkaj.
Pry hetym naličeńnie pieni na sumy zapazyčanaści pa padatkach, zborach (pošlinach) budzie spyniena ź pieršaha dnia terminu, na jakija dajucca rasterminoŭka abo adterminoŭka.
Zaraz adterminoŭku ci rasterminoŭku pa apłacie padatkaŭ i (abo) zapazyčanaści pa ich dajuć tolki asobnyja rajony. I tolki dla IP.
Dobrasumlennym płacielščykam daduć čas na vypraŭleńnie, a «niepamiatlivym» — zabłakujuć rachunki
U Biełarusi chočuć uvieści novy miechanizm prypynieńnie ździajśnieńnia apieracyj pa rachunkach płacielščykaŭ. Kali siońnia utvarajecca zapazyčanaść pa płaciažach u biudžet, to ŭžo na nastupny dzień padatkaviki pavinny prypynić usie apieracyi pa rachunkach hetaha subjekta. Zaraz ža prapanujecca dobrasumlennym płacielščykam, u jakich utvaryłasia zapazyčanaść pa padatkach, dadavać 10 dadatkovych rabočych dzion na likvidacyju parušeńniaŭ. Hałoŭnaja ŭmova: da hetaha jany pavinny byli na praciahu paŭhoda ŭsio spraŭna płacić u dziaržbiudžet. Kali płacielščyk za heta adviedzieny čas uniasie usie srodki, to apieracyi pa jaho rachunkach nie buduć prypyniać.
Dla tych, u kaho ŭsio ž taki raniej užo ŭźnikała zapazyčanaść, ale pry hetym jana pahašałasia ŭ pieršaha dnia miesiaca, jaki idzie za miesiacam utvareńnia zapazyčanaści, padatkaviki chočuć ŭvieści adterminoŭku ŭ 5 rabočych dzion. Kali za dadzieny čas parušeńni buduć likvidavany, to apieracyi pa rachunkach taksama nie buduć prypyniać.
Najmalniki buduć paviedamlać padatkavikam dadzienyja ab usich dachodach rabotnikaŭ
Z 1 studzienia 2019 hoda najmalniki — arhanizacyi i IP — pavinny buduć pieradavać padatkavikam dadzienyja ab usich dachodach svaich rabotnikaŭ. Źviestki treba padavać adzin raz u kvartał. Dla hetaha novaŭviadzieńnia ŭłady ŭniasuć źmieny ŭ Padatkovy kodeks.
U bazie budzie ŭtrymlivacca infarmacyja ab usich hrašovych pastupleńniach biełarusaŭ. Tut buduć sabrany dadzienyja jak ab pastupleńniach unutry krainy, tak i z-za miažy, pra heta raniej paviedamlali ŭ MNS.
Arhanizacyi i IP pavinny buduć, da prykładu, pieradavać u padatkovuju źviestki ab dachodach (pazykach, kredytach), utrymańnie padachodnaha padatku pravodzicca jak za košt srodkaŭ fizasoby, tak i najmalnika, a taksama ab hrašovych pastupleńniach (pazykach, kredytach, prodažy nieruchomaści i aŭtamabilaŭ), padlik padachodnaha padatku ź jakich nie pravodzicca. Taksama najmalniki buduć padavać infarmacyju ab majomasnych, prafiesijnych padatkovych vypłatach, sacyjalnych, standartnych padatkovych vypłatach. Siarod inšych dadzienych, jaki buduć pieradavacca ŭ padatkovuju, — vydatki pa apieracyjach z kaštoŭnymi papierami i finansavymi instrumientami terminovych ździełak.
Heta i dachody, jakija atrymlivaje rabotnik ad najmalnika pa miescy asnoŭnaj raboty, uklučajučy ŭznaharodžańnie za vykanańnie pracoŭnych i inšych abaviazkaŭ, premii, adpusknyja, inšyja dachody, u tym liku tyja, što vypłačvajucca sa srodkaŭ pazabiudžetnaha fondu sacyjalnaj abarony nasielnictva (FSAN), a taksama dachody pa pracoŭnych dahavorach (dachody ŭnutranych i źniešnich sumiaščalnikaŭ).
Biełarusy zmohuć źviartacca ŭ lubuju padatkovuju
Z nastupnaha hoda fizičnyja asoby zmohuć padavać padatkovyja dekłaracyi na papiarovym nośbicie ŭ lubuju padatkovuju, niezaležna ad miesca svajoj rehistracyi. Ciapier heta možna zrabić tolki ŭ padatkovaj pa miescy žycharstva.
Pasłableńni dla ipešnikaŭ
Ułady padrychtavali źmieny dla indyvidualnych pradprymalnikaŭ, jakija ciapier vypłačvajuć adziny padatak. Z 2019 hoda hetyja IP zmohuć vybirać režym padatkaabkładańnia. Da prykładu, sproščanuju sistemu padatkaabkładańnia abo adziny padatak.
U MNS udakładniajuć, što siońnia ŭ Padatkovym kodeksie prapisany maksimalnaja i minimalnaja staŭki padatku ŭ zaležnaści ad taho, dzie IP zajmajecca dziejnaściu.
— Miascovyja saviety deputataŭ vyznačajuć jaho kankretny pamier z ulikam asablivaściaŭ miascovaści. Ale na praktycy byvajuć situacyi, što, naprykład, u abłasnym centry staŭka moža być vyšejšaj albo na ŭzroŭni Minska. Ale treba razumieć, što ŭ rehijonach nie taki bojki handal idzie, nie takaja aktyŭnaja dziejnaść. Minsk — stalica, dachodnaść tut vyšejšaja, tamu i staŭki ŭ Minsku pavinny być pieršapačatkova bolš vysokija, — adznačała raniej namieśnica ministra pa padatkach i zborach Eła Sialickaja.
Źmieny dla tych, chto zdaje kvatery
Raspracavany taksama źmieny i dla tych, chto zdaje ŭ arendu abo najom žyłyja i niežyłyja pamiaškańni, mašyna-miesca i vypłačvaje padachodny padatak u fiksavanych sumach. Dla hetych ludziej chočuć admianić nieabchodnaść padavać dekłaracyju pa padachodnym padatku, kali byŭ pieravyšany vyznačany pamier hadavoha dachodu. Adpaviedna, budzie vyklučana nieabchodnaść dapłočvać padatak.
U 2018 hodzie miaža takoha prybytku składaje 6116 rubloŭ.
Navinki pa padatku na nieruchomaść i pa ziamielnym padatku
Pa padatku na nieruchomaść i pa ziamielnym padatku prapanujecca prybrać 10-razovaje pavyšeńnie stavak. Ciapier hetyja zbory vypłačvajucca za niametavaje vykarystańnie, niasvoječasovaje viartańnie ziamielnaha ŭčastka, za samavolny zachop ziamli, za nieefiektyŭnaje vykarystańnie abo nievykarystańnie budynka abo zbudavańnia.
Taksama prapanujecca admovicca ad źbirańnia padatku na nieruchomaść u dvuchrazovym pamiery, kali ŭvodzicca zvyšnarmatyŭny abjekt budaŭnictva.
Chočuć abmiežavać pamier pieni paśla pravierak
Źmieny zakranuć i pamier pieni, jakuju subjektam haspadarańnia naličvajuć pa vynikach pravierki. Prapanujecca, što jana nie pavinna być bolšaj, čym suma danaličanaha padatku.
