Pasoł Biełarusi ŭ Kitai Kirył Rudy ŭ intervju Tut.by raspavioŭ pra kitajski dośvied baraćby z karupcyjaj, matyvacyju čynoŭnikaŭ i biełaruska-kitajskija adnosiny.
Rudy raskazaŭ, što biełaruskija dziaržaŭnyja orhany rehularna źviartajucca da kitajskaha dośviedu reform dziaržaŭnych pradpryjemstvaŭ. Kitajskija ekśpierty pryjazdžali da nas, našy dziaržaŭnyja słužačyja pastajanna navučajucca ŭ Kitai. Razumieńnie, što «treba rabić» i viedy «jak» — jość. Pakul nie padyšli da punkta «kali rabić».
Nakont kitajskaha dośviedu baraćby z karupcyjaj Rudy raspavioŭ, što ŭ 2013 hodzie ŭ Kitai aryštavali kiraŭnikoŭ praktyčna ŭsich pravincyj i bujnych dziaržaŭnych pradpryjemstvaŭ. «Sacyjalny kapitał» devalvavaŭsia, što pryviało ŭpieršyniu da adtoku hrošaj z krainy i pierachodu kursu juania z revalvacyi ŭ devalvacyju. Adnak dośvied Kitaja — nie tolki va ŭzmacnieńni žorstkaści pravił, ale i ŭ bolšaj prazrystaści raboty dziaržaŭnych orhanaŭ.
Rudy pryhadaŭ słovy v.a premjer-ministra Sinhapura, što ŭ Biełarusi siońnia lepšyja startavyja ŭmovy dla ekanamičnaha ryŭka, čym byli kaliści ŭ Sinhapura, tamu što ŭ jaho pakaleńni tolki 2% byli adukavanymi.
U toj ža čas Rudy, jaki viadomy jak IT-skieptyk, acaniŭ hetuju halinu biełaruskaj ekanomiki:
«Pavodle acenak Ernst&Young, u Biełarusi 85 tysiač čałaviek zaniatyja ŭ IKT [infarmacyjna-kamunikacyjnych technałohijach], u tym liku 35 tysiač — u IT. Usiaho ŭ nas 4,5 miljona zaniatych. Adpaviedna, IKT stvaraje ŭ Biełarusi tolki 1,8% pracoŭnych miescaŭ. Dola IKT u ahulnym abjomie našaha ekspartu tavaraŭ i pasłuh u 2016 hodzie była 3,9%. Pa padatkach — ilhoty. Tamu IKT-śfiera, viadoma, modnaja i pryvabnaja, ale sinierhii i impulsu našaj ekanomicy pakul nie daje».
Taksama Rudy raskazaŭ, čamu jon, doktar navuk z zachodnim vopytam i volnaj anhlijskaj, vyrašyŭ stać dziaržaŭnym słužboŭcam:
— U śniežni 2013 hoda na respublikanskaj naradzie pa kadrach mnie takoje ž pytańnie raptam zadaŭ prezident. Tady, pamiataju, z chodu adkazaŭ, što «chočacca niešta zrabić, damahčysia vyniku, samarealizavacca».
Siońnia mahu dadać, što ŭ prychodzie na dziaržaŭnuju słužbu jość unutranaja łohika i składvajecca jana z adukacyi, kruhahladu, karysnaści, pryznańnia, patryjatyzmu. Viadoma, patrebna i zarpłata, i sacyjalnyja harantyi, ale adnaho hetaha niedastatkova. Upłyvaje i tempieramient, schilnaści i pieravahi. Naprykład, u mianie dva syny: starejšy spakojny, małodšy aktyŭny. Kitajcy žartujuć, što starejšy budzie dziaržaŭnym słužačym, a małodšy — biznesmienam.
Kali surjozna, to 5 hadoŭ tamu na naradzie toj adkaz byŭ samym dakładnym».
