Kala 48 młn rubloŭ vydzielena ź inavacyjnaha fondu na madernizacyju, zakupku novaha abstalavańnia dla Aršanskaha instrumientalnaha zavoda. Pra heta zajaviŭ staršynia Aršanskaha rajvykankama Ihar Isačenka ŭ efiry telekanała ANT, paviedamlaje Biełta.
«Bolš za ŭsio zaŭvah kiraŭnikom dziaržavy było dadziena mienavita pa pramysłovych pradpryjemstvach. Prablema ŭ tym, što kiraŭniki mała ŭvahi nadajuć kultury vytvorčaści, naviadzieńni paradku na terytoryi, što niemałavažna. Ale, viadoma, pierš za ŭsio ekanomika», — skazaŭ Ihar Isačanka.
Jon adznačyŭ, što akramia mier žorstkaha kiravańnia i kantrolu pradprymajucca dziejańni, jakija musiać dapamahčy raźvićciu ekanamičnaha siektara rehijonu.
«Dla hetaha jość inavacyjny fond, pa im vyłučanyja davoli vialikija srodki, kala 48 młn rubloŭ tolki na instrumientalny zavod. Ja ciapier akurat pahłyblajusia ŭ pytańni, źviazanyja z zakupkaj impartnaha abstalavańnia, jakomu niama anałahaŭ u Biełarusi, a taksama z vyrabam i zakupkaj abstalavańnia na ajčynnych pradpryjemstvach», — dadaŭ staršynia rajvykankama.
Jak paviedamlałasia raniej, u červieni 2018 hoda byŭ padpisany ŭkaz ab uniasieńni zavoda ŭ inavacyjnuju prahramu. Finansavańnie ŭžo pačałosia, da kanca hoda płanujecca zakupić kala 20 adzinak mietałareznaha abstalavańnia biełaruskaj i zamiežnaj vytvorčaściej.
Akramia taho, Ihar Isačenka adznačyŭ u razmovie z karespandentam Biełta, što Alaksandr Łukašenka padpisaŭ rasparadžeńnie ab vydzialeńni 4 młn rubloŭ dla ramontnych prac na Aršanskim instrumientalnym zavodzie, u tym liku na prablemnym dachu adnaho z cechaŭ. Za hetuju pracu ŭžo ŭziaŭsia budaŭničy trest №18, paźniej dałučacca i inšyja arhanizacyi.
Na dumku kiraŭnika rajona, kab stabilizavać situacyju i dać rehijonu šturšok dla raźvićcia, nieabchodnaja dobrasumlennaja praca ŭsich aršancaŭ, pravilnyja kiraŭničyja rašeńni, u tym liku kiraŭnikoŭ pradpryjemstvaŭ, raźvićcio inviestycyjnaj dziejnaści, «kab možna było papoŭnić biudžet i nakiroŭvać jaho ŭ dalejšym na raźvićcio jak sacyjalnaj śfiery, tak i infrastruktury».
«Patencyjał Aršanskaha rajona davoli vialiki i ŭ sielskaj haspadarcy, i ŭ pramysłovaści. Hałoŭnaje pytańnie — ekanomika. A heta suma ŭsiaho: zakazy pradpryjemstvaŭ; novyja stanki i abstalavańnie, jakoje budzie vyrablać kankurentazdolnuju pradukcyju, zapatrabavanuju ŭ Biełarusi i za miažoj; słužba markietynhu i zbytu. Kožny kirunak pavinien być adpracavany», — skazaŭ na zakančeńnie Ihar Isačanka.
Ciapier čytajuć
Jak u halečy śpivałasia radnia Łukašenki? Małaviadomyja fakty48
Kamientary