88 hramadzianaŭ Paŭdniovaj Karei naviedajuć KNDR dla spatkańnia z svajakami, ź jakimi byli razłučanyja ad času Karejskaj vajny (1950—1953 h.), paviedamlaje Radyjo Svaboda sa spasyłkaj na paŭdniovakarejskaje infarmacyjnaje ahienctva Yonhap.
Sustreča padzielenych siemjaŭ projdzie na paŭnočnakarejskim kurorcie «Hara Kumhan» i budzie doŭžycca da 22 žniŭnia. Pra heta kiraŭniki dźviuch dziaržavaŭ damovilisia na samicie ŭ krasaviku. Ciaham troch dzion padzielenyja siemji čakaje šeść spatkańniaŭ za viačerami i abiedami, arhanizavanymi KNDR.
Usiaho na sustreču z Paŭdniovaj Karei vyjechali 89 čałaviek. Jašče prykładna 300 ich supravadžajuć, u tym liku 30 lekaraŭ, bo bolšaja pałova ludziej starejšyja za 70 hadoŭ. Pavodle paŭdniovakarejskich ŚMI, najstarejšamu ŭdzielniku pajezdki 101 hod, jašče 35 čałaviek starejšyja za 90 hadoŭ. Balšynia vypraviłasia ŭ KNDR na invalidnych vazkach.
Da kanca tydnia 88 hramadzianaŭ Paŭnočnaj Karei pryjeduć ź vizytam da svajakoŭ u Paŭdniovuju. 62 ź ich starejšyja za 80 hadoŭ.
Pavodle «Čyrvonaha kryža», paśla krasavickaha samitu kiraŭnikoŭ dziaržavaŭ i padpisańnia dakumentaŭ ab jadziernym razzbrajeńni i supracy padali zajavy na spatkańni bolš jak 132 tysiačy žycharoŭ Paŭdniovaj Karei i kala 57 tysiačaŭ hramadzianaŭ KNDR.
Heta budzie pieršaje spatkańnie rodzičaŭ za apošnija try hady — u 2015 hodzie dačynieńni pamiž Karejami rezka pahoršylisia. Z 2000 hodu aficyjna adbyłosia tolki 20 časovych uźjadnańniaŭ siemjaŭ.
Ciapier čytajuć
Na pieradśmiarotnym videa z kałonii nasamreč byŭ nie Vitold Ašurak. Źjavilisia novyja padrabiaznaści śmierci palitviaźnia6
Kamientary