Naścia Rybka spadziavałasia, što za pieradaču hetych zapisaŭ jaje mohuć vyzvalić z turmy. Praz šeść miesiacaŭ jaje hulnia, jak vyhladaje, atrymała drenny zvarotny efekt, piša «Radyjo Svaboda» sa spasyłkaj na The New York Timies.
Toje, što pačynałasia jak abvinavačvańnie ŭ niaznačnym parušeńni imihracyjnaha zakanadaŭstva, pieratvaryłasia ŭ surjoznuju kryminalnuju spravu, pa jakoj možna atrymać pakarańnie da 10 hadoŭ turmy ŭ Tajłandzie. U novym intervju The New York Times Anastasija Vašukievič (Naścia Rybka), bolš nie afišuje źmiest svaich zapisaŭ i kaža, što ciapier jana nie płanuje zrabić ich zdabytkam hramadzkaści.
Anastasija Vašukievič zastajecca ŭ tajskaj turmie razam z uradžencam Biełarusi, seks-trenieram Alaksandram Kiryłavym (Aleks Łeśli) i jašče šaściu fihurantami spravy z Rasii.
Na hetym tydni sudździa pryznačyŭ sud na siaredzinu studzienia, paśla taho, jak usie fihuranty spravy nie pryznali siabie vinavatymi ŭ abvinavačvańni ŭ nieprystojnych pavodzinach, zmovie i prynaležnaści da sakretnaj supolnaści. Jany aburanyja hetymi abvinavačvańniami, jakija źviazvajuć z umiašańniem zamiežnych dziaržaŭ.
«Jany bajacca, što ja maju niešta», — kaža Anastasija Vašukievič u intervju amierykanskamu vydańniu.
Jak adznačaje aŭtar publikacyi, «padziei ŭ Tajłandzie źjaŭlajucca častkaj praciahłaj dramy, u jakoj zaviazanyja mahutny rasijski aliharch, scenar sa spakušeńniem i pytańni z nahody ŭmiašańnia Kramla ŭ vybary ŭ Złučanych Štatach».
Ciapier Naścia Rybka kaža, što adpraviła kopii svaich zapisaŭ aliharchu Alehu Dzierypasku, ź jakim, jak jana śćviardžaje, mieła intymnyja adnosiny, i čyje pryvatnyja razmovy jana zapisvała.
«Ciapier ja prosta čakaju adkazu Aleha, — skazała jana. — Ja prosta chaču, kab my byli siabrami».
