Scena z opiery «Sałamieja» ŭ teatry La monnaie.
Stała viadoma, što pieraniesienaja premjera opiery «Sałamieja» ŭ Minsku.
«Naša Niva» źviarnułasia da staršyni infarmacyjnaha sinadalnaha adździeła biełaruskaha ekzarchatu Siarhieja Lepina, kab jon patłumačyŭ, što aznačaje hetaja situacyja. Jon raskazaŭ, što carkva sapraŭdy prasiła pra pieranos.
«Nam na vodhuk dasyłali list ź Minkulta, my tłumačyli svaju pazicyju: kanstatavali, što interpretacyja jevanhielskaha siužeta adroźnivajecca ad aryhinała. Ja byŭ na prahonie. Dziakuj Bohu, nijakaha ekstremizmu, abrazy pačućciaŭ viernikaŭ tam niama. Ale my padkreślili, što nam było b pryjemna, kali b premjera była pieraniesienaja ŭ suviazi z tym, što płanavanaja data — heta napiaredadni dnia Usieknavieńnia hałavy Iaana Chryściciela», — skazaŭ Lepin.
Adsiačeńnie hałavy Iaana Pradciečy (Chryściciela) adznačajecca pravasłaŭnymi viernikami 11 vieraśnia. Pavodle lehiendy, hetaha praroka zabili praz prośbu Sałamiei, a potym prynieśli joj adsiečanuju hałavu.
Premjernyja pakazy opiery «Sałamieja», zapłanavanyja ŭ Minsku na 9 i 10 vieraśnia, admienienyja.
Jak paviedamili «Našaj Nivie» ŭ Vialikim teatry opiery i baleta, pastanoŭka «Sałamieja» pieraniesienaja na miesiac — jaje majuć pakazać u kastryčniku.
Rašeńnie ab hetym pryniataje litaralna siońnia.
Raniej režysior Michaił Pandžavidze prasiŭ dazvoł u mitrapalita Paŭła na pastanoŭku opiery «Sałamieja» ŭ Minsku.
«My źviarnulisia da patryjaršaha ekzarcha ŭsiaje Biełarusi za zhodaj na pastanoŭku. I ničoha ŭ hetym dziŭnaha niama. Mitrapalit Pavieł paprasiŭ, kab ja jamu raskazaŭ, jak baču hety śpiektakl.
Ja rastłumačyŭ, što ŭ samoj opiery «Sałamieja» ničoha raspusnaha i antyklerykalnaha niama. Ale ŭ joj prysutničaje nieŭrasteničny kantekst, jaki stvaraje adčuvańnie niejkaj emacyjnaj raspuščanaści.
Nasamreč pjesa Uajlda hłyboka relihijnaja, i ŭ joj vielmi dakładna vykazana toje, pra što my ŭvieś čas kažam i budziem kazać», — kazaŭ jon.
Sałamieja — heta histaryčny piersanaž. Pavodle padańnia, heta na jaje prośbu car Irad zabiŭ Iaana Chryściciela i padaŭ joj na padnosie hałavu hetaha praroka.
