korrespondent.net
Mitrapalit Halski Emanuił (Adamakis) paćvierdziŭ u intervju L'Agenzia Società per l'Informazione Religiosa, što rašeńnie ab nadańni aŭtakiefalii Ukrainskaj pravasłaŭnaj carkvie pryniataje Kanstancinopalskim patryjarcham Varfałamiejem, piša Radyjo Svaboda.
Jak śćviardžaje mitrapalit Halski Emanuił (Adamakis), Kanstancinopalski patryjarch Varfałamiej pryniaŭ rašeńnie, «pamiatajučy pra svaju adkaznaść jak maciarynskaj carkvy i ŭ adkaz na prośby ŭkrainskaha naroda, paśla hłybokaha analizu hetaha pytańnia».
Jon dadaje, što praces nadańnia aŭtakiefalii nia musić być pryčynaj padziełu ci raskołu Pravasłaŭnaj carkvy, a pryznačeńnie dvuch ekzarchaŭ va Ŭkrainu z boku Ŭsialenskaha patryjarchatu pavinna «padkreślić rašučaść Varfałamieja paśpiachova raźviazać niazhody miž ukrainskimi pravasłaŭnymi». Aŭtakiefalija UPC maje zblizić roznyja haliny ŭkrainskaha pravasłaŭja, kaža mitrapalit Halski.
Raniej byli tolki nieaficyjnyja paviedamleńni pra toje, što na sustrečy patryjarcha Kanstancinopalskaha i patryjarcha Maskoŭskaha i ŭsioj Rusi Kiryła pieršy paviedamiŭ druhomu pra rašeńnie ŭtvaryć va Ukrainie aŭtakiefalnuju carkvu. RPC nazvała dziejańni Kanstancinopalskaha patryjarchata va Ukrainie «podłymi i vierałomnymi».
Aŭtakiefalnaja pravasłaŭnaja carkva ŭ sučasnym razumieńni — heta pamiesnaja pravasłaŭnaja carkva z zamacavanaj za joj kananičnaj terytoryjaj, na jakoj nie pavinny dziejničać inšyja pamiesnyja cerkvy. Hety status praduhledžvaje jaje administracyjnuju niezaležnaść ad inšych pamiesnych cerkvaŭ.
Kamientary