Novy lidar AHP Kazłoŭ: «Zic-staršynia — heta nie pra mianie»

Hość «Interviju tydnia» na Radyjo Svaboda — novy vykanaŭca abaviazkaŭ staršyni Abjadnanaj hramadzianskaj partyi Mikałaj Kazłoŭ. Abrany na minułym źjeździe staršyniom AHP Vasil Palakoŭ 23 vieraśnia źviarnuŭsia z zajavaj ab adstaŭcy. 24 vieraśnia Palitrada pryniała adstaŭku i pastanaviła, što da nastupnaha źjezdu partyjaj budzie kiravać namieśnik staršyni Mikałaj Kazłoŭ.

U razmovie sa Svabodaj Mikałaj Kazłoŭ zajaŭlaje, što budzie samastojnym kiraŭnikom partyi, raspaviadaje, čamu jaho navučyła słužba ŭ milicyi, i abiacaje chutka vyvučyć biełaruskuju movu.

Kali ŭsia represiŭnaja mašyna paviarnułasia suprać mianie, ja paličyŭ, što niemahčyma praciahvać słužbu

— Miarkuju, naša interviju varta pačać z pytańnia. jakoje žurnalisty nie zadajuć dobra viadomym palitykam. Adnak u vas ja chaču paprasić, kab vy troški raspaviali pra svaju bijahrafiju.

— Naradziŭsia ŭ Vałožynie ŭ 1967 hodzie. Ale ŭ dziacinstvie pierajechaŭ u Niaśviž, i ŭsio majo žyćcio źviazanaje z hetym horadam. Paśla škoły pastupiŭ u Navasibirskuju vyšejšuju vajskovuju vučelniu. Słužyŭ u vojsku, apošniaje miesca słužby — Siaredniaja Azija, Uzbekistan. Udzielničaŭ u padziejach u Nahornym Karabachu, razvodziŭ varožyja baki ŭ jakaści namieśnika kamandzira roty.

Paśla razvału SSSR napisaŭ rapart ab zvalnieńni, bo nia bačyŭ siabie ŭ składzie ŭzbeckaha vojska. Viarnuŭsia na radzimu i pastupiŭ na słužbu ŭ kryminalny vyšuk, dzie i pracavaŭ 18 hadoŭ. Skončyŭ słužbu padpałkoŭnikam, operupaŭnavažany ŭ asabliva važnych spravach.

Syšoŭ ja ŭ vyniku skandalnaj historyi na parlamenckich vybarach 2008 hodu, kali nios słužbu na vybarčym učastku. Učastkovaja kamisija falsyfikavała vybary, ukidvała biuleteni ŭ skrynku, pra što ja paviedamiŭ kiraŭnikam, napisaŭ adpaviednyja raparty. Urešcie, hetaja historyja, napeŭna, dobra viadomaja.

Paśla taho jak ja pabačyŭ, što nijakich zachadaŭ suprać ludziej, jakaja zrabili złačynstva, nie pradprymajecca, ja źviarnuŭsia ŭ presu i zrabiŭ hetuju historyju publičnaj. Paśla taho maja słužba ŭ milicyi stała niemahčymaj, maje telefony prasłuchoŭvali, za mnoj viali vonkavaje nazirańnie. Heta doŭžyłasia bolš za paŭhoda. Kali ja pabačyŭ, što ničoha nia robicca, kab pakarać parušalnikaŭ, a ŭsia represiŭnaja mašyna paviarnułasia suprać mianie, — ja paličyŭ, što niemahčyma praciahvać słužbu, i zvolniŭsia.

— I vy adrazu paśla hetaha vyrašyli pryjści ŭ apazycyjnuju partyju?

— Nie, paśla zvalnieńnia ja i nia dumaŭ zajmacca palityčnaj dziejnaściu. Dla mianie heta byŭ asabisty boj z systemaj, heta było pryncypova. Ja jašče paru hadoŭ nie prymykaŭ ni da jakoj partyi, dyj navat nia vielmi i cikaviŭsia palitykaj.

Ale tak atrymałasia, što adnym z kandydataŭ, suprać kaho čynili tuju falsyfikacyju, byŭ Anatol Labiedźka. I kali ja praz «Narodnuju volu» raspavioŭ, jak heta było, — Anatol zaprasiŭ mianie na presavuju kanferencyju. Kali ja čytaŭ roznyja kamentary, što heta, maŭlaŭ, fejk apazycyi, — ja paličyŭ niemahčymym praihnaravać presavuju kanferencyju. Tam ja i paznajomiŭsia z Anatolem Labiedźkam, a praz peŭny čas mianie pryniali ŭ šerahi partyi.

Ja dumaju, što budu dastatkova samastojnym

— Siońnia hramadzkaści było paviedamlena, što staršynia partyi Vasil Palakoŭ źviarnuŭsia ŭ Palityčnuju radu partyi z zajavaj ab adstaŭcy. 24 vieraśnia Palitrada pryniała adstaŭku i pastanaviła, što da nastupnaha źjezdu partyjaj budzie kiravać vy. Adrazu ŭźnikaje pytańnie: nakolki paŭnacennym, sapraŭdnym kiraŭnikom budziecie vy na hetaj pasadzie? Vy nia budziecie niejkim zic-staršyniom?

— Prynamsi ja nia maju namieru takim być. Mnie padajecca, što «zic» — heta nie pra mianie. Tak zdaryłasia, i ja całkam śviadoma pryniaŭ na siabie hetyja abaviazki. Razumiejučy sytuacyju, jakaja skłałasia ŭ partyi ŭ suviazi z adstaŭkaj, — ja pryniaŭ hetuju prapanovu.

Viadoma, dośviedu ŭ mianie niedastatkova ŭ mnohich halinach. Ale za mnoj staić kamanda, ja raźličvaju na ich dapamohu. Ja baču hatoŭnaść siabroŭ AHP mnie dapamahać, vyrašać usie składanaści. Usio heta dazvoliła mnie pahadzicca z rašeńniem. Ja dumaju, što budu dastatkova samastojnym. Pry hetym u nas demakratyčnaja partyja, jość rašeńni źjezdu, peryjadyčna sklikajem palitradu.

— Jakija hałoŭnyja stratehičnyja zadačy stajać zaraz pierad partyjaj?

— Majem stratehičny plan, pryniaty źjezdam. Dla siabie ja baču najpierš zadaču zachavańnia partyi, jaje strukturaŭ, u pracoŭnym stanie. Nas čakajuć dźvie vialikija elektaralnyja kampanii — parlamenckija i prezydenckija vybary, padrychtoŭka da ich užo pačałasia.

— Doŭhi čas niaźmiennym kiraŭnikom partyi byŭ Anatol Labiedźka. Kali adbyvaŭsia apošni źjezd partyi, mienavita vas nazyvali čałaviekam, jakomu Labiedźka najbolš daviaraje i ŭ jakim bačyć perspektyvu dla partyi. Ciapier Labiedźka syšoŭ z usich partyjnych pasadaŭ. Ale jak vy bačycie jahonuju rolu ŭ partyi, ci chacieli b atrymlivać ad jaho niejkuju dapamohu, parady?

— Biezumoŭna, heta karysna. Ale ja skažu, što, akramia Labiedźki, u nas u partyi dastatkova ludziej, na dapamohu jakich raźličvaju. Heta i Dabravolski, i Marholin, i Kavalova, Bahdankievič, Čyhir — masa ludziej, jakija majuć vialiki dośvied, šanujuć partyju. U ich liku, viadoma, i Anatol Labiedźka, jaki maje kalasalny palityčny dośvied.

Adčuvaju prafesijnuju dehradacyju ciapierašnich milicyjantaŭ

— A ci vaš dośvied milicyjanta, operupaŭnavažanaha dapamahaje ŭ palitycy? Ci mo «prafesijnaja defarmacyja» nakładaje svoj adbitak, i vy, naadvarot, chacieli b adkinuć tyja jakaści, jakija byli patrebnyja dla pracy ŭ milicyi?

— Papraŭdzie ja bolš adčuvaju sabie prafesijnym vajskoŭcam. Chacia bolšuju častku ja pravioŭ u kryminalnym vyšuku, «operam» u asabliva važnych spravach. Heta dośvied nieacenny. Za hady, jakija ja pravioŭ u vyšuku, ja ž havaryŭ nia tolki sa złačyncami. Heta masa inšych ludziej. Uvieś čas heta kamunikacyja. Tamu peŭnaje razumieńnie i viedańnie ludziej ja maju. Tamu dumaju, što bolš było karyści ad majoj papiaredniaj dziejnaści.

Naturalna, apošni čas ja znachodžusia «pa inšy bok barykadaŭ». I kali kantaktuju ź ciapierašnimi milicyjantami, to z peŭnym sumam adčuvaju ichnuju prafesijnuju dehradacyju.

— Dośvied kantaktaŭ ź ludźmi vam zaraz spatrebicca ŭ znosinach z kiraŭnikami inšych apazycyjnych palityčnych strukturaŭ, u naładžvańni roznych kaalicyjaŭ. Jak vas usprymuć inšyja apazycyjnyja lidery? Mahčyma, budzie peŭnaja dystancyja, bo vy pakul tolki časovy kiraŭnik partyi?

— Pa-pieršaje, z mnohimi asnoŭnymi liderami ja ŭžo znajomy, heta ludzi dla mianie nia novyja. Dumaju, niama padstavaŭ niejak asabliva mianie ŭsprymać. Hałoŭnaje, kab usie razumieli, što heta rašeńnie Palitrady. Raniej ja byŭ abrany źjezdam na namieśnika staršyni. I maju ŭsie padstavy kazać, što mahu pradstaŭlać AHP.

— Za vašuju palityčnuju karjeru ja pakul nie sustrakaŭ vypadkaŭ, kab vy vystupali ci davali kamentar pa-biełarusku. Ci vy dumajecie padvučyć biełaruskuju movu, kab bolš aktyŭna jaje ŭžyvać u žyćci i palityčnaj dziejnaści?

— Biezumoŭna, ja adčuvaju za saboj hety niedachop. Saromiejusia hetaha i dumaju, što treba nad hetym pracavać. Budziem vučyć biełaruskuju movu. Daŭno heta treba, daŭno ja chadziŭ z hetaj idejaj, što treba biełaruskuju movu ŭzhadać. U škole była biełaruskaja mova — ale školnym kursam jana i abmiažoŭvałasia. Ja razumieju hetuju nieabchodnaść — dla siabie jak hramadzianina, biełarusa. Dumaju, što pačnu hety prabieł vypraŭlać.

• 0
• 0
• 0
• 0
• 0
• 0
• 0
• 0