U Biełarusi viarnuć składanatechničnyja tavary naležnaj jakaści možna budzie ciaham 30 dzion, paviedamiła siońnia žurnalistam načalnik jurydyčnaha adździeła HA «Haradskoje tavarystva abarony spažyŭcoŭ» Volha Ivaščanka, piša BiełTA.
Takaja norma praduhledžana zakonam «Ab uniasieńni źmianieńniaŭ i dapaŭnieńniaŭ u Zakon «Ab abaronie pravoŭ spažyŭcoŭ». Jon ustupaje ŭ siłu 23 śniežnia.
«Źmieny ŭ zakon uniasuć jasnaść jak dla spažyŭca, tak i pradaŭca. U pryvatnaści, zakanadaŭča adrehulavany pytańni adnosna terminaŭ praviadzieńnia pravierki jakaści tavaraŭ pa zajavie spažyŭca. Ciapier takaja pravierka budzie pravodzicca na praciahu 7 dzion zamiest 14-ci. Taksama sproščany paradak viartańnia darahich i składanatechničnych tavaraŭ nienaležnaj jakaści. Da prykładu, raniej kab viarnuć chaładzilnik, nieabchodna było najaŭnaść istotnych defiektaŭ.
Zaraz źjavicca mahčymaść viarnuć taki tavar pry najaŭnaści navat nieistotnych niedachopaŭ, ale tolki na praciahu 30 dzion z momantu nabyćcia tavaru», — raspaviała Volha Ivaščanka.
Pavodle jaje słoŭ, šmat pytańniaŭ zaŭsiody ŭźnikaje pry praviadzieńni harantyjnaha ramontu. «Ciapier dakładna prapisana, što jon nie pavinien pieravyšać 30 dzion. Taksama ŭ zakonie znajšło adlustravańnie pytańnie viartańnia hrašovych srodkaŭ za niajakasny tavar u toj ža formie, u jakoj spažyviec nabyvaŭ tavar. Pry hetym najaŭnaść pašparta abo dakumienta, jaki paćviardžaje asobu, nieabchodna tolki ŭ vypadku, kali pašpartnyja dadzienyja zafiksavanyja ŭ damovie», - udakładniła načalnik juradździeła.
