Akcyi Tesla padskočyli na 16% z-za drennych navin

Zdavałasia b, heta niełahična: Iłan Mask, stvaralnik kultavaha elektraaŭtamabila Tesla, musić syści z pasady kiraŭnika rady dyrektaraŭ, zapłacić štraf u $20 miljonaŭ — a akcyi jahonaj kampanii iduć uharu.

Adnak, jak bačna, zakanamiernaści nie zaŭždy pracujuć, kali sprava idzie pra takoha ekstravahantnaha čałavieka, jak Mask.

Usio pačałosia ŭ žniŭni z karacieńkaha zapisu ŭ Tvitary, u jakim Mask namiaknuŭ na toje što jon, nibyta padumvaje, kab vykupić akcyi kampanii pa canie, jakaja na toj momant była vyšejšaj za rynkavuju.

Pavialičyć

Akcyi Tesla, naturalna, adrazu padskočyli ŭ canie. Adnak, jak vyjaviłasia, surjoznych namieraŭ vykuplać akcyi Mask nie mieŭ. U vyniku, Kamisija pa kaštoŭnych papierach i biržach ZŠA pačała rasśledavańnie, padazrajučy jaho ŭ finansavym machlarstvie. Heta ŭžo nie žarciki — taja kamisija ŭ ZŠA nakštałt našaha kamitetu dziaržkantrolu, jaki naziraje za biržavymi śpiekulantami, inviestarami dy inšymi hulcami finansavaha rynku. Pakarańni za niesumlenny handal kaštoŭnymi papierami ŭ ZŠA sapraŭdy drakonaŭskija. Niaredka parušalniki pravodziać hady ŭ turmie, što asabliva ciažka dla «biełych kaŭnierykaŭ», jakija padajuć z kniazi ŭ hrazi.

U hetym i kryjecca častka adkazu na toje, čamu rynak tak pazityŭna adreahavaŭ na pakarańnie dla Maska — jano zusim nie strohaje, a bolš padobnaje da baćkoŭskaha palapvańnia pa plačy: maŭlaŭ, «hodzie synku, pahulaŭsia — ale bolš tak nie rabi».

Mnohija čakali, što Maska całkam adchilać ad kiraŭnictva Tesla. Ale jon zdoleŭ zachavać za saboj pasadu vykanaŭčaha dyrektara, a taksama kresła ŭ radzie dyrektaraŭ — a značycca, chutčej za ŭsio, nie zhubić kantrolu nad inžyniernymi raspracoŭkami, jakija — prynamsi, tak vynikaje ź jaho šmatlikich tvitaŭ — cikaviać Maska našmat bolš za hrošy.

Pavialičyć

Taksama, jak ni dziŭna, Iłanu Masku moža być karysna skinuć ź plačej častku abaviazkaŭ — asabliva biurakratyčnych. Niadaŭna, u vialikim intervju dla The New York Times, źbivajučysia na ślozy, Mask pryznavaŭsia ŭ tym, što zachłynajecca ŭ pracy, jakaja mocna škodzić jaho siamji, nie daje pabavić choć krychu času ź siabrami. Faktyčna jon zrabiŭsia zakładnikam ułasnaha pośpiechu. Tamu kamisija pa kaštoŭnych papierach u niejkim sensie syhrała rolu psichaterapieŭta, prymusiŭšy pracaholika-Maska kryšačku «zbavić abaroty».

Nu i, mahčyma, ščaŭčok pa nosie zrobić stvaralnika Tesla bolš pradkazalnym i abačlivym u budučyni, što taksama musić dobra adbicca na jaho kampanii.

A što da štrafu, dyk dla Maska heta drobiaź, kamaryny ŭkus. U rejtynhu Forbes bahaćcie Maska aceńvajecca ŭ amal $20 miljardaŭ.

• 0
• 0
• 0
• 0
• 0
• 0
• 0
• 0