Idealny spadarožnik vosieni: duchmiany harochavy sup RECEPT
Kožny hod z prychodam chaładoŭ ja vielmi vyrazna zaŭvažaju źmienu ŭ maich hastranamičnych žadańniach. Vosieńniu i ŭzimku zaŭsiody chočacca čahości haračaha, hustoha, vostraha. Pad hetyja paramietry traplaje sup — idealnaja strava na chałady i vielmi blizkaja našamu sercu i straŭniku.
Pačniom z kłasiki — harochavy sup, moj ulubiony ź dziacinstva. Hałoŭnaja fiška hetaha recepta — vykarystańnie vendžanaj papryki. Nie palanujciesia znajści jaje (naprykład, na rynku), bo jana nadaje taki vodar, što niemahčyma pieradać słovami. Jašče nie zabudźcie ŭziać uprykusku łustu duchmianaha chleba ci zrabić sucharyki i dadać ich prosta ŭ sup.
Nam spatrebicca:
- 1 šklanka suchoha harochu;
- 2 bulbiny;
- 1 morkvina;
- 1 cybulina;
- 1/4 hałoŭki sieldereju;
- 2 zubčyki časnyku;
- 4 ziarniaty duchmianaha piercu;
- 4 łaŭrovyja listy;
- 1 st. ł. majaranu;
- 1 č.ł. vendžanaj papryki;
- 1/2 č. ł. mołataj kalandry;
- 2 st. ł. sojevaha sousu;
- 3 st. ł. aleju;
- sol;
- pierac.
Zamočvajem haroch na hadzinu ŭ haračaj vadzie (spatrebicca prykładna 2 litry). Bulbu, morkvu, cybulu i sielderej narazajem kubikami. Časnyk drobna kryšym.
U rondali razahravajem alej, dadajom cybulu, časnyk, duchmiany pierac, łaŭrovy list i papryku i tušym na maleńkim ahni chvilin piać. Dadajom astatniuju aharodninu i śpiecyi, dobra pieramiešvajem i taksama pakidajem na 5 chvilin na ahni.
Nadyšoŭ čas harochu — pierakładajem jaho ŭ rondal razam z vadoj, zalivajem sojevy sous. Nakryvajem i hatujem sup adnu hadzinu (moža spatrebicca mienš času, hałoŭnaje, kab haroch staŭ miakkim). Naprykancy solim i pierčym.
Pa smaku možna dadać kavałki hrudzinki ci inšaha hatavanaha miasa. Smačna jeści!
Kolki nasamreč ciahnucca pracoŭnyja pajezdki Łukašenki? Cikavyja ličby17
Kamientary