Heta kniha nobieleŭskaha łaŭreata, adnaho z samych čytanych aŭtaraŭ XXI stahodździa.
«Upeŭnieny, mienavita hetaj knihaj my zakładziom dobry padmurak dla taho, kab pierakładać na biełaruskuju movu tvory sučasnych topavych aŭtaraŭ. Aŭtaraŭ-miljońnikaŭ — pa nakładach ich knih. A taksama zdolejem pryvieźci ŭ Biełaruś hetych piśmieńnikaŭ», — kaža inicyjatar vydańnia Siarhiej Makarevič.
Ahulny nakład knih Pamuka ŭ śviecie składaje kala 15 miljonaŭ asobnikaŭ. Jaho tvory čytajuć na 60 movach. Zaraz da ich liku dadasca i biełaruskaja. Kab realizavać taki prajekt, na sajcie ulej.by zapuścili kraŭdfandynhavuju kampaniju — padpisku na vydańnie.
«Stambuł. Horad i ŭspaminy» vyjšaŭ upieršyniu ŭ 2003 hodzie. A ŭ 2006-m Pamuk atrymaŭ Nobieleŭskuju premiju jak aŭtar, «jaki ŭ pošukach miełanchaličnaj dušy rodnaha horada vyjaviŭ novyja simvały dla sutyknieńnia i pieraplacieńnia kultur».
«Hetaja kniha — mastackaja bijahrafija Stambuła. Nie hajd i nie historyja horada: nie raźličvajcie pračytać pra ŭsie šmatlikija cerkvy i miačeci, pałacy i viły, muziei i halerei… Pamuk viadzie čytača za ruku pa svaich lubimych vułkach, napoŭnienych hukami i pachami Stambuła, nie bačnych turystam, schavananych ad mimalotnych raziavak», — tłumačyć Makarevič.
Pamuk napisaŭ knihu, kali byŭ na miažy depresii: jon razvodziŭsia, pry śmierci byŭ jaho baćka, było šmat inšych prablem. «Ja padumaŭ, što pravalusia ŭ depresiju, kali zdamsia. Ale kožny dzień ja pračynaŭsia, prymaŭ chałodny duš, siadaŭ, uspaminaŭ i pisaŭ», — pryznaŭsia piśmieńnik paśla.
Pa-biełarusku kniha źjavicca ŭ studzieni 2019 hoda ŭ vydaviectvie «Januškievič».
«Stambuł» pierakłała na biełaruskuju Taćciana Urubleŭskaja-Tokier, redaktar — Siarhiej Šupa. Heta budzie treciaja kniha ŭ sieryi Noblesse oblige (tvory nobieleŭskich łaŭreataŭ pa-biełarusku). Raniej pabačyli śviet «Hoład» Knuta Hamsuna i «Kachańnie padčas chalery» Habryjela Harsii Markiesa.
«My praciahniem vydavać sučasnych zamiežnych aŭtaraŭ. U pačatku nastupnaha hoda vyjdzie raman Kazua Išyhura «Nie pakidaj mianie». Praz skandał, jaki skałanuŭ Šviedskuju akademiju, akurat Išyhura moža zastacca apošnim łaŭreatam Nobieleŭskaj premii pa litaratury. Sioleta premija nie prysudžajecca, a što ź joj budzie na leta — nie jasna».
Archan Pamuk (naradziŭsia ŭ 1952 hodzie) — turecki piśmieńnik, nobieleŭski łaŭreat 2006 hoda. Aŭtar takich biestsieleraŭ, jak «Muziej cnoty», «Maje dziŭnyja dumki», «Čornaja kniha», «Śnieh».
Ciapier čytajuć
Los syna prapahandysta sa «Sputnika», jaki pryjšoŭ da biełaruščyny padletkam, vyklikaŭ buru emocyj u jaho siabroŭ1
Los syna prapahandysta sa «Sputnika», jaki pryjšoŭ da biełaruščyny padletkam, vyklikaŭ buru emocyj u jaho siabroŭ
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1414
Kamientary