Prezident ZŠA Donald Tramp adkazaŭ na pytańnie žurnalistki Leśli Štal pra toje, ci zhodny jon z tym, što jaho rasijski kaleha Uładzimir Pucin «zamiašany ŭ zabojstvach i atručvańniach», frazaj: «Napeŭna». Pra heta jon paviedamiŭ u prahramie 60 Minutes na telekanale CBS News.
U asabistych kantaktach z Pucinym Tramp, na jaho dumku, byŭ «vielmi žorstki». «U nas ź im była sustreča. Heta była vielmi składanaja sustreča, ale [razam z tym] vielmi dobraja», — nahadaŭ palityk pra pieramovy z prezidentam Rasii ŭ Chielsinki. Tak jon adkazaŭ na pytańnie žurnalistki ab tym, čamu ŭ amierykanskaha prezidenta «nie znachodzicca rezkich słoŭ dla Pucina».
«Vy nie viedajecie, pra što ja razmaŭlaŭ ź im na sustrečy pierad pres-kanfierencyjaj [ŭ Chielsinki]», — padkreśliŭ Tramp. Adnak Štal nastojvała na tym, što prezident ZŠA nikoli nie kazaŭ ničoha «žorstkaha» ŭ adras svajho rasijskaha kalehi publična. «Ja hetaha nie rabiŭ? Ja toj, chto daŭ Ukrainie nastupalnaje ŭzbrajeńnie i supraćtankavyja sistemy», - zajaviŭ na heta kiraŭnik dziaržavy, dadaŭšy, što jaho papiarednik Barak Abama «addaŭ [Rasii] častku Ukrainy».
«Vy zhodnyja z tym, što Uładzimir Pucin udzielničaje ŭ zabojstvach? U atručvańniach?», — spytała jaho paśla hetaha Štal. «Napeŭna tak. Napeŭna», — adreahavaŭ na heta Tramp, zaŭvažyŭšy, što heta adbyvajecca nie ŭ jaho krainie. «Viadoma, jany [rasijanie] nie pavinny hetaha rabić», — dadaŭ amierykanski lidar. Jon taksama dapuściŭ ŭmiašańnie Rasii i Kitaja ŭ vybary ŭ ZŠA, zaŭvažyŭšy pry hetym, što ŭpłyŭ Piekina źjaŭlajecca «bolš surjoznaj prablemaj».
Zahinuŭ biełaruski dobraachvotnik Vasil «Dzir» Rapicki11
Kamientary