Kiraŭnik Partyi BNF pa Minskim rajonie Illa Dabratvor pracuje na «ruskamiraŭski» sajt «Palitrynh»
Padčas archieałahičnych raskopak u Kurapatach u abjektyvy fatohrafaŭ trapiŭ žurnaliscki bedž kiraŭnika Partyi BNF pa Minskim rajonie Illi Dabratvora. Z paśviedčańnia vynikaje, što Dabratvor źjaŭlajecca žurnalistam vydańnia «Palitrynh».
«Palitrynh» — heta prarasijski sajt, jaki redahuje juryst sa Słaŭharada Arciom Ahafonaŭ. Raniej Ahafonaŭ byŭ siabram AHP, ale potym pierajšoŭ na pazicyi «ruskaha śvietu». Jon salidaryzavaŭsia z publicystami «Rehnuma», jakich sudzili ŭ Minsku.
Letaś Ahafonaŭ razam ź minskim achoŭnikam Kanstancinavym zasnavaŭ prarasijskuju arhanizacyju «Hramadzianskaja zhoda».
Illa Dabratvor — šmatdzietny baćka, maje piaciarych dziaciej. Jamu 37 hadoŭ. Pa adukacyi — psichołah. U 2010 hodzie sprabavaŭ zarehistravacca kandydatam u prezidenty, chacia nie mieŭ patrebnych 35 hadoŭ. Na parłamienckich vybarach bałatavaŭsia pa Sienickaj akruzie, u vyniku jamu napisali 19%. Heta najbolšy pakazčyk siarod apazicyjanieraŭ, jakija nie prajšli ŭ parłamient.
Sam Dabratvor kaža, što nie ličyć «Palitrynh» pravadnikom «ruskaha śvietu» ŭ Biełarusi. «Hety paniatak «ruski śviet» uvohule nie maje vyznačanaj farmuloŭki. Častkaj ruskaha śvietu mohuć być i biełahvardziejcy, i kamunisty. Ja supracoŭničaju z «Palitrynham» užo kala hoda. Majoj umovaj było, kab teksty nie redahavalisia. Abiacańni vykonvajucca. Praŭda, častku artykułaŭ nie publikajuć. Nie tak daŭno ja pisaŭ pra Šunieviča, jaho nie pastavili», — kaža Dabratvor.
«Ja razumieju, što pracuju na čužoj ideałahična placoŭcy, ale što ŭ hetym kiepskaha, kali takaja mahčymaść jość? Ja nie radykał. Ja liču, što z usimi palityčnymi siłami, jakija jość u Biełarusi, treba razmaŭlać. I placoŭka «Rynha» tut jakraz padychodzić dla takich razmovaŭ. Ja pišu pra movu, pra historyju. Ničoha ŭ maich publikacyjach nie supiarečyć pazicyi partyi. Uvohule, ja pabačyŭ, što tak zvany «ruski śviet» maje ŭ Biełarusi čałaviek 100 prychilnikaŭ, heta maleńkaja hrupka, jakaja nie salidaryzujecca pamiž saboj», — adznačaje Dabratvor.
Finansavyja ŭmovy supracoŭnictva Illa Dabratvor nie kamientuje.
Namieśnik staršyni Partyi BNF Alaksiej Janukievič tak prakamientavaŭ supracoŭnictva Dabratvora i «Palitrynha»: «Absalutna vidavočna, što «Palitrynh» — heta nie ŚMI, a orhan prapahandy. Heta antybiełaruski resurs, jaki pracuje ŭ intaresach Kramla.
Dla luboha biełarusa supracoŭnictva z takim resursam — heta hańba, dla siabra Partyi BNF — padvojnaja hańba.
Naturalna, my praviadziem ź Illoj Dabratvoram hutarku na hetuju temu, dzie budziem nastojliva rekamiendavać admovicca ad supracoŭnictva z hetym sajtam».
Aryštavali 58-hadovuju haspadyniu ahrasiadziby z Baranavičaŭ, jakaja była pretendentam na prezidenckich vybarach — 20202
Kamientary