Кіраўнік Партыі БНФ па Мінскім раёне Ілля Дабратвор працуе на «рускаміраўскі» сайт «Палітрынг»
Падчас археалагічных раскопак у Курапатах у аб’ектывы фатографаў трапіў журналісцкі бэдж кіраўніка Партыі БНФ па Мінскім раёне Іллі Дабратвора. З пасведчання вынікае, што Дабратвор з’яўляецца журналістам выдання «Палітрынг».
«Палітрынг» — гэта прарасійскі сайт, які рэдагуе юрыст са Слаўгарада Арцём Агафонаў. Раней Агафонаў быў сябрам АГП, але потым перайшоў на пазіцыі «рускага свету». Ён салідарызаваўся з публіцыстамі «Рэгнума», якіх судзілі ў Мінску.
Летась Агафонаў разам з мінскім ахоўнікам Канстанцінавым заснаваў прарасійскую арганізацыю «Грамадзянская згода».
Ілля Дабратвор — шматдзетны бацька, мае пяцярых дзяцей. Яму 37 гадоў. Па адукацыі — псіхолаг. У 2010 годзе спрабаваў зарэгістравацца кандыдатам у прэзідэнты, хаця не меў патрэбных 35 гадоў. На парламенцкіх выбарах балатаваўся па Сеніцкай акрузе, у выніку яму напісалі 19%. Гэта найбольшы паказчык сярод апазіцыянераў, якія не прайшлі ў парламент.
Сам Дабратвор кажа, што не лічыць «Палітрынг» правадніком «рускага свету» ў Беларусі. «Гэты панятак «рускі свет» увогуле не мае вызначанай фармулёўкі. Часткай рускага свету могуць быць і белагвардзейцы, і камуністы. Я супрацоўнічаю з «Палітрынгам» ужо каля года. Маёй умовай было, каб тэксты не рэдагаваліся. Абяцанні выконваюцца. Праўда, частку артыкулаў не публікаюць. Не так даўно я пісаў пра Шуневіча, яго не паставілі», — кажа Дабратвор.
«Я разумею, што працую на чужой ідэалагічна пляцоўцы, але што ў гэтым кепскага, калі такая магчымасць ёсць? Я не радыкал. Я лічу, што з усімі палітычнымі сіламі, якія ёсць у Беларусі, трэба размаўляць. І пляцоўка «Рынга» тут якраз падыходзіць для такіх размоваў. Я пішу пра мову, пра гісторыю. Нічога ў маіх публікацыях не супярэчыць пазіцыі партыі. Увогуле, я пабачыў, што так званы «рускі свет» мае ў Беларусі чалавек 100 прыхільнікаў, гэта маленькая групка, якая не салідарызуецца паміж сабой», — адзначае Дабратвор.
Фінансавыя ўмовы супрацоўніцтва Ілля Дабратвор не каментуе.
Намеснік старшыні Партыі БНФ Аляксей Янукевіч так пракаментаваў супрацоўніцтва Дабратвора і «Палітрынга»: «Абсалютна відавочна, што «Палітрынг» — гэта не СМІ, а орган прапаганды. Гэта антыбеларускі рэсурс, які працуе ў інтарэсах Крамля.
Для любога беларуса супрацоўніцтва з такім рэсурсам — гэта ганьба, для сябра Партыі БНФ — падвойная ганьба.
Натуральна, мы правядзем з Іллёй Дабратворам гутарку на гэтую тэму, дзе будзем настойліва рэкамендаваць адмовіцца ад супрацоўніцтва з гэтым сайтам».
Цяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА79
Аляксандр Лукашэнка так ляснуўся на лёд на хакеі, што трыбуны замерлі ВІДЭА
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары