Biełaruski internet zaciata abmiarkoŭvaje skandalnaje videa, zroblenaje, jak možna mierkavać, u himnazii №31 Minska.
Na im vyrazna čuvać, jak zavuč u samych krasamoŭnych farmuloŭkach raśpinajecca pierad školnikami, ahitujučy ŭstupać u BRSM.
Tyja nie pahadžajucca, i «Hanna Mikałajeŭna» idzie na roznyja chitryki: to sprabuje rasčulić padletkaŭ napaminam, što jaje buduć hetak sama pałaskać za nievykanańnie «100%» płana, to sprabuje abudzić ich hramadzianskuju hodnaść — «heta antysavietčyna niejkaja!».
A što kažuć u BRSM?
Pakul što ni pres-słužba, ni kiraŭnictva arhanizacyi dla kamientaroŭ niedastupnyja.
Ale adzin z rajonnych sakrataroŭ, zadziejničanych u Minsku, na ŭmovach ananimnaści — pakul nie ŭzhodnienaja aficyjalnaja pazicyja — pasprabavaŭ patłumačyć nam, što adbyvajecca na videa.
Ź jahonych słovaŭ, videa, najchutčej, sapraŭdnaje, ale staroje.
«U Minsku z 2017 hoda ŭžo niama papiarovych biletaŭ, pra jakija tam havorać, u jakich treba raśpisvacca. Takija ŭžo nie vydajuć, u nas płastykavyja kartki, u jakich i fota nie ŭklejvajecca — jano dasyłajecca ŭ elektronnym vyhladzie. Jak praviła, heta prosta fota z sacyjalnych sietak ź jasna adroznym tvaram», — skazaŭ rajonny sakratar.
Taksama my źviazalisia z adnoj z nastaŭnic, jakaja zhadvajecca na videa.
Jana nie hatovaja abmiarkoŭvać situacyju, ale skazała, što ŭ himnazii №31 bolš nie pracuje.
* * *
Raniej kiraŭnik BRSM Dźmitryj Varaniuk raskazvaŭ «Našaj Nivie» pra prymusovaje siabroŭstva ŭ arhanizacyi.
NN: Zvykłaja pretenzija da BRSM — što tudy zahaniajuć aŭtamatyčna i pad pahrozaj niejkich sankcyj.
DV: Absalutna niazhodny! Takoje mo i było niekali. A ciapier ja prašu, zaklikaju: kali jość takija fakty — paviedamlajcie nam. My siońnia prosta raskazvajem ab arhanizacyi, a nie zahaniajem. Moža, niejki piedahoh-arhanizatar vystupaje i kaža: maŭlaŭ, voś vy pastupicie, i vam internat tady daduć… Nie BRSM daje, a aktyŭnaja rabota! Aktyŭnaja praca ŭ žyćci ŭniviera moža prynieści plon u vyhladzie pryjarytetnaha vydzialeńnia internata. Kali ty ŭstupaješ u BRSM, to heta pieradusim kamjunici: ty aktyŭny, tabie nieabyjakava. Tamu aŭtamatyčnaje masavaje ŭklučeńnie ŭ arhanizacyju — heta vyklučana, takoha nie pavinna być, ja kateharyčna suprać. Bo jakaja tady budzie jakaść kadraŭ?
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach4
Kamientary