25-hadovy Pavieł Tabulin znachodzicca pad vartaj. Jon razam z dvuma siabrami pryjšoŭ «razabracca» z adnaviaskoŭcam: chłopcy źbili mužčynu i jaho sužycielku, a ich susieda zabili.
Pavieł Tabulin
Adbyłosia ŭsio ŭ noč na 4 listapada. A 12 listapada Śledčy kamitet paviedamiŭ, što dom adnaho z padazravanych padpalili nieviadomyja. Pa infarmacyi «Našaj Nivy», u domie da zatrymańnia žyŭ Pavieł Tabulin.
Spaleny dom, dzie žyŭ Pavieł Tabulin. Fota — Śledčy kamitet
Nasamreč, dom naležyć nie Paŭłu, a jaho dziadźku, bratu maci.
«Dziadźku žonka ŭ psichušku pakłała. A dom Paŭłu pakul dali, kab budynak nie raściahnuli cyhanie, — raskazvaje maci Paŭła, Nadzieja Tabulina. — Paša pajšoŭ tudy žyć. Zrabiŭ ramont, hrubki papraviŭ. Ja dała jamu i dyvany darahija, i łožki, bializnu, koŭdry… Kampjutar kupiła, vopratku… Usio hetaje spalili, usio zhareła».
Chto spaliŭ chatu, maci Paŭła nie viedaje. Ale nichto z adnaviaskoŭcaŭ nie paviedamiŭ joj, što chata haryć.
«Tolki paśla ŭžo pryjšoŭ susied pa małako i kaža: maŭlaŭ, mužyki raskazvajuć, što chatu Pašavu spalili», — narakaje Nadzieja Tabulina.
Raniej viaskoŭcy ŭžo skardzilisia, što Pavieł Tabulin ź siabrami rabili ŭ vioscy, što chacieli. Prynamsi, letam chłopcy chadzili pa vioscy i adstrelvali sabak, zachodziačy ŭ čužyja dvary. Adzin z chłopcaŭ atrymaŭ za heta chatniuju chimiju. Praŭda, prysud nie ŭstupiŭ jašče ŭ siłu — prakuratura abskardziła vyrak, paličyŭšy jaho nadta miakkim.
Uvohule, sudzimaści mieli ŭsie troje padazravanych u zabojstvie. Naprykład, toj ža Tabulin byŭ sudzimy 7 razoŭ za kradziež. Taksama mieŭ administratyŭnyja spravy za drobny kradziež i raśpićcio śpirtnych napojaŭ. Jaho 17-hadovy i 20-hadovy siabry mieli sudzimaści za hvałt u dačynieńni da milicyjanta, kradziažy, chulihanstva.
Ale kali vieryć Nadziei Tabulinaj, paciarpiełyja mužčyna i žančyna nie asabliva adroźnivalisia ad napadnikaŭ. Tabulina ŭžo raskazvała, nibyta paciarpieły Harčanka prymusiŭ «žonku» napisać na Paŭła Tabulina zajavu ŭ milicyju i abvinavacić jaho ŭ zhvałtavańni. Taksama Harčanka z sužycielkaj pastajanna pili. Niaredka i z tym samym Paŭłam Tabulinym.
«Ja syna nie apraŭdvaju, ja nie viedaju, što tam zdaryłasia. Ale vinavaty va ŭsim Krocik (paciarpieły Alaksandr Harčanka). Užo prybiahaŭ da nas dziadźka Krocika, taksama pjany, ledź nie zładziŭ bojku», — kaža Nadzieja Tabulina.
Paśla padpału chaty Tabulinych u Juravičy pryjechali siłaviki i praviali razmovu ź miascovymi žycharami.
«U metach stabilizacyi situacyi ŭ Juravičach upraŭleńniem Śledčaha kamiteta pa Homielskaj vobłaści było inicyjavana praviadzieńnie sielskaha schodu ź miascovymi žycharami. U sustrečy z nasielnictvam ahraharadka ŭziali ŭdzieł supracoŭniki abłasnoha aparata USK, UUS, kiraŭnictva rajonnych adździełaŭ Śledčaha kamiteta, milicyi, MNS.
Vystupoŭcy daviali viaskoŭcam infarmacyju ab chodzie rasśledavańnia kryminalnaj spravy, zafiksavali ich dumki ab kryminahiennaj abstanoŭcy ŭ Juravičach, raspaviali pra mahčymaść prymianieńnia mier biaśpieki ŭ adnosinach da śviedkaŭ, akcentavali ŭvahu na mierach kryminalnaj adkaznaści za ŭčynieńnie niekatorych vidaŭ złačynstvaŭ, u tym liku za padpał i niedaniasieńnie ab złačynstvie», — paviedamiŭ Śledčy kamitet.
