15 lipienia ŭ Vašynhtonie zatrymali 29-hadovuju hramadzianku Rasii Maryju Bucinu pa padazreńni ŭ pracy «ahientam zamiežnaj dziaržavy». Jaje abvinavačvali ŭ sprobach «raźvivać suviazi z asobami ŭ ZŠA i traplać u arhanizacyi, jakija majuć upłyŭ na amierykanskuju palityku».
U śniežni Maryja Bucina zajaviła ŭ sudzie ŭ Vašynhtonie, što pryznaje svaju vinu va ŭdziele ŭ zmovie suprać ZŠA. Bucina taksama paviedamiła, što dziejničała pad kiraŭnictvam rasijskaha čynoŭnika.
Čym viadomaja Maryja Bucina?
Dziaŭčyna stała viadomaj na radzimie i ŭ Złučanych Štatach jak «abaronca intaresaŭ zakonapasłuchmianych uładalnikaŭ hramadzianskaj zbroi», zasnavalnik i siabra praŭleńnia hramadskaj arhanizacyi «Prava na zbroju».
Z 2016 hoda Bucina pražyvaje ŭ ZŠA pa studenckaj vizie F-1. Jaje advakat Dryskoła zajaviŭ, što Bucina «niadaŭna skončyła Amierykanski univiersitet u Vašynhtonie, atrymaŭšy stupień mahistra ŭ śfiery mižnarodnych adnosin».
Pavodle reziumie rasijanki, Bucina naradziłasia ŭ Barnaule, z čyrvonym dypłomam skončyła Ałtajski dziaržaŭny univiersitet (AłtHU) pa śpiecyjalnaści «Palitałohija». Maje dadatkovaje adukacyju pa kvalifikacyi «Vykładčyk». U 2011 hodzie pastupiła ŭ aśpiranturu AłtHU pa śpiecyjalnaści «Palityčnyja pracesy, instytuty i technałohii». Śfiera navukovych intaresaŭ — «Prablemnyja ruchi jak aktualny fienomien u sučasnaj Rasii».
U 2008 hodzie jaje abrali siabram Hramadskaj pałaty Ałtajskaha kraju ad Ałtajskaj krajovaj hramadskaj moładzievaj arhanizacyi «Liha studentaŭ AłtDU».
Z 2005 pa 2008 hod Bucina brała ŭdzieł u vybarčych kampanijach u Barnaulskuju haradskuju Dumu i Ałtajski krajovuju Radu Deputataŭ u jakaści kiraŭnika palavoj słužby. U 2011 hodzie dziaŭčyna vyjšła na «ahulnanarodny prajmieryz», kali pieramahła ŭ prajekcie «Moładzievyja prajmieryz Maładoj Hvardyi Adzinaj Rasii».
Jašče z časoŭ škoły zachaplajecca valejbołam i płavańniem. Lubimyja vidy sportu — praktyčnaja stralba ź pistaleta, stendavaja stralba, šachmaty. Słuchaje kłasičnuju muzyku, zachaplajecca čytańniem i kino. Svabodna vałodaje anhlijskaj i pačatkovym uzroŭniem niamieckaj movy.
Jak paviedamlajuć «Adkrytyja miedyja» sa spasyłkaj na bazu «Kontur-fokus», Bucinaj naležyć rekłamnaje ahienctva «Antares», zarehistravanaje ŭ Maskvie ŭ mai 2012 hoda.
Śledstva miarkuje, što z 2015 hoda i jak minimum da lutaha 2017 hoda Bucina pracavała «pa rasparadžeńni vysokapastaŭlenaj aficyjnaj asoby rasijskaha ŭrada, jakaja raniej była deputatam parłamienta RF i zatym stała vysokapastaŭlenym pradstaŭnikom u Centralnym banku RF». Amierykanskaje viedamstva ŭdakładniła, što hety čałaviek znachodzicca pad sankcyjami Minfina ZŠA.
Imavierna, havorka idzie pra ciapierašniaha namieśnika staršyni Centrabanka RF Alaksandra Toršyna, kali jon byŭ členam Savieta Fiederacyi ad respubliki Maryj Eł, Bucina adzin čas pracavała jaho pamočnikam.
U žniŭni 2016 Bloomberg sa spasyłkaj na dakład palicyi Ispanii abvinavaciŭ Toršyna ŭ suviaziach z Tahanskaj złačynnaj hrupoŭkaj. Pravaachoŭniki paličyli, što Toršyn davaŭ instrukcyi ŭdzielnikam hrupoŭki pa admyvańni hrošaj praz banki i nieruchomaść u Ispanii. Ahienctva adznačaje, što lidar hrupoŭki Alaksandr Ramanaŭ nazyvaje Toršyna svaim «chrosnym baćkam» abo «bosam». Namieśnik staršyni Banka Rasii admaŭlaŭ usie abvinavačvańni.
Raniej amierykanskija ŚMI mierkavali, što Bucina sprabavała naładzić suviazi ź miascovym zbrojevym łobi — Amierykanskaj strałkovaj asacyjacyi (NRA). Pavodle «Adkrytych miedyja», Toršyn źjaŭlajecca siabram NRA z 2011 hoda.
«Mierkavanaja suviaź Toršyna z NRA praz Bucinu padavałasia jak dokaz «zmovy» prezidenta Donalda Trampa z Rasijaj na toj padstavie, što NRA padtrymlivaje respublikancaŭ i Trampa», — piša RIA «Novosti».
Letaś Bucina ŭ składzie rasijskaj delehacyi naviedała štohadovy Nacyjanalny malitoŭny śniadanak u Vašynhtonie, padčas jakoha tradycyjna vystupaje amierykanski prezident. Jana prysutničała jak pradstaŭnik hramadskaj arhanizacyi «Prava na zbroju».
U červieni 2015 hoda Bucina napisała kałonku ŭ amierykanski časopis National Interest «The Bear and the Elephant» (anhł. — «Miadźviedź i słon») ab tym, jak prezident-respublikaniec dapamoža palepšyć adnosiny z Rasijaj.
Pra zatrymańnie rasijanki było abvieščana paśla zaviaršeńnia pieramoŭ prezidentaŭ ZŠA i Rasii ŭ Chielsinki, 16 lipienia, padčas jakich abmiarkoŭvałasia pytańnie ŭmiašańnia Kramla ŭ amierykanskija vybary.
Kamientary