Raścisłaŭ Semkiŭ. Jak pisali kłasiki: parady, pravieranyja časam
Pierakład z ukrainskaj Natałki Babinaj.
Čytač upieršyniu biare ŭ ruki knihu Franca Kafki i sprabuje jaho pračytać. Dziesiać, dvaccać staronak… A kniha nie paddajecca: ničoha nie zrazumieła. Aŭtar kiepski? Zusim nie. Prosta niemahčyma biez padrychtoŭki pračytać Kafku. Spačatku treba «treniravacca» na inšych aŭtarach — mienš składanych. Heta jak pryjści ŭ spartzału i schapicca adrazu za štanhu ź vialikaj vahoj. Pryciśnie!
Tak niazmušana i jomista viadomy ŭkrainski litaraturaznaŭca Raścisłaŭ Semkiŭ raskazvaje pra piśmieńnikaŭ, jakich nie treba čytać źlotu. U takoj dastupnaj formie aŭtar napisaŭ i knihu «Jak pisali kłasiki».
Siarod suśvietna viadomych piśmieńnikaŭ jość tyja, jakija vyrašyli padzialicca sakretami svajho pośpiechu i napisali knihi pra toje, jak pisać dobra. Hetaje vydańnie paznajomić vas z pohladami na mastackuju tvorčaść miehapapularnych Ahaty Kryści, Džordža Orueła, Reja Bredbiery, Kurta Voniehuta, a taksama blizkich pa časie Miłana Kundery, Marya Varhasa Ljosy i Umbierta Eka. Čamu jany pisali? Jak jany heta rabili? I jak na samaj spravie stali paśpiachovymi? Heta zbornik praktyčnych parad, jakija paćvierdžany pryznańniem čytačoŭ pa ŭsim śviecie.
Nadzieja Jaśminska. Pacierki i kropli
Nadzieja Jaśminska — papularnaja biełaruskaja piśmieńnica, jakaja piša dla dziaciej. Jana była pieršym łaŭreatam Premii Ciotki za najlepšuju knihu dla dziaciej i padletkaŭ za 2016 hod (z knihaj «Siem ružaŭ»). U 2017 hodzie, naprykład, jana stała samym čytanym aŭtaram u dziciačych biblijatekach Minska — atrymała premiju «Biblijazvažańnie». Heta značyć, jaje knihi biblijatekary vydavali najčaściej. I voś pad Novy hod u Nadziei vyjšła novaj kniha — «Pacierki i kropli», z vydatnymi ilustracyjami Stasi Sakałoŭskaj.
«Pacierki i kropli» — utulnaja historyja, vytkanaja ź nitak uspaminaŭ, rozdumaŭ i pačućciaŭ piacihadovaha chłopčyka. Jon robić adkryćci, viadzie natatki-ŭ-hałavie, kryŭdzicca, chvareje, čakaje leta, vučycca čytać, maryć, razvažaje pra žyćcio i pra toje, što znachodzicca pa-za im.
Hetaja kniha — dla dapytlivych dziaciej. Jany paznajuć u hałoŭnym hieroi siabie ci svaich siabroŭ. Tych, u kaho jość ŭlubiony son z pacham miatnych landrynak, chto maryć vynajści šampuń dla dumak i chto čuje ŭ vurkatańni kata huk marskich chvalaŭ.
Hetaja kniha — dla ŭdumlivych darosłych. Tamu što im čas ad času treba pahružacca ŭ malenstva — takoje lohkaje i bieskłapotnaje, napoŭnienaje dziŭnymi pryhodami. I vučycca tym samym lepiej razumieć svaich dziaciej. Bo darosłyja mohuć zusim zabycca pra toje, jak jany niekali bačyli viasiołku ŭ bienzinavaj łužynie, jak rabili schovanku pad łožkam i jak čakali viasnu paśla doŭhaj zimy.
Vialiki farmat, z šykoŭnymi kalarovymi ilustracyjami — hetaja kniha stanie idealnym knižnym padarunkam dla vašych dziaciej pad navahodniuju jalinku.
Tomas Man. Śmierć u Vieniecyi: navieły i apaviadańni
Pjerakład ź niamieckaj Uładzimira Papkoviča.
U sieryi «Noblesse Oblige», dzie publikujucca knihi nobieleŭskich łaŭreataŭ, vyjšła treciaja kniha.
Tomas Man (1875—1955) — stvaralnik «intelektualnaha ramana», łaŭreat Nobieleŭskaj premii 1929 hoda. Jon viadomy najpierš svaimi epičnymi tvorami — «Budenbroki», «Doktar Faŭstus», «Čaroŭnaja hara». Ale byŭ biassprečnym majstram i ŭ navielistyčnym žanry. Najlepšyja jaho navieły źjaŭlajucca ŭzorami hłybokaha psichałahizmu, dzivosnaj harmonii nacyjanalnaha i ahulnačałaviečaha, sacyjalnaha i ŭniviersalnaha. Siarod tvoraŭ karotkaj prozy Mana jość sapraŭdnyja šedeŭry. Da ich adnosiacca pierš za ŭsio «Trystan», «Tonia Krehier» i «Śmierć u Vieniecyi», jakija publikujucca ŭ hetaj knizie. Usiaho pad adnoj vokładkaj sabranyja čatyrnaccać navieł i apaviadańniaŭ i pramova piśmieńnika na ŭručeńni Nobieleŭskaj sieryi. Pierakłady byli zrobleny Uładzimiram Papkovičam niepasredna dla hetaha vydańnia.
Tomas Man i siońnia, praz šeśćdziasiat hadoŭ paśla śmierci, uvachodzić u lik najviadomiejšych niamieckich aŭtaraŭ, naroŭni z Hiote, Šyleram, Hiese. A kali padčas Druhoj suśvietnaj vajny (Man z prychodam Hitlera da ŭłady pakinuŭ Hiermaniju) piśmieńnik vyjechaŭ u ZŠA, jaho zaprasili vieści adtul pa radyjo antyfašysckija pieradačy dla niamieckich słuchačoŭ. Na toj čas Man byŭ samym aŭtarytetnym čałaviekam dla niemcaŭ.
«Śmierć u Vieniecyi» vyjšła ŭ nobieleŭskaj sieryi «Noblesse Oblige». Raniej pabačyli śviet «Hoład» Knuta Hamsuna i «Kachańnie padčas chalery» Habryjela Harsii Markiesa.
Usie vydańni možna nabyć u vydavieckaj internet-kniharni.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)