Siurpryz ad vykankama — 26 tysiač za inžyniernyja sietki. «Nie apłacim — elektraaciapleńnia nie budzie»
Kab abahravać svoj novy dom elektryčnaściu pa nizkim taryfie, u žycharki Barysava Raisy ŭžo ŭsio praduhledžana: dazvolenaja da vykarystańnia mahutnaść sietki — 30 kVt, elektravadzianyja padłohi i asobny ličylnik. «Prezident abiacaŭ stymulavać enierhaspažyvańnie z uvodam AES, tamu my sistemu aciapleńnia rabili ŭ raźliku na tannuju enierhiju», — kaža jana. Adnak jaje dom ciapier aciaplajecca kaminam i abahravalnikami — enierhasietki admaŭlajucca płambiravać ličylnik na elektraaciapleńnie. Pryčyna — miascovy vykankam admaŭlajecca ŭvodzić dom u ekspłuatacyju, pakul Raisa nie vypłacić 26 tysiač rubloŭ kampiensacyi za inžyniernyja sietki na ŭčastku.
Učastak na novaj vulicy Špitalnaj Raisa kuplała ŭ sakaviku 2017 hoda z aŭkcyjona. U apisańni aŭkcyjonnaha łota na sajcie vykankama i ŭ haziecie «Adzinstva» było pakazana, što ziamielnyja nadzieły majuć elektryčnaść, vadu i haz, tamu achvotnych ich kupić było dastatkova. Adpaviedna, košt ziamli ŭ chodzie tarhoŭ surjozna vyras — da 40 tysiač rubloŭ za 9 sotak. Nasamreč kamunikacyj u hetym rajonie nie akazałasia.
— My z susiedziami chadzili da našaha staroha mera na pryjom, pytalisia ŭ jaho, dzie ž kamunikacyi? — raspaviadaje Raisa. — Jon nam skazaŭ, što heta ŭ miascovaj haziecie niešta nabłytali. Ale ž usim zrazumieła, što redakcyja pieradrukavała infarmacyju z sajta vykankama. Uvohule, pytańni ź sietkami pačali vyrašacca ŭžo pry novym kiraŭnictvie horada — u pačatku 2018 hodzie na vulicy zrabili vadapravod, praviali elektryčnaść, vyprastali darohu. Z susiedziami stvaryli kaapieratyŭ i za svoj košt praviali centralnuju kanalizacyju.
Dom Raisy pabudavaŭsia ŭ ścisłyja terminy — 20 śniežnia 2018 hoda jana padała zajavu ab pačatku pracedury ŭvodu ŭ ekspłuatacyju. Akty ŭvodu padpisali i ŭ vodakanale, i ŭ enierhanahladzie.
— Usie słužby byli projdzieny, i raptam nam u adździele architektury kažuć vypłacić kampiensacyju za inžyniernyja sietki na ŭčastku, zhodna z pastanovaj Saŭmina № 298, inakš dom u ekspłuatacyju nie uviaduć. I vystaŭlajuć rachunak — 26 tysiač rubloŭ, — kaža Raisa. — Heta stała dla nas šokam — kali my kuplali ŭčastak, nichto nam nie kazaŭ pra isnavańnie hetaj pastanovy, u damovie taksama pra heta niama. I kali my atrymlivali dazvoł na budaŭnictva ŭ vykankamie — taksama nichto ni słova, ni paŭsłova. Na pryjomie ŭ rajvykankamie nam skazali, što niaviedańnie zakona nie vyzvalaje ad adkaznaści. Ale tut ža zusim inšaja — ź jurydyčnaha punktu hledžańnia heta parušeńnie damoŭnych adnosin.
Pavodle toj ža pastanovy № 298, pierad tym jak vydać dazvoł na budaŭnictva, nam pavinny byli paviedamić pra heta.
Paźniej vyśvietliłasia, što ziemleŭparadkavalnaj słužbaj pry acency kadastravaha koštu ŭčastka kamunikacyi nie byli ŭličanyja. Zatoje ich nie zabyli ŭ UKB.
— Va UKB ja paprasiła raźlik — za što ja pavinna zapłacić i kolki kaštavała budaŭnictva hetych sietak.
U liście UKB Barysaŭskaha rajona tłumačycca, što suma kampiensavanych vydatkaŭ na budaŭnictva, u tym liku prajektavańnie, abjektaŭ raźmierkavalnaj inžyniernaj i transpartnaj infrastruktury da ziamielnym učastku raźličvajecca zhodna z zaćvierdžanymi udzielnymi pakazčykami pa Barysaŭskim rajonie i pradastaŭlenym mahutnaściam abjektaŭ infrastruktury da chaty. To bok, hetaja suma nie zaležyć ad faktyčnych zatrat pa prajektavańni i budaŭnictvu inžyniernych sietak dla učastkaŭ na vulicy Špitalnaj.
— Čamu ja jak płacielščyk nie maju prava viedać, kolki heta kaštavała? Kali my za svoj košt budavali kanalizacyju, to ŭsio było hranična zrazumieła, za što i kolki my płacim. Hetak ža pavinna być i ź inšymi sietkami - mahčyma, žycharam vulicy tańniej było b pravieści hetyja kamunikacyi — i elektryčnaść i vadu — za svoj košt.
Voś jaki raźlik pradastaviŭ UKB:
Kampiensacyja za vadapravod skłała 170,32 rubla.
Daražej za ŭsio — rachunak za elektrasietki. 25 tysiač rubloŭ.
Nie zabylisia pra darohu — jašče 806 rubloŭ. Razam — 26 tysiač rubloŭ.
Učastak na vulicy Špitalnaj u Barysavie pry takich raskładach stanovicca «załatym» — z ulikam sumy kampiensacyi jon abydziecca ŭ 66 tysiač rubloŭ. Raisa kaža, što kali b pra dadatkovyja vydatki viedała zahadzia, to naŭrad ci jana kuplała hetuju ziamlu.
— U nas dvoje dziaciej, inšaj žyłpłoščy niama, usie siły, hrošy, u tym liku kredytnyja, kinuli na budaŭnictva hetaha doma, — kaža Raisa. — Hetaja suma dla nas niepasilnaja. Kali ludziam treba budzie heta ŭsio apłačvać, to dziaržavie varta było b praduhledzieć rasterminoŭku — jak takuju sumu možna adrazu vypłacić z zarobkam u 700-800 rubloŭ? My źbirajemsia źviartacca z zajavaj u Minskabłvykankam ab praviercy hetych raźlikaŭ. Mahčyma, što pryjdziecca źviartacca jašče i ŭ sud.
Zaraz dom Raisy abahravajecca faktyčna za košt kamina i abahravalnikaŭ: padklučać elektrapadłohi da bytavoj sietki, a nie vydzielenaj dla hetaha asobnaj linii nielha — jana nie raźličana na takija nahruzki. I pakul dom nie ŭviedzieny ŭ ekspłuatacyju, elektrasietki pa zakonie nie mohuć apłambavać ličylnik na aciapleńnie. Za spažytuju elektraenierhiju davodzicca płacić pa 18 kapiejek za kVt zamiest 3,35 (pa taryfie na aciapleńnie, dziejučym z 1 studzienia 2019 hoda).
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy12
Kamientary