Kiraŭnikoŭ Kansiervatyŭna-Chryścijanskaj Partyi — BNF (KCHP BNF) 18 studzienia vyklikali ŭ Minski rajvykankam na pasiadžeńnie kamisii adździeła ideałahičnaj pracy, kultury i moładzi, kab skłaści na ich pratakoły, paviedamlaje sajt partyi.
Jury Bieleńki, vykanaŭca abaviazkaŭ u Biełarusi staršyni partyi, i Valery Bujvał, sakratar upravy partyi, nibyta «parušyli paradak i ŭmovy vykanańnia prac na historyka-kulturnaj kaštoŭnaści» ŭ Kurapatach i tym samym «nanieśli škodu kulturnaj kaštoŭnaści».
Padstavaj stała toje, što 27 śniežnia 2018 h. hrupa biełaruskich patryjotaŭ, siarod ich Jury Bieleńki, ustalavali ŭ Kurapatach draŭlany kryž na miescy daŭniaha kryža pamiaci litoŭskich achviaraŭ, jaki sparachnieŭ. Papiarednie patryjoty źviazalisia z hramadzianami Litvy, jakija vykanali ŭ tradycyjnym styli litoŭskaha narodnaha mastactva draŭlany dubovy kryž i prymacavali da jaho šyldačku z epitafijaj «Pamiaci zabitych litoŭcaŭ. 1937—1941» na biełaruskaj i litoŭskaj movach. Ustanoŭka novaha kryža na miescy byłoha kryža ziaviłasia aktam ušanavańnia pamiaci pakutnikaŭ litoŭskaha naroda, jaki razam ź biełarusami paciarpieŭ pad čas stalinskich represij.
U toj dzień kala hetaha miesca prysutničali dva rabotniki lashasu, jany nie vykazvali nijakich pretenzij da ŭdzielnikaŭ ustanoŭki kryža i nie zadavali nijakich pytańniaŭ.
U toj samy čas pa centralnaj Kryžovaj alei Kurapataŭ prachodziŭ Valery Bujvał, jaki na praciahu 30 hadoŭ apiakujecca kurapackimi mahiłami i kryžami. Jon nie prymaŭ udzieł va ŭstanoŭcy novaha kryža. Adnak, na asnovie falšyvych śviedčańniaŭ rabotnikaŭ lashasu jaho taksama pryciahvajuć da adkaznaści za ŭdzieł va ŭstanoŭcy kryža.
Viečaram stała viadoma, što kryž pamiaci litoŭskich achviar źnik. Udałosia vyśvietlić, što hety kryž byŭ vydaleny ź ziamli i vyviezieny rabotnikami lashasu. Zaraz jon znachodzicca na časovym zachavańni na administracyjnaj terytoryi lashasu.
Viadoma, što pryznačana novaje pasiadžeńnie kamisii adździeła ideałahičnaj pracy, kultury i moładzi dla praviadzieńnia administracyjnaha pracesu.
«Absurdnyja i falšyvyja abvinavačvańni vysunuty suprać ludziej, jakija na praciahu 30 hadoŭ stvarali Narodny memaryjał u Kurapatach, achoŭvali i baranili jaho ad sprobaŭ źniščyć kryžy i mahiły narodnych pakutnikaŭ…
Patryjoty buduć źviartacca ŭ prakuraturu z metaj abskardžvańnia niezakonnych dziejańniaŭ pradstaŭnikoŭ uładaŭ, a taksama da mižnarodnaj hramadskaści z zaklikam asudzić vandalskija dziejańni ŭładaŭ na mahiłach pakutnikaŭ i niezakonnyja represii suprać patryjotaŭ, jakija ŭšanoŭvajuć pamiać achviaraŭ u Kurapatach», — havorycca ŭ paviedamleńni infarmacyjnaj kamisii KCHP — BNF.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary