Siadzieć za stałom u čaravikach z abcasami — heta zło. Razmova z doktaram pra varykoz
Dźmitryj Juškievič pracuje doktaram-chirurham u miedycynskim centry «Konfidens». Užo amal vosiem hod jon śpiecyjalizujecca mienavita na flebałohii — chvarobach vien.
Dźmitryj śćviardžaje, što niama takoj žančyny, u jakoj na nahach nie było b chacia b adnoj nievialičkaj vienki ci zorački.
«A heta ŭžo varykoznaja chvaroba», — kaža doktar.
Isnuje roznaja statystyka, kolki čałaviek pakutuje ad hetaj chvaroby. Adny daktary ahučvajuć, što kala 50% pracazdolnaha nasielnictva pakutuje na varykoznuju chvarobu, žančyny — čaściej prykładna ŭdvaja, inšyja ŭpeŭnienyja, što ŭ 80% biełarusaŭ možna vyjavić varykoz.
Pradavački, aficyjanty i vajskoŭcy pakutujuć ad varykozu čaściej za inšych
Bolšaść tych, u kaho jość prablemy z nahami, — heta žančyny.
«Pryčyn niekalki. Pa-pieršaje, zachvorvańnie pieradajecca ŭ spadčynu mienavita pa žanočaj linii. Pa-druhoje, ciažarnaść i rody — heta asnoŭnaja pryčyna varykozu ŭ žančyn. Jašče nielha vyklučać takija faktary, jak harmony, vysokija abcasy i ciažkuju fizičnuju pracu. Jak heta ni dziŭna, ale samuju ciažkuju fizičnuju pracu ŭ nas vykonvajuć mienavita žančyny. Uziać chacia b pracu prybiralščycy».
Dźmitryj Juškievič raskazvaje, što najčaściej jaho pacyjentki — aficyjantki, pradavački, bo jany ŭvieś čas na nahach. Nie radziej prychodziać kasirki i buchhałtarki — chto, naadvarot, siadzić na pracoŭnym miescy pa dziesiać hadzin zapar.
«Asnoŭnaja pamyłka, jakuju robiać žančyny, što majuć siadziačuju pracu, — jany siadziać u čaravikach na abcasach. Tak nielha, chavać pad stoł nohi ŭ abutku na abcasach — niapravilna. Ad hetaha nohi stamlajucca, bo jany znachodziacca ŭ niazručnym stanoviščy».
Siarod mužčynskich prafiesij, pradstaŭniki jakich čaściej pakutujuć ad varykozu, — prafiesijnyja spartoŭcy, vajskoŭcy, milicyjanty.
«Mužčyny chvarejuć ciažej, bo jany da doktara źviartajucca tolki ŭ krajnich vypadkach, kali nohi pačynajuć mocna baleć. Šmat kaho siłkom pryvodziać žonki, maŭlaŭ, rabić doma ničoha nie choča, a na bol u nahach skardzicca. Jašče varta adznačyć, što varykoz značna pamaładzieŭ. Majmu samamu małodšamu pacyjentu 9 hadoŭ, jon chakieist».
Ciažar u nahach — pradvieście varykozu
Dźmitryj Juškievič śćviardžaje, što nielha pakidać biez uvahi navat niaznačnyja na pieršy pohlad simptomy: ciažar u nahach, stomlenaść, apuchłaść (acioki).
«Varta raz na hod pryjści da doktara, zrabić UHD (ultrahukavoje daśledavańnie) vien i viedać, što adbyvajecca ŭ vašym arhaniźmie. Svoječasovaje abśledavańnie dapamoža vybrać toj mietad lekavańnia, jaki vam pasuje, i vyklučyć inšyja pryčyny chvaroby noh. Nohi ž mohuć apuchać (aciakać) i ad prablem z nyrkami ci sercam. Tak što heta nie žarty».
Sposabaŭ vylečyć vieny nasamreč vielmi mnoha, kaža doktar. Inavacyjnyja mietodyki ŭ Biełarusi vykarystoŭvajuć pakul tolki płatna.
Jak ža možna vylečyć varykoznuju chvarobu?
«Isnuje tak zvanaje kansiervatyŭnaje lekavańnie: našeńnie kampresijnaha trykatažu, karystańnie maziami, źmiena ładu žyćcia i niekatorych zvyčak. Ale ni ŭ jakim razie nielha zajmacca samalačeńniem. Tolki śpiecyjalist moža vyznačyć, ci dapamoža vam taki sposab».
Druhi mietad — chirurhičnaje ŭmiašańnie.
«Pastupova daktary-flebołahi imknucca zamianiać takija apieracyi bolš sučasnymi mietadami lačeńnia, bo pacyjenty admaŭlajucca ad ahulnaha narkozu, dy i paśla razrezaŭ na nazie zastajucca šnary, što nieestetyčna».
Ciapier u Biełarusi vykarystoŭvajucca i bolš prahresiŭnyja mietodyki.
«U nas byŭ amal aniekdatyčny vypadak, kali pryjechaŭ prafiesar ź Izraila i pakazvaŭ, jak apieryravać vieny łazieram. Jon bačyć, što jaho apieracyja nie vyklikaje ŭ našych daktaroŭ ni zachapleńnia, ni dadatkovych pytańniaŭ. My zapytalisia ŭ jaho: «Kolki apieracyj vy zrabili takim sposabam?» Jon kaža: «Niedzie kala 40». Na što my, biełaruskija daktary, adkazali, što robim takich apieracyj pa 150 na hod. Tak što miedycyna ŭ Biełarusi na vysokim uzroŭni».
Akramia łaziernaj terapii, siońnia vieny vydalajuć jašče i praz skleraterapiju, kali ŭ vienu ŭvodzicca chimičny preparat i sklejvaje jaje.
«Apieracyju pa vydaleńni vien ciapier nazyvajuć «apieracyjaj abiedziennaha pierapynku». Bo možna pryjści ŭ abied na praceduru, a paśla spakojna viarnucca da pracy. Admietnaść sučasnych mietadaŭ terapii varykozu ŭ tym, što ź imi amal adsutničaje pieryjad reabilitacyi. Paśla apieracyi prosta treba vykonvać peŭnyja rekamiendacyi doktara. Naprykład, šmat chadzić, hadziny pa try na dzień. Tolki 2% pacyjentaŭ paśla apieracyi ŭžyvajuć bolepatolnyja (abiazbolvalnyja)».
Sučasnyja mietady lačeńnia nie patrabujuć i ahulnaha abiazbolvańnia abo narkozu.
«Robicca ŭkoł kala vieny, a čałaviek znachodzicca ŭ prytomnaści. Mužčyny, pieravažna, padčas apieracyi śpiać. Navat śpiecyjalna prosiać rabić akuratna, nie budzić. Ale ja nie viedaju nivodnaj žančyny, jakaja b padčas apieracyi zasnuła. Žančyny, čaściakom, usiu praceduru havorać, nie spyniajučysia».
Apošnim časam staŭ papularnym i taki napramak, jak kaśmietyčnaja flebałohija.
«My vydalajem nie tolki zorački na nahach, ale i vieny na tvary, rukach, na pałavych orhanach. Kaniečnie, papiarednie kansultujem čałavieka: kali apieracyja nie treba, adhavorvajem. Ale zdarajecca, što da nas prychodziać ludzi publičnych prafiesij, jakim važna vyhladać estetyčna. Tyja ž pijanistki, jakija vystupajuć u adkrytych uborach: im važna, kab ruki byli pryhožymi».
Dźmitryj Juškievič kateharyčna nie zhodny z tym, što treba admaŭlacca ad lačeńnia vyklučna praz uzrost.
«Isnuje takoje aznačeńnie, jak jakaść žyćcia. U mianie jość pacyjentka, jakoj 86 hadoŭ. Joj nie rabić apieracyju? A kali jana budzie žyć da 100 hadoŭ, joj što, jašče 20 hod pakutavać ad bolu ŭ nahach?»
Bolš za toje, praciahvaje doktar, varykoz vielmi niebiaśpiečna zapuskać, bo heta moža spravakavać i raźvićcio trambozaŭ i trombaflebitaŭ.
«Adarvany tromb moža pieramiaścicca z tokam kryvi ŭ luby orhan i vyklikać infarkt ci insult. Pry zapuščanaj chvarobie mohuć raźvicca trafičnyja jazvy. Ničoha dobraha, kali nohi hnojacca, niama».
Ciapier, u zimovy pieryjad, raskazvaje Dźmitry Juškievič, kolkaść apieracyj pavialičvajecca.
«Leta — čas kansultacyj. Kali ŭ haračyniu nohi macniej aciakajuć, ludzi pačynajuć čaściej zadumvacca, što ŭ arhaniźmie adbyvajecca niešta nie toje. Ja vielmi ŭściešany tym, što ludzi stali čaściej dumać pra svajo zdaroŭje, što svoječasova źviartajucca da doktara».
Parady, kab zaścierahčysia ad varykozu, u miedykaŭ prostyja.
«Pazbaŭlajciesia ad zvyčki siadzieć «naha na nahu», chadzicie bolš pieššu, zajmajciesia sportam, vybirajcie zručny abutak. I abaviazkova raz na hod naviedvajcie flebołaha».
Ciapier čytajuć
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi2
Kamientary