Ludzi ŭ supraćhazach pratestavali suprać šumu i smurodu z «Homielšpaleraŭ» FOTY
U Homli 10 lutaha adbyŭsia pratest suprać šumu i smurodu z pradpryjemstva «Homielšpalery». Fabryka letaś zapuściła novuju liniju pa vytvorčaści viniłavych špaleraŭ. Navakolle nakryła dymam i smurodam. Užo hod žychary Navabielickaha rajonu «vajujuć» suprać zavodu, piša «Radyjo Svaboda».
10 lutaha aktyvisty inicyjatyŭnaj hrupy vyjšli da prachadnoj filijału «Homielšpalery», adkrytaha akcyjanernaha tavarystva «CBK-Kansałt», u adhaźnikach i reśpiratarach. Jany trymali plakaty z patrabavańniem spynić «eksperymenty nad ludźmi».
«Siońnia nas tut siem čałaviek. Heta naš zvarot da ŭłady — kab nas urešcie pačuli! Bo kali nie pačujuć — siudy mohuć vyjści nie siem, a siemdziesiat siem ci siamsot siemdziesiat siem čałaviek. Nam nadakučyŭ hety smurod i šum», — patłumačyła adna z udzielnic fłešmobu Valancina Vidzienka.
Jašče adzin udzielnik akcyi, Viačasłaŭ Samusienka zaznačyŭ, što za hod byli napisany dziesiatki kalektyŭnych zvarotaŭ va ŭsie instancyi, ludzi chadzili na pryjomy da čynoŭnikaŭ, ale plonu mała.
Žychary Navabielicy patrabujuć, kab «Homielšpalery» ustalavali ačyščalnyja zbudavańni — piečy dapału. «Piečy dapału kaštujuć doraha. Pradpryjemstva ekanomić, atrymlivaje prybytki, a my raspłačvajemsia svaim zdaroŭjem», — kaža Valancina Vidzienka.
Paśla akcyi da žurnalistaŭ padyšła Valancina Siadova — staršynia kaaperatyŭnaha domu № 51v pa vulicy Iljiča. Jana padkreśliła, što na šum i smurod z zavodu skardzicca ŭvieś 9-paviarchovy dom.
«Nočču tut prosta piekła — tak skuholić i vyje hetaja truba, dzieci spać nie mohuć. Pavodle zakanadaŭstva, paśla 23-j hadziny navat dźviarmi nielha mocna brazhać. A tut takoje dazvolena. Za miažoj užo b začynili hety zavod i kiraŭnictva pasadzili», — skazała staršynia kaaperatyvu.
Da hetaha času žychary Navabielicy nie atrymali adkazu ad kiraŭnictva pradpryjemstva — jakoje mienavita rečyva zabrudžvaje atmasferu i daje taki smurod. Dziaržaŭnaja hazeta «Homielskaja praŭda» abiacaje, što «Homielšpalery» zaklučać damovu ź labaratoryjaj z Sankt-Pieciarburhu, pierad jakoj budzie pastaŭlena zadača «znajści chimičnaje złučeńnie, jakoje i farmuje hety pach».
Ciapier čytajuć
Stała viadoma, dzie pracuje favarytka Łukašenki Uładlena Zajcava6
Kamientary